Read Buka Helaga (Hiri Motu) 1993 IOANE 15 Bible Online

IOANE 15 - Buka Helaga (Hiri Motu) 1993 bible

IOANE 15

¹“Lau be vain korikori, egu Tamana be vain edia uma gabu naria tauna.

²Lauegu rigi ibounai bema huahua idia atoa lasi, be egu Tamana ese ia kokia. Mai huahua rigi ibounai be ia ese ia utua kwadogi, do idia goeva, bona huahua momo do idia atoa totona.

³Umui be umui goeva, umui dekenai lau henia herevadia dainai.

⁴Lauegu lalona dekenai do umui noho, lau danu umui emui lalona dekenai do lau noho. Rigi be sibona huahua do ia atoa lasi, to bema vain auna do ia badinaia, be huahua do ia atoa. Vadaeni unai bamona bema umui badinaia lasi lau dekenai, umui emui huahua do ia atoa lasi.

⁵“Vain be lau, ena rigi be umui. Lau dekenai ia badinaia, bona ia dekenai lau badinaia tauna be iena huahua momo ia atoa, badina be lau dekenai bema umui badinaia lasi, umui be gau ta do umui karaia diba lasi.

⁶Tau ta bema lau ia badinaia lasi, be do idia nega momokani, rigi bamona, vadaeni do ia kakoro. Rigi unai bamona be do idia haboua, lahi dekenai do idia negea daekau, do idia araia ore.

⁷“Bema lau do umui badinaia, bona egu hereva be emui lalona dekenai idia noho neganai, emui ura gaudia dekenai do umui noinoi, vadaeni unai gaudia do umui abia.

⁸Bema huahua momo do umui atoa neganai, egu Tamana be taunimanima ese do idia hanamoa. Unai dekena amo lauegu diba tahua taudia korikori do umui lao.

⁹Egu Tamana ese lau ia lalokau henia hegeregerena, lau danu umui lau lalokau henia. Egu lalokau dekenai do umui noho hanaihanai.

¹⁰Bema umui ese lauegu taravatu do umui badinaia, vadaeni egu lalokau dekenai do umui noho, lau hegeregerena, egu Tamana ena taravatu lau badinaia, vadaeni iena lalokau dekenai lau noho.

¹¹“Inai bamona lau hereva vadaeni umui dekenai, lauegu moale be umui emui lalona dekenai do ia noho totona, vadaeni umui emui moale be do ia momokani.

¹²“Lauegu taravatu be inai, umui ta ta umui lalokau henia, lau ese umui lau lalokau henia hegeregerena.

¹³Lalokau namo herea momokani be inai, tau ta ese ena mauri do ia atoa diho, iena turana totona.

¹⁴Lauegu taravatu do umui badinaia, unai dekena amo lauegu turana do umui lao.

¹⁵Harihari ia lao, umui be hesiai taudia do lau gwauraia lasi, badina hesiai tauna be iena biaguna ena kara ia diba lasi. To umui be lauegu turana do lau gwauraia, badina be lauegu Tamana dekena amo lau kamonai herevadia ibounai umui dekenai lau hamaoroa vadaeni.

¹⁶“Umui ese lau umui abia hidi lasi. Lau ese umui lau abia hidi, bona emui gaukara lau henia umui dekenai, vadaeni do umui lao, emui huahua do idia atoa, do idia noho hanaihanai. Unai dekena amo lauegu ladana dekenai Tamana do umui noia gaudia ibounai, be ia ese do ia henia umui dekenai.

¹⁷Lauegu taravatu be inai: Umui ta ta do umui lalokau henia.

¹⁸“Tanobada taudia ese umui do idia badu henia, to umui diba vadaeni, idia ese lau dekenai idia badu henia guna vadaeni.

¹⁹Bema umui be tanobada ena taudia momokani neganai, tanobada taudia ese umui do idia lalokau henia. To umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia.

²⁰Umui dekenai lau hamaoroa herevana do umui laloatao: Hesiai tauna ese iena biaguna ia hereaia lasi. Bema idia ese lau dekenai idia dagedage henia, umui dekenai danu do idia dagedage henia. Bema lauegu hereva idia badinaia, umui emui hereva danu do idia badinaia.

²¹To inai kara ibounai do idia karaia umui dekenai umui be lauegu dainai, badina be lau ia siaia Diravana be idia diba lasi.

²²“Bema lau mai lasi, bona bema lau hereva henia lasi idia dekenai, idia be do idia kerere lasi, to harihari idia edia kerere be ia noho, bona idia be hereva dalana lasi.

²³Lau dekenai ia badu henia tauna ese lauegu Tamana dekenai danu ia badu henia.

²⁴Tau ta ese do ia karaia guna lasi hoa karadia be idia edia huanai lau karaia vadaeni. Inai kara bema lau karaia lasi, idia be do idia kerere lasi. To momokani inai kara idia itaia, bona idia ese lau bona egu Tamana danu dekenai idia badu henia vadaeni.

²⁵Unai dekena amo edia taravatu dekenai ia torea herevana ta ia momokani vadaeni, ia gwau, ‘Idia ese lau dekenai idia badu henia vadaeni, anina ta lasi.’

²⁶“To Durua Tauna be Tamana dekenai ia noho. Lau be do lau siaia mai umui dekenai. Hereva Momokani Laumana be unai, Tamana dekena amo do ia mai umui dekenai. Do ia mai neganai, ia ese lau do ia gwauraia hedinarai.

²⁷Umui danu ese lau do umui gwauraia hedinarai, badina be hamatamaia nega ia mai bona hari, umui be lau dekenai umui noho vadaeni.