Read Buka Helaga (Hiri Motu) 1993 DEUTERONOMI 5 Bible Online

DEUTERONOMI 5 - Buka Helaga (Hiri Motu) 1993 bible

DEUTERONOMI 5

¹Mose ese Israela taudia ibounai ia boiria hebou, ia haroro henia, ia gwau, “Israela taudia e, umui kamonai! Inai taravatu bona oda, hari dina do lau gwauraia, be do umui kamonai namonamo. Taravatu ta ta ibounai do umui laloa namonamo, bona idia do umui badinaia momokani.

²“Lohiabada iseda Dirava ese Sinai Ororo dekenai gwauhamata taravatuna ita dekenai ia karaia.

³“Iseda tamadia sibona totona inai gwauhamata taravatuna ia henia lasi, to ita do noho taudia totona ia henia.

⁴Unuseni ororo dekenai Lohiabada ese iena vairana umui dekenai ia henia, lahi ena huanai dekena amo, bona umui dekenai ia hereva henia.

⁵“Unai neganai lau be Lohiabada bona umui emui huanai lau gini, bona Lohiabada ena hereva umui dekenai lau gwauraia. Badina be umui ese lahi dekenai umui gari dainai ororo dekenai umui daekau lasi. “Lohiabada ese ia gwau,

⁶‘Lau be Lohiabada, emui Dirava. Aigupito, hesiai mai guia danu umui karaia gabuna, dekena amo umui lau hamauria.

⁷“ ‘Idau dirava ta do umui abia lasi lauegu vairana dekenai.

⁸“ ‘Laulau ta do umui karaia lasi, guriguri henia totona kaivakuku gauna ta, o gau ta ena laulau, guba gauna ta, o tanobada gauna ta, o ranu lalonai gauna ta.

⁹“ ‘Laulau o kaivakuku ta dekenai do umui tomadiho henia lasi, bona do umui guriguri henia lasi. Badina be lau Lohiabada, emui Dirava be lau ura umui be lau sibona egu. Idia ura henia lasi lau dekenai taudia edia kara dika ena davana be do lau henia edia natuna bona tubuna dekenai, ia lao bona uru toi o hani.

¹⁰To lau dekenai idia lalokau henia taudia bona egu taravatu idia badinaia taudia do lau lalokau henia. Bona edia tubuna taudia momo herea danu do lau lalokau henia.

¹¹“ ‘Lohiabada emui Dirava ena ladana be do umui gwauraia kava, gwauraia kava lasi, badina be egu ladana do ia gwauraia kava tauna ena davana do lau henia.

¹²“ ‘Sabati Dina do umui laloatao, bona do umui hahelagaia, Lohiabada emui Dirava ese umui ia oda henia vadaeni hegeregerena.

¹³Dina 6 edia lalonai emui gaukara ibounai do umui karaia.

¹⁴To dina namba 7 be Sabati Dina helagana, Lohiabada emui Dirava ena. Unai dina dekenai do umui gaukara lasi, umui o emui natuna, o emui hesiai tauna, o emui hesiai hahine, o emui boromakau, o emui doniki, o emui ubua gauna ta, o idau tauna emui hanua dekenai ia noho. Badina emui hesiai tauna bona emui hesiai hahine be do idia laga-ani danu, umui ese umui laga-ani hegeregerena.

¹⁵Do umui laloaboio lasi, umui be hesiai taudia mai guia danu Aigupito tano dekenai, bona Lohiabada emui Dirava, ese mai ena siahu bada bona goada danu umui ia hamauria. Unai dainai Lohiabada emui Dirava ese umui ia oda henia, Sabati Dina do umui badinaia.

¹⁶“ ‘Emui tamana bona sinana dekenai do umui matauraia, Lohiabada emui Dirava ese umui ia oda henia vadaeni hegeregerena. Unai dekena amo emui mauri nega do ia daudau, bona emui noho be do ia namo, Lohiabada, oiemu Dirava, ese umui dekenai ia henia tano dekenai.

