Read Buka Helaga (Hiri Motu) 1993 DEUTERONOMI 23 Bible Online

DEUTERONOMI 23 - Buka Helaga (Hiri Motu) 1993 bible

DEUTERONOMI 23

¹Mose ma ia hereva, ia gwau, “Iena abona ena nadinadi idia utua o hadikaia, o iena usina idia utua oho tauna be Lohiabada ena bese lalonai do ia noho diba lasi.

²“Ariara natuna be Lohiabada ena bese lalonai do ia noho diba lasi. Iena natuna bona iena tubuna taudia danu be Lohiabada ena bese lalonai do idia noho lasi, ela bona uru ibounai 10.

³“Amono tauna ta o Moaba tauna ta be Lohiabada ena bese lalonai do ia noho lasi, ela bona uru ibounai 10.

⁴Badina be Aigupito dekena amo umui mai, bona edia tano dekenai umui raka neganai, idia ese aniani bona ranu umui dekenai idia henia lasi. Bona idia ese Balama Beoro, Petoro hanua tauna, Mesopotamia tano dekena amo, idia boiria, umui do ia hadikaia totona.

⁵Lohiabada, emui Dirava, ese Balama ena hadikaia hereva ia kamonai lasi, to unai hadikaia hereva be hanamoa hereva ia halaoa, badina be Lohiabada, emui Dirava ese umui ia ura henia.

⁶Emui mauri dinadia ibounai lalonai unai Amono bona Moaba taudia do umui durua lasi, bona edia namo do umui tahua lasi.

⁷“Edoma taudia do umui badu henia lasi, badina idia be emui varavara taudia. Aigupito taudia danu do umui badu henia lasi, badina be guna edia tano dekenai idau taudia bamona umui noho.

⁸Uru toi murinai, edia natudia be Lohiabada ena bese lalonai idia vareai diba.”

⁹Ma Mose ia gwau, “Tuari dekenai do umui lao, bona kamepa dekenai umui noho neganai, do umui naria namonamo, gau ta ese umui do ia hamiroa garina.

¹⁰Bema tau ta be hanuaboi neganai iena vesi ia mai murimurinai, ia ese kamepa do ia rakatania, murimuri dekenai do ia noho.

¹¹Vadaeni adorahi neganai do ia digu, bona dina do ia diho neganai, ia be kamepa lalonai ma do ia raka vareai.

¹²“Kamepa ena murimurina dekenai emui kukuri gabuna ta do umui gwauraia.

¹³Bona au ta emui tuari gaudia danu do umui abia lao, vadaeni umui ura kukuri neganai, guri ta do umui geia, bona umui kukuri murinai, tano dekena amo unai guri do umui hahonua.

¹⁴“Badina be Lohiabada, emui Dirava be emui kamepa dekenai ia loaloa noho, umui do ia naria totona, bona umui dekenai idia tuari taudia dekena amo kwalimu umui dekenai do ia henia totona. Unai dainai emui kamepa be do ia helaga noho, Lohiabada ese gau mirona ta umui huanai do ia itaia, bona umui dekena amo do ia raka siri garina.

¹⁵“Bema hesiai tauna mai guia danu ese iena biaguna dekena amo ia heau, bona oi dekenai mauri totona ia heau mai neganai, iena biaguna dekenai do oi henia lou lasi.

¹⁶Ia ese iena ura gabuna, emui hanua edia lalonai do ia noho. Do oi dagedage henia lasi.

¹⁷“Israela hahine ta ese sibona ariara hahine do ia halaoa lasi, dirava ta hanamoa totona, bona Israela tauna ta be ma tau ta danu do idia sihari karaia lasi, dirava ta hanamoa totona.

¹⁸Ariara hahine ena davana, o tau ta, ma tau ta danu idia sihari, ena davana be Lohiabada, emui Dirava ena ruma dekenai do umui mailaia lasi, emui gwauhamata davana karaia totona. Unai kara ruaosi be Lohiabada, emui Dirava ese ia badu henia noho.

¹⁹“Bema moni, o aniani, o gau ta oiemu varavara Israela tauna dekenai oi heniatorehai neganai, atoa kau moni do oi abia lasi.

²⁰Idau bese dekenai oi heniatorehai neganai, atoa kau moni do oi abia diba. To oiemu varavara Israela tauna dekena amo atoa kau moni do oi abia lasi. Unai dekena amo Lohiabada, oiemu Dirava ese oi do ia hanamoa gau ibounai do oi karaia lalonai, do umui noholaia tano dekenai.

²¹“Lohiabada oiemu Dirava dekenai gwauhamata ta do oi gwauraia neganai, inai gwauhamata do oi hamomokania haraga. Badina be Lohiabada, oiemu Dirava ese oiemu gwauhamata ena anina be oi dekena amo do ia tahua, bona bema lasi neganai, oi be mai oiemu kara dika Lohiabada ena vairanai.

²²Bema oi gwauhamata lasi, oi be mai emu kara dika lasi.

²³To bema oiemu uduna bibina dekena amo gwauhamata oi gwauraia, do oi hamomokania. Oiemu lalona ena ura dainai, unai hereva Lohiabada ena vairanai oi gwauraia, unai dainai karana do oi karaia.

²⁴“Oiemu badibadinai tauna ena vain uma ena badinai oi raka neganai, vain ena anina do oi ania diba, oiemu hitolo hegeregerena, to haida be oiemu puse lalonai do oi udaia lasi.

²⁵“Oiemu badibadinai tauna ena uiti uma ena dala ta dekenai oi raka vareai neganai, uiti ena anina be emu imana dekenai do oi veria oho diba, to uiti haida be kaia dekenai do oi utua lasi.”