Read Buka Helaga (Hiri Motu) 1993 IOANE 18 Bible Online

IOANE 18 - Buka Helaga (Hiri Motu) 1993 bible

IOANE 18

¹Iesu be unai bamona ia hereva, vadaeni iena diba tahua taudia danu idia raka murimuri dekenai, Kiderona Koura unai kahana dekenai uma gabu ta dekenai idia raka vareai.

²Iuda, Iesu ena mase dala ia karaia tauna, be unai gabu danu ia diba, badina be nega momo Iesu mai ena diba tahua taudia danu unai gabu dekenai idia lao.

³Unai dainai, Iuda ese tuari taudia, bona dubu biagudia, bona Farisea taudia edia hesiai taudia, ia hakaua, vadaeni unuseni idia lao, tosi bona lamepa bona tuari gaudia danu idia abia lao.

⁴Iesu be ia dekenai do idia vara gaudia ibounai ia diba, unai dainai Iesu be idia edia vairana dekenai ia lao, ia gwau, “Daika umui tahua?”

⁵Idia ese idia haere, idia gwau, “Iesu, Nasareta tauna.” Iesu ia gwau, “Lau inai.” Iuda danu, Iesu ena mase dala ia karaia tauna, ia danu edia huanai ia gini.

⁶Iesu unai bamona ia hereva, vadaeni idia edia dorudia dekenai tano dekenai idia moru.

⁷Iesu ese idia dekenai ma ia nanadaia lou, ia gwau, “Daika umui tahua?” Ma idia gwau, “Iesu, Nasareta tauna.”

⁸Iesu ma ia haere idia dekenai, ia gwau, “Umui lau hamaoroa vadaeni, lau inai. Umui tahua tauna be lau inai, lauegu diba tahua taudia be inai, mani do idia lao.

⁹Unai bamona ia hereva, iena hereva hamomokania totona, ia gwau, ‘Lau dekenai oi henia taudia be ta ia boio lasi.’ ”

¹⁰Simona Petero be mai ena tuari kaia, vadaeni ia veria, bona Hahelagaia Tauna Badana ena hesiai tauna ia botaia, iena taiana idiba kahana ia utua oho. Unai hesiai tauna ena ladana be Malako.

¹¹Vadaeni Iesu ese Petero ia gwau henia, ia gwau, “Tuari kaia be udaia gabuna dekenai oi udaia. Lauegu Tamana ese lau dekenai ia henia kapusi be do lau inua lasi, a?”

¹²Vadaeni tuari taudia mai edia biaguna danu, bona Iuda taudia edia hesiai taudia ese Iesu idia dogoatao, idia kwatua.

¹³Vadaeni Ana dekenai idia hakaua lao guna, badina ia be Kaiapa ena ravana, Kaiapa be Hahelagaia Tauna Badana unai lagani lalonai.

¹⁴Unai Kaiapa danu ese Iuda taudia dekenai ia hamaoroa guna vadaeni, ia gwau, “Tau tamona do ia mase taunimanima ibounai totona, umui dekenai hanamoa gauna unai.”

¹⁵Simona Petero ese Iesu ena murina dekenai ia lao, diba tahua tauna ta be ia danu. Unai diba tahua tauna be Hahelagaia Tauna Badana ese ia diba momo, vadaeni inai diba tahua tauna be Iesu danu Hahelagaia Tauna Badana ena ruma magu lalonai idia raka vareai.

¹⁶To Petero be murimuri dekenai ia gini, vadaeni inai diba tahua tauna, Hahelagaia Tauna Badana ia diba momo tauna, ia raka murimuri dekenai, magu ena iduara ia naria kekeni dekenai ia hereva henia, vadaeni ia ese Petero ia hakaua vareai.

¹⁷Vadaeni magu ena iduara naria kekeni ese Petero dekenai ia nanadaia, ia gwau, “Oi be unai Iesu ena diba tahua tauna ta, ani?” Petero ia haere, ia gwau, “Lau be lasi.”