¹⁷“ ‘Taunimanima do umui alaia lasi.

¹⁸“ ‘Umui heudahanai lasi.

¹⁹“ ‘Umui henaoa lasi.

²⁰“ ‘Taunimanima ta dekenai umui samania koikoi lasi.

²¹“ ‘Tau ta ena adavana totona do umui mama henia lasi. Iena ruma o iena tano totona do umui mama henia lasi, o iena hesiai tauna, o iena hesiai hahine, o iena boromakau, o iena doniki, o iena kohu ta dainai do umui mama henia lasi.’

²²“Inai Taravatu be Lohiabada ese umui ibounai dekenai ia henia, ororo dekenai umui haboua neganai. Lahi ena huanai dekena amo, bona ori bona dibura dekena amo Lohiabada ese mai boiboi bada danu umui dekenai inai Taravatu ia gwauraia. Taravatu haida ma ia henia lasi. Unai neganai unai Taravatu be nadi palaka rua dekenai Lohiabada ese ia torea, vadaeni lau dekenai ia henia.

²³“Umui ese dibura ena huanai dekena amo unai boiboi bada umui kamonai, bona ororo umui itaia, lahi ese ia gabua, unai neganai lau dekenai umui raka kahirakahira, emui iduhu lohia taudia bona tau badadia ibounai.

²⁴Bona idia gwau, ‘Lohiabada iseda Dirava ese iena hairaina bona iena siahu be ita dekenai ia hedinaraia, iena gadona danu lahi ena huanai dekena amo ita kamonai vadaeni! Hari dina ita diba vadaeni, Dirava ese taunimanima dekenai ia hereva vadaeni, bona unai taunimanima be do mauri noho.

²⁵To edena bamona ita mauri diba? Bema Lohiabada iseda Dirava ese ita dekenai ia hereva lou, ita be do ita mase momokani. Lahi badana ese ita do ia gabua mase.

²⁶“ ‘Badina be taunimanima ta ese mauri Dirava ena gadona lahi dekena amo ia kamonai vadaeni, ita kamonai hegeregerena, bona ia be do mauri noho, a?

²⁷Mose e, do oi raka lao kahirakahira, bona Lohiabada iseda Dirava ena hereva ibounai do oi kamonai. Unai murinai do oi giroa mai, bona ia ese oi dekenai ia hadibaia hereva be ai dekenai do oi hamaoroa. Ai be do ai kamonai, bona ai ese ia ura kara do ai karaia.’

²⁸“Lohiabada ese emui hereva lau dekenai ia kamonai. Vadaeni Lohiabada ese lau ia hamaoroa, ia gwau, ‘Lau ese inai taudia edia hereva lau kamonai, bona edia hereva ibounai be maoro.

²⁹Nega ibounai unai bamona bema idia laloa be namo, bona bema lau dekenai idia matauraia, bona egu Taravatu bema idia kamonai henia, edia noho be do ia namo, bona edia natudia bona tubudia danu edia noho be do namo ela bona hanaihanai.

³⁰“ ‘Do oi lao, idia do oi oda henia, edia palai rumadia dekenai do idia lao lou.

³¹To oi, Mose e, lauegu badibadinai do oi gini, bona egu Taravatu bona oda ibounai be oi dekenai do lau henia. Inai hereva ibounai Israela taudia dekenai do oi hadibaia, vadaeni idia ese do idia kamonai henidia, lau ese do lau henidia tano dekenai idia noho neganai.’

³²“Unai dainai Israela taudia e, do umui naria namonamo, Lohiabada emui Dirava ena Taravatu ibounai do umui badinaia. Idia dekena amo do umui raka siri lasi, idiba kahana dekenai o lauri kahana dekenai.

³³Lohiabada emui Dirava ese umui dekenai ia oda dalana dekenai do umui raka, vadaeni do umui mauri, bona emui noho be do ia namo, bona emui mauri dinadia be do idia momo, do umui abia bona noho tano dekenai.”