Read Buka Helaga (Hiri Motu) 1993 DEUTERONOMI 24 Bible Online

DEUTERONOMI 24 - Buka Helaga (Hiri Motu) 1993 bible

DEUTERONOMI 24

¹Ma Mose ia gwau, “Sedira tau ta do ia headava, gabeai ia ese iena adavana ia ura henia lasi, hahine ena kara mirona ta dainai. Unai neganai unai tau ese hadihoa pepa do ia torea, hahine dekenai do ia henia, vadaeni iena ruma dekena amo do ia siaia, ia raka siri.

²Hahine be unai ruma ia rakatania murinai, sedira ia ese tau ta ma do ia adavaia.

³To unai tau iharuana danu ese be sedira unai hahine do ia ura henia lasi, bona hadihoa pepa do ia torea, ia henia, bona iena ruma dekena amo unai hahine ia siaia. O sedira unai tau iharuana ia mase.

⁴Unai bamona neganai unai tau ginigunana, ia hadihoa guna tauna ese unai hahine ia abia lou diba lasi, badina ia miro vadaeni ia dekenai. Unai bamona kara be Lohiabada ena vairana dekenai ia miro. Lohiabada emui Dirava ese umui dekenai do ia henia tano dekenai unai bamona kara dika do umui karaia lasi.”

⁵“Headava matamata tauna be tuari dekenai do umui siaia lasi, bona gaukara ta do umui henia lasi. Iena ruma dekenai do ia noho, iena adavana do ia hamoalea, ela bona lagani ta do ia ore.

⁶“Bema tau ta dekenai gau ta oi heniatorehai neganai, unai tau ena uiti moia nadi rua, henunai nadi o ataiai nadi do oi abia lasi, oi heniatorehai ena davana. Badina be unai be unai tau ena famili edia mauri badina aniani do umui kokia garina.

⁷“Bema tau ta ese iena Israela varavarana ta ia dogoatao, iena hesiai tauna do ia halaoa, o do ia hoia totona, inai bamona henaoa tauna be do umui alaia mase. Unai dala dekenai kara dika unai bamona umui huanai dekena amo do umui kokia ore.

⁸“Do umui naria namonamo, lepera gorere garina. Levi ena helaga taudia ese umui idia hadibaia karadia ibounai do umui karaia, Levi taudia dekenai lau henia lepera taravatudia do umui badinaia.

⁹Aigupito dekena amo umui raka mai neganai, Lohiabada, emui Dirava, ese dala dekenai Miriama dekenai ia karaia gauna do umui laloatao.

¹⁰“Bema tau ta dekenai oi heniatorehai neganai, iena ruma dekenai do oi daekau lasi, iena dabua, abiatorehai toana abia totona.

¹¹Ruma ena murimuri dekenai do oi gini, ela bona abiatorehai tauna do ia raka mai, iena abiatorehai toana oi dekenai do ia henia.

¹²Bema ia be ogogami tauna, iena dabua, abiatorehai toana, be hanuaboi lalonai do umui dogoatao lasi.

¹³Dina ia diho neganai, unai dabua do oi henia lou, vadaeni unai dabua lalonai do ia mahuta, bona oi do ia hanamoa. Unai be kara maoromaoro, Lohiabada, emui Dirava ena vairana dekenai.

¹⁴“Oiemu hesiai tauna mai davana, Israela tauna ogogamina o idau bese tauna, oiemu hanua dekenai ia noho, be do oi kara auka henia lasi.

¹⁵Dina ta ta ibounai davana do oi henia, dina ia do diho lasi neganai, davana do oi henia. Badina ia be ogogami, bona ia ura davana ia abia haraga. Ia ese Lohiabada dekenai do ia tai, oi do ia samania, vadaeni oi be kerere garina.

¹⁶“Tamana taudia be do idia alaia lasi edia natudia edia kerere dainai, bona memero do idia alaia lasi, edia tamana edia kerere dainai. To tau ta ta ena kara dika davana dainai do idia alaia mase.

¹⁷“Idau taudia bona ogogami taudia do umui kota henidia mai maoromaoro danu, idia do umui hadikaia lasi. Vabu ena dabua do umui abia lasi, abiatorehai ena davana totona.

¹⁸Do umui laloa, Aigupito dekenai umui be hesiai taudia mai guia danu umui noho. Vadaeni Lohiabada emui Dirava ese umui ia hamauria. Unai dainai inai bamona oda umui dekenai lau henia.

¹⁹“Oiemu uma anina oi utua bona gogoa neganai, bema koni haida oi laloaboio, do oi giroa lou lasi, do oi abia lasi. Idau tauna o ogogami tauna o vabu ese do ia abia. Unai bamona oi karaia neganai, Lohiabada oiemu Dirava ese oi do ia hanamoa, oiemu gaukara ibounai lalonai.

²⁰“Oiemu olive audia edia huahua oi hamorudia neganai, au rigidia do oi botaia nega rua lasi. Idia moru lasi gaudia be idau tauna bona ogogami tauna bona vabu ese do idia abia.

²¹“Oiemu vain uma ena anina do oi gogoa neganai, tano dekenai idia moru gaudia totona do oi giroa lou lasi. Idia be idau taudia, bona ogogami taudia, bona vabu ese do idia gogoa.

²²Do umui laloa, Aigupito dekenai umui be hesiai taudia mai guia danu. Unai dainai inai bamona oda umui dekenai lau henia.