Read Buka Helaga (Hiri Motu) 1993 IOANE 10 Bible Online

IOANE 10 - Buka Helaga (Hiri Motu) 1993 bible

IOANE 10

¹“Momokani, momokani umui lau hamaoroa, mamoe edia magu ena iduara dekenai ia raka vareai lasi, to magu ena iduara ia noho lasi gabuna dekenai ia hanaia kava tauna be henaoa bona dadia tauna.

²To iduara dekena amo ia raka vareai tauna be mamoe naria tauna.

³Iduara gimaia tauna ese iduara ia kehoa unai tau ena, vadaeni mamoe ese iena gadona idia kamonai. Ia ese iena mamoe momokani edia ladana ia atoa, vadaeni ia hakaudia murimuri dekenai.

⁴Iena mamoe momokani ibounai be murimuri dekenai ia hakaudia, edia vairana dekenai ia raka, vadaeni iena gadona idia diba dainai, iena murina dekenai idia raka.

⁵To idau tauna ena murina dekenai do idia raka lasi, lasi momokani. Ia dekena amo do idia heau siri, badina be idau taudia edia gadona idia diba lasi.”

⁶Inai parabole be Iesu ese ia gwauraia idia dekenai, to iena hereva ena anina idia diba lasi.

⁷Iesu ma ia hereva lou idia dekenai, ia gwau, “Momokani, momokani umui lau hamaoroa, lau be mamoe edia iduara.

⁸Guna idia mai taudia ibounai be henaoa bona dadia taudia, vadaeni mamoe ese edia hereva dekenai idia kamonai lasi.

⁹Iduara be lau inai. Lau dekena amo do ia raka vareai tauna be do ia mauri, ia be do ia raka vareai, do ia raka murimuri dekenai, aniani do ia davaria.

¹⁰Henaoa tauna ena mai badina be henaoa, bona alaia, bona hadikaia ore totona. Lau mai vadaeni, mauri do idia abia, mauri mai anina momokani danu, do idia abia totona.

¹¹“Lau be mamoe naria tauna namona inai. Mamoe naria tauna namona ese iena mauri ia atoa diho mamoe totona.

¹²Gaukara tauna mai ena davana be mamoe naria tauna lasi, bona mamoe edia biaguna lasi. Uda sisia ia itaia idia mai neganai, ia ese iena mamoe dekena amo ia heau siri. Vadaeni uda sisia ese mamoe ia koria, bona idia heau lao gabu idauidau dekenai.

¹³Ia heau, badina ia be gaukara tauna mai ena davana, mamoe dekenai ia laloa lasi.

¹⁴“Lau be mamoe naria tauna namona. Lauegu mamoe be lau diba. Lauegu mamoe danu idia diba lau.

¹⁵Inai bamona danu, lauegu Tamana ia diba lau, bona lau diba ia. Egu mauri danu lau atoa diho, mamoe totona.

¹⁶Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.

¹⁷“Inai dainai egu Tamana ese lau ia lalokau henia, badina be egu mauri lau atoa diho, do lau abia lou totona.

¹⁸Tau ta ese lauegu mauri ia kokia lasi, lau sibona lau atoa diho. Lau be mai siahu do lau atoa diho, bona mai egu siahu do lau abia lou. Inai bamona siahu be egu Tamana dekena amo lau abia vadaeni.”

¹⁹Iuda taudia ese inai hereva idia kamonai neganai, edia orea ma idia parara lou.

²⁰Taunimanima momo idia gwau, “Ia be mai ena lauma dikana danu, ia kavakava. Dahaka dainai umui kamonai henia ia dekenai?”

²¹Ma haida idia gwau, “Unai hereva be lauma dika ese ia abia tauna ena hereva lasi. Lauma dika ese matakepulu taudia edia matana ia kehoa diba, a?”

²²Unai neganai Dubu Helaga Hagoevaia ena aria dinana ia ginidae vadaeni Ierusalema dekenai. Unai be keru ena nega.

²³Iesu be Dubu Helaga lalonai ia raka, Solomona ena dehe dekenai.

²⁴Vadaeni Iuda taudia ese idia gini hagegea Iesu dekenai, idia nanadaia, idia gwau, “Oi totona do ai laloa daradara noho, ia lao bona edena negai? Oi be Keriso o lasi? Mani oi hamaoroa momokani ai dekenai.”

²⁵Iesu ia haere idia dekenai, ia gwau, “Umui lau hamaoroa vadaeni, to egu hereva umui abidadama henia lasi. Lauegu Tamana ena ladana dekenai lau karaia gaudia ese lau idia hedinaraia.

²⁶To umui abidadama henia lasi lau dekenai, badina umui be lauegu mamoe lasi.

²⁷Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka.

²⁸Mauri hanaihanai danu lau henia idia dekenai, idia be do idia mase lasi, lasi bona lasi momokani. Bona tau ta ese lauegu imana dekena amo idia do ia kokia lasi.

²⁹Idia be lauegu Tamana ese lau dekenai ia henia vadaeni. Lauegu Tamana ena goada ese ibounai edia goada ia hereaia. Unai dainai tau ta ia hegeregere lasi idia do ia kokia lauegu Tamana dekena amo.

³⁰Lau bona egu Tamana, ai be tamona.”

³¹Vadaeni Iuda taudia ese nadi idia abia isi, idia hodoa gwauraia.

³²Iesu ia gwau, “Kara namodia momo Tamana dekena amo umui dekenai lau hedinaraia vadaeni. Edena kara totona do umui hodoa lau?”

³³Iuda taudia idia gwau, “Kara namona ta totona do ai hodoa lasi oi, to Dirava ena ladana oi hadikaia dainai, badina oi be taunimanima sibona, to oi sibona be Dirava oi halaoa!”

³⁴Iesu ia gwau, “Umui emui taravatu dekenai inai bamona ia torea, ani: ‘Lau gwau, umui be dirava?’

³⁵Buka Helaga ena hereva ta be ia gwau, Dirava ena hereva idia abia dae taudia be Dirava ese ia gwauraia, idia be dirava. Inai be momokani, badina Buka Helaga ena hereva ia senisi diba lasi.

³⁶Dirava ese lau ia abia hidi, bona lau ia siaia tanobada dekenai. Ia siaia tauna be umui gwau henia, umui gwau, ‘Oi be Dirava ena ladana oi hadikaia,’ badina be lau gwau, ‘Lau be Dirava ena Natuna,’ a?

³⁷Bema egu Tamana ena kara lau karaia lasi, lau do umui abidadama henia lasi be namo.

³⁸To iena kara be lau karaia noho. Bema lau umui abidadama henia lasi, namona be lau karaia gaudia do umui abidadama henia, vadaeni emui lalona be do idia kehoa, bona do umui diba lauegu Tamana be lauegu lalona dekenai ia noho, lau danu be egu Tamana ena lalona dekenai lau noho.”

³⁹Vadaeni idia ese ma idia dogoatao lou gwauraia, to edia imana dekena amo ia raka siri.

⁴⁰Iesu be Ioridane Sinavai unai kahana dekenai. Unuseni ia giroa lao, gunaguna Ioane ese ia bapatiso karaia gabuna dekenai ia noho.

⁴¹Taunimanima momo be ia dekenai idia lao. Idia gwau, “Ioane ese toa ta ia karaia lasi, to Ioane ese inai tau ia herevalaia gaudia ibounai be momokani vadaeni.”

⁴²Vadaeni taunimanima momo ese unai gabu dekenai Iesu idia abidadama henia.