¹⁸Gima taudia bona hesiai taudia idia keru dainai lahi idia karaia, vadaeni lahi badinai idia gini, edia kopina siahu abia totona. Petero be idia danu ia gini hebou, iena kopina siahu abia totona.

¹⁹Vadaeni Hahelagaia Tauna Badana ese Iesu ia nanadaia, iena diba tahua taudia bona iena hadibaia herevadia dekenai ia nanadaia.

²⁰Iesu ia haere ia dekenai, ia gwau, “Tanobada taudia dekenai hereva lau gwauraia hedinarai. Nega ibounai dubu lalonai bona Dubu Helaga dekenai lau hadibaia, Iuda taudia idia haboua gabudia ibounai dekenai. Lauegu hereva be lau hunia lasi.

²¹Dahaka dainai lau umui nanadaia? Egu hereva idia kamonai taudia dekenai oi nanadaia, idia be idia diba lau be edena bamona lau hadibaia.”

²²Unai bamona ia haere, vadaeni gima tauna ta ese Iesu ia botaia, ia gwau, “Hahelagaia Tauna Badana unai bamona oi haere henia, a?”

²³Iesu ese ia haere, ia gwau, “Bema lau hereva kerere, mani inai hereva kerere oi gwauraia hedinarai, to bema lau hereva maoro, dahaka dainai oi botaia lau?”

²⁴Vadaeni Ana ese mai kwatua danu Iesu ia siaia lao, Kaiapa, Hahelagaia Tauna Badana dekenai.

²⁵Simona Petero be lahi badinai do ia gini noho, iena kopina siahu abia totona. Vadaeni idia ese idia nanadaia, idia gwau, “Oi danu be Iesu ena diba tahua tauna ta, ani?” Iena hereva dekenai ma ia hunia, ia gwau, “Lau be lasi.”

²⁶To Hahelagaia Tauna Badana ena hesiai tauna ta be Petero ese iena taiana ia utua oho tauna ena varavara, ia gwau, “Iesu danu uma gabu dekenai oi lau itaia, a?”

²⁷Petero ese iena hereva dekenai Iesu ma ia hunia lou. Vadaeni nega tamona, kokoroku ia boiboi.

²⁸Idia ese Kaiapa dekena amo Iesu ma idia hakaua, gavana ena ruma dekenai idia abia lao. Daba ia rere vadaeni. Idia be gavana ena ruma lalonai idia vareai lasi, badina idia be helaga, Pasova ena aria do idia ania dainai.

²⁹Unai dainai, Pilato sibona idia dekenai ia raka murimuri dekenai, vadaeni ia gwau, “Dahaka dainai inai tau umui samania?”

³⁰Idia haere henia, idia gwau, “Bema ia be mai ena kara dika lasi, ai be do ai mailaia lasi.”

³¹Vadaeni Pilato ese ma ia hamaoroa idia dekenai, ia gwau, “Umui sibona umui abia, do umui kota henia umui emui taravatu hegeregerena.” Iuda taudia idia gwau, “Ai be siahu lasi tau ta do ai alaia mase.”

³²Unai dekena amo Iesu ena hereva ia momokani vadaeni, do ia mase dalana be ia ese ia gwauraia hedinarai guna.

³³Vadaeni Pilato be ruma badana dekenai ma ia raka vareai lou, Iesu ia boiria, ia nanadaia, ia gwau, “Oi be Iuda taudia edia King, a?”

³⁴Iesu ia haere, ia gwau, “Oi sibona unai bamona oi hereva, o haida ese unai bamona oi idia hadibaia?”

³⁵Pilato ia gwau, “Be! Lau be Iuda tauna, a? Emu bese taudia bona dubu biagudia ese lau dekenai oi idia hakaua mai. Dahaka oi karaia vadaeni?”

³⁶Iesu ma ia haere, ia gwau, “Lauegu Basileia be inai tanobada gauna lasi. Bema lauegu Basileia be inai tanobada gauna, egu hesiai taudia be do idia tuari, Iuda taudia edia imana dekena amo lau do idia hamauria. Gau