Read Buka Helaga (Hiri Motu) 1993 IOANE 12 Bible Online

IOANE 12 - Buka Helaga (Hiri Motu) 1993 bible

IOANE 12

¹Dina 6 do idia noho ia lao bona Pasova ena aria do idia karaia, vadaeni Iesu ia lao Betania. Lasaro, vanegai Iesu ese mase dekena amo ia hatorea isi tauna, ena hanua be unai.

²Iesu ena aniani idia karaia, Mareta ese edia hesiai gaukara ia karaia, vadaeni Lasaro bona taunimanima haida be Iesu danu idia aniani hebou.

³Maria ese dehoro mai bonana namona ia abia, davana bada gauna, ena metau be kilogram ta bamona, vadaeni ia lao, Iesu ena aena ruaosi dekenai ia bubua, vadaeni iena huina dekena amo ia dahua kaukau. Ruma be unai dehoro bonana namona dekenai ia honu.

⁴To Iuda Iskariote, diba tahua tauna ta, Iesu ena mase dala do ia karaia tauna, ia gwau,

⁵“Badina dahaka inai dehoro be ia hoia lasi? 300 kina do ia abia, ogogami taudia dekenai do idia harihari henia.”

⁶Unai bamona ia hereva, be ogogami taudia dekenai ia bogahisihisi lasi, badina ia be henaoa tauna, ia be moni ena maua ia naria, bona idia udaia moni be ia ese ia henaoa.

⁷To Iesu ia gwau, “Inai hahine umui koua lasi, dehoro ia abia hegaegae noho vadaeni, lau do idia guria dinana totona.

⁸Ogogami taudia be nega ibounai umui dekenai idia noho, to lau be nega ibounai umui dekenai do lau noho lasi.”

⁹Iuda taudia momo herea idia kamonai Iesu be unuseni, vadaeni unai gabu dekenai idia lao, Iesu sibona totona lasi, to Lasaro, Iesu ese mase dekena amo ia hatorea isi tauna, itaia totona.

¹⁰Unai dainai dubu biagudia idia hereva hebou, Lasaro danu do idia alaia, idia gwau.

¹¹Badina be Lasaro totona Iuda taudia momo idia raka siri, Iesu dekenai idia abidadama henia.

¹²Dabai, aria totona idia haboua Iuda taudia momo herea idia kamonai vadaeni Iesu be Ierusalema dekenai do ia daekau.

¹³Vadaeni pama au rauraudia idia abia, Iesu ena vairana dekenai idia lao, idia boiboi, idia gwau, “Hosana! Lohiabada ena ladana dekenai ia mai tauna ita hanamoa! Ia be Israela ena King!”

¹⁴Vadaeni Iesu ese doniki ena natuna ta ia davaria, bona iena doruna dekenai ia helai, Buka Helaga dekenai ia torea hegeregerena, ia gwau,

¹⁵“Siona hanua ena natuna kekeni e, oi gari lasi. Oi itaia, oiemu King ia mai noho. Doniki ena natuna latanai ia helai noho.”

¹⁶Iena diba tahua taudia be unai hereva ena anina idia diba lasi unai neganai, to Iesu ese iena hairaina ia abia murinai idia laloa vadaeni, idia gwau, “Inai bamona hereva be guna idia torea vadaeni Buka Helaga lalonai Iesu totona, bona idia vara momokani.”

¹⁷Taunimanima momo be Iesu danu idia noho, ia ese Lasaro guria gabu dekena amo ia boiria murimuri dekenai, bona mase dekena amo ia hatorea isi neganai. Vadaeni idia ese iena sivarai idia gwauraia loaloa.

¹⁸Unai dainai taunimanima momo be Iesu ena vairana dekenai idia lao, badina be idia kamonai vadaeni ia ese unai hoa kara ia karaia.

¹⁹Vadaeni Farisea taudia idia sibona idia hereva henia, idia gwau, “Umui itaia, umui be umui lusi vadaeni, tanobada ibounai be iena murina dekenai idia raka vadaeni.”

²⁰Aria neganai tomadiho totona idia daekau taudia haida be Helene taudia.

²¹Idia be Filipo, Betesaida Galilea tauna, dekenai idia lao, idia hamaoroa, idia gwau, “Tau badana e, ai ura be Iesu ai itaia.”

²²Filipo ia lao, Andrea ia hamaoroa, vadaeni Andrea be Filipo danu idia lao, Iesu idia hamaoroa.

²³Vadaeni Iesu ia haere idia dekenai, ia gwau, “Nega ia ginidae vadaeni, Taunimanima ena Natuna ese iena hairaina do ia abia.

²⁴Momokani, momokani umui lau hamaoroa, bema uiti ena uhena be tano dekenai do ia moru lasi, bema ia mase lasi, ia be sibona do ia noho kava. To bema ia mase, anina momo do ia atoa.

²⁵Iena mauri ia ura dogoatao tauna ese mauri do ia halusia, to iena mauri inai tanobada dekenai ia laloa lasi tauna be mauri do ia abia, ia lao bona hanaihanai.

