Read Buka Helaga (Hiri Motu) 1993 IOANE 1 Bible Online

IOANE 1 - Buka Helaga (Hiri Motu) 1993 bible

IOANE 1

¹Matamaia neganai Hereva ia noho. Hereva be Dirava danu ia noho, bona unai Hereva be Dirava.

²Hereva be matamaia neganai Dirava danu ia noho.

³Gau ibounai be Dirava ese ia karaia inai Hereva dekena amo. Gau ta be idau dala dekenai ia vara lasi, badina idia karaia gaudia ibounai be unai Hereva ese ia karaia.

⁴Mauri be Hereva ena lalona dekenai ia noho, bona unai mauri ese diari ia mailaia taunimanima dekenai.

⁵Diari be dibura lalonai ia hedinaraia, bona dibura ese ia habodoa diba lasi.

⁶Tau ta ia vara, Dirava ese ia siaia, iena ladana be Ioane.

⁷Ia be hereva momokani do ia gwauraia, bona Diari do ia hedinaraia totona ia mai, taunimanima ibounai ese iena hereva do idia kamonai, bona Diari do idia abidadama henia totona.

⁸Ia be unai Diari lasi, to Diari herevalaia totona ia mai.

⁹Inai be Diari momokani, taunimanima ibounai hadiaria totona ia mai tanobada dekenai.

¹⁰Hereva be tanobada dekenai ia noho, bona inai Hereva dekena amo Dirava ese tanobada ia karaia. To tanobada be ia diba lasi ia.

¹¹Iena tano korikori dekenai ia mai, to iena bese taudia ese idia abia dae lasi ia.

¹²To taunimanima haida ese ia dekenai idia abidadama henia. Vadaeni inai ia dekenai idia abia dae taudia dekenai siahu ia henia, idia be Dirava ena natudia idia lao totona.

¹³Dirava ena natuna idia vara, be headava ena kara dekena amo idia vara bamona lasi, idia be tanobada tamana dekena amo idia vara lasi. Dirava sibona be idia edia Tamana.

¹⁴Inai Hereva be taunimanima ena tauanina dekenai ia halaoa, bona iseda huanai ia noho. Iena hairai danu ita itaia. Inai hairai be Dirava ese ia henia, badina ia be Dirava ena Natuna tamona sibona. Bogahisihisi kara bona hereva momokani dekenai ia honu momokani.

¹⁵Ioane ese inai Hereva ia herevalaia, ia boiboi, ia gwau, “Lau herevalaia tauna be inai, lau gwau, ‘Lauegu murina dekenai do ia mai tauna be ia bada, to lau be maragi. Badina lau be do lau vara lasi neganai, ia be guna ia noho vadaeni.’ ”

¹⁶Inai Hereva ese iena bogahisihisi dekena amo, ita ibounai ia hanamoa vadaeni. Ia ese hariharibada, bona ma hariharibada ia henia vadaeni ita dekenai.

¹⁷Badina be Dirava ese Mose dekena amo taravatu ia henia, to hariharibada bona kara momokani be Iesu Keriso ese ia mailaia vadaeni.

¹⁸Matamaia neganai ia mai bona harihari tau ta ese Dirava ia itaia lasi. To iena Natuna tamona sibona, Tamana dekenai momokani ia noho Tauna, ia ese Dirava ena toana ita dekenai ia hedinaraia vadaeni.

¹⁹Iuda taudia ese hahelagaia taudia bona Levi orea taudia haida Ierusalema dekena amo idia siaia, Ioane do idia nanadaia totona. Idia nanadaia, idia gwau, “Oi be daika?”

²⁰Vadaeni Ioane ese hereva ia hunia lasi, ia haere momokani, ia gwau, “Lau be Keriso lasi.”

²¹Ma idia nanadaia, idia gwau, “Sedira, oi be Elia, a?” Ia gwau, “Lau be Elia lasi.” Ma idia gwau, “Ai naria noho Peroveta Tauna be oi, a?” Ia haere, ia gwau, “Lasi.”

²²Vadaeni idia ese idia nanadaia lou, idia gwau, “Oi be daika? Oiemu haere be ai idia siaia mai taudia dekenai do ai hamaoroa. Oi sibona oiemu sivarai be mani oi gwauraia.”

²³Vadaeni Ioane ese sibona ena sivarai ia gwauraia, ia gwau, “Lau be, Gado ta taunimanima idia noho lasi tano dekenai ia boiboi noho, ia gwau: Lohiabada ena dala umui karaia hegaegae.” Inai be Isaia, peroveta tauna, ena hereva hegeregerena.

²⁴Inai Farisea idia siaidia taudia ese ma idia nanadaia lou.

²⁵Idia gwau, “Bema oi be Keriso lasi, Elia lasi, bona unai ai naria noho Peroveta Tauna lasi, badina dahaka bapatiso oi karaia noho?”

²⁶Ioane ia haere, ia gwau, “Lau be ranu dekenai bapatiso lau henia, to umui emui huanai, umui diba lasi tauna ta ia gini noho.

²⁷Ia be lauegu murinai do ia mai, bona lau be hegeregere lasi iena tamaka varona do lau ruhaia.”

²⁸Inai kara be Betania, Ioridane Sinavai unai kahana dekenai ia vara. Ioane be unuseni ia bapatiso karaia.

²⁹Kerukeru dabai Ioane ese Iesu ia itaia, ia dekenai ia raka mai, vadaeni ia gwau, “Itaia, Dirava ena Mamoe Natuna ia mai inai, ia be tanobada ena dika kokia tauna.

³⁰Guna lau gwauraia tauna be inai. Lau gwau, ‘Tau ta be lauegu murinai do ia mai, lau be maragi, to ia be bada, badina lau do lau vara lasi neganai, ia be ia mauri noho.’

³¹Lau be lau diba lasi ia, to inai tau Israela dekenai do ia hedinaraia totona, taunimanima lau bapatiso henidia ranu dekenai.”

³²Ioane ese iena hereva ma ia gwauraia hedinarai, ia gwau, “Lauma Helaga lau itaia vadaeni, guba dekena amo ia diho, pune manu bamona, ia latanai ia kamokau.

³³Lau be lau diba lasi ia, to Dirava ese ranu dekenai bapatiso karaia totona lau ia siaia. Unai neganai Dirava ese lau ia hadibaia, ia gwau, ‘Tauna be oi ese do oi itaia, Lauma Helaga be do ia diho, bona iena latanai do ia kamokau. Inai tauna ese Lauma Helaga dekena amo taunimanima do ia bapatiso henidia.’ ”

³⁴Ma Ioane ia gwau, “Lau ese lau itaia vadaeni, bona umui dekenai lau gwauraia hedinaraia inai, ia be Dirava ena Natuna.”

³⁵Kerukeru dabai Ioane mai ena diba tahua taudia rua danu unuseni idia gini lou.

³⁶Iesu ia raka hanaia neganai idia itaia, vadaeni Ioane ia gwau, “Umui itaia, Dirava ena Mamoe Natuna be inai.”

³⁷Inai diba tahua taudia ruaosi ese iena hereva idia kamonai, vadaeni Iesu ena murinai idia lao.

³⁸Iesu ese iena vairana ia giroa, iena murinai idia raka taudia ruaosi ia itaia, vadaeni idia ia nanadaia, ia gwau, “Dahaka umui tahua?” Idia haere, idia gwau, “Rabi e, oi be edeseni oi noho?” Rabi ena anina be “Hadibaia Tauna.”

³⁹Ia gwau, “Umui mai itaia.” Vadaeni idia lao, iena noho gabuna idia itaia, bona unai dina ia dekenai idia noho. Unai nega be adorahi, 4 okaloka bamona.

⁴⁰Unai tau ruaosi, Ioane ena hereva dainai, Iesu ena murinai idia raka lao, edia tau ta be Andrea. Ia be Simona Petero ena tadina.

⁴¹Andrea ese karaharaga iena kakana korikori Simona ia davaria, vadaeni ia hamaoroa, ia gwau, “Ai be Mesia ai davaria vadaeni.” Mesia ena anina be Keriso.

⁴²Vadaeni ia ese Simona ia hakaua lao Iesu dekenai. Iesu ese ia itaia, vadaeni ia gwau, “Oi be Simona, Iona ena natuna. To oiemu ladana be do idia gwauraia Kepa.” Kepa be Petero hegeregerena, anina be “nadi.”

⁴³Kerukeru dabai, Iesu ia ura Galilea dekenai ia lao gwauraia, vadaeni Filipo ia davaria, ia dekenai ia hereva, ia gwau, “Lauegu murinai oi raka mai.”

⁴⁴Filipo be Betesaida tauna, Andrea bona Petero edia hanua tauna.

⁴⁵Filipo ia lao, Natanaela ia davaria, ia hamaoroa, ia gwau, “Mose ena taravatu lalonai bona peroveta taudia edia buka lalonai idia herevalaia tauna ai davaria vadaeni. Ia be Iesu, Nasareta tauna, Iosepa ena natuna.”

⁴⁶Natanaela ia gwau, “Nasareta dekena amo gau namona ta do ia mai diba, a?” Filipo ia gwau, “Oi mai itaia.”

⁴⁷Iesu ese Natanaela ia itaia, ia dekenai ia mai noho, vadaeni ia herevalaia, ia gwau, “Israela tauna korikori be inai, ia be koikoi diba lasi momokani tauna!”

⁴⁸Natanaela ese ia dekenai ia hereva, ia gwau, “Edena bamona oi diba lau?” Iesu ia haere, ia gwau, “Filipo ese oi do ia boiria lasi, fig au henunai oi noho neganai, lau itaia oi.”

⁴⁹Natanaela ia haere, ia gwau, “Rabi e, oi be Dirava ena Natuna, oi be Israela ena King!”

⁵⁰Iesu ma ia hereva ia dekenai, ia gwau, “Oi lau hamaoroa vadaeni, lau gwau, ‘Fig au henunai oi lau itaia,’ dainai lau oi abidadama henia, a? Inai kara idia hereaia karadia be do oi itaia.”

⁵¹Ma idia ia hamaoroa, ia gwau, “Momokani umui lau hamaoroa, guba do umui itaia, do ia kehoa, bona Dirava ena aneru do umui itaia, Taunimanima ena Natuna ena latanai do idia daekau, do idia diho.”