²⁶Tau ta bema ia ura lauegu hesiai gaukara do ia karaia, ia ese lauegu murina dekenai do ia raka. Vadaeni do lau noho gabuna dekenai, egu hesiai tauna danu do ia noho. Bema tau ta ese lauegu hesiai gaukara do ia karaia, egu Tamana ese do ia hanamoa.”

²⁷“Harihari lauegu kudouna ia hisihisi. Dahaka do lau gwauraia? Do lau gwau, ‘Egu Tamana e, inai harihari nega dekena amo lau oi hamauria?’ Lasi, badina be hari inai nega totona lau mai ginidae vadaeni.

²⁸Egu Tamana e, oiemu ladana oi hanamoa!” Vadaeni gado ta guba dekena amo ia mai, ia gwau, “Lau hanamoa vadaeni, ma do lau hanamoa lou.”

²⁹Vadaeni taunimanima momo unuseni idia gini, be hereva idia kamonai, vadaeni idia gwau, “Guba ia boiboi.” Ma haida idia gwau, “Aneru ta ese ia hereva henia noho!”

³⁰Iesu ese ma ia hereva henia idia dekenai, ia gwau, “Unai gado be lau totona lasi, to umui totona ia mai.

³¹Harihari inai tanobada taudia be Dirava ese ia kota henia, harihari ia ese inai tanobada ena lohia do ia lulua murimuri dekenai.

³²Tanobada dekenai lau do idia abia isi neganai, taunimanima ibounai be lau dekenai do lau veria.”

³³Ia be unai bamona ia hereva, iena mase dalana ia hedinaraia totona.

³⁴Vadaeni taunimanima momo idia haere ia dekenai, idia gwau, “Ai be Dirava ena taravatu hereva dekena amo ai kamonai vadaeni, Keriso be do ia noho hanaihanai. Badina dahaka oi gwau Taunimanima ena Natuna be do idia abia isi? Inai Taunimanima ena Natuna be daika?”

³⁵Iesu ia gwau, “Nega sisina diari be do ia noho umui dekenai. Do umui raka namonamo, diari umui abia noho neganai, dibura ese umui do ia koua garina. Dibura lalonai ia raka tauna ia lao henia gabuna ia diba lasi.

³⁶Diari umui abia noho neganai, diari dekenai do umui abidadama henia, ia ese diari taudia umui do ia halaoa totona.” Iesu be unai bamona ia hereva, vadaeni ia raka siri, idia dekena amo sibona ia hunia.

³⁷Iesu ese hoa kara momo edia vairana dekenai ia karaia, to idia be idia abidadama henia lasi ia dekenai.

³⁸Unai dainai, Isaia, peroveta tauna, ena hereva ia momokani vadaeni, ia gwau, “Lohiabada e, daika ese aiemai hereva ia abia dae? Bona Lohiabada ena imana be daika dekenai ia hedinaraia?”

³⁹Unai dainai idia ese idia abidadama henia lasi, badina be Isaia ma ia gwau,

⁴⁰“Dirava ese edia matana ia hakepulua vadaeni. Edia lalona danu ia hadiburaia. Edia matana dekena amo do idia itaia garina, bona edia lalona dekena amo do idia diba garina, vadaeni edia lalona do idia giroa, bona Dirava ese idia do ia hamauria garina.”

⁴¹Isaia be unai bamona Iesu ia herevalaia, badina be ia ese Keriso ena hairaina ia itaia guna vadaeni.

⁴²Unai neganai hanua lohia taudia momo ese idia abidadama henia Iesu, to idia gwauraia hedinarai lasi, Farisea taudia dekenai idia gari dainai, dubu dekena amo do idia luludia garina.

⁴³Badina be taunimanima edia hanamoa dekenai idia ura henia bada, Dirava ena hanamoa dekenai idia ura henia maragi.

⁴⁴Iesu ia boiboi, ia gwau, “Lau dekenai ia abidadama henia tauna ese lau sibona lasi, to lau ia siaia Diravana danu ia abidadama henia.

⁴⁵Bona lau ia itaia tauna ese lau ia siaia Diravana danu ia itaia.

⁴⁶Lau be tanobada dekenai lau mai vadaeni, diari bamona. Unai dainai lau idia abidadama henia taudia ibounai be dibura lalonai do idia noho lasi.

⁴⁷Tau ta ese egu hereva do ia kamonai, to do ia badinaia lasi, lau be do lau kota henia lasi, badina lau be tanobada hamauria totona lau mai.

⁴⁸Lau ia ura henia lasi, bona lauegu hereva ia abia dae lasi tauna, be mai ena kota henia tauna ia noho. Lau gwauraia herevadia ese do idia kota henia, dokona dina dekenai.

⁴⁹Badina be lau sibona egu siahu dekenai hereva lau gwauraia lasi, to lauegu Tamana, lau ia siaia Diravana, ese ia hereva lau dekenai dahaka hereva dahaka hereva do lau gwauraia, bona edena bamona do lau hereva.

⁵⁰Lau diba danu lauegu Tamana ena hereva ese mauri hanaihanai idia mailaia. Unai dainai, lauegu hereva, be lauegu Tamana ese ia henia lau dekenai hegeregerena, lau gwauraia noho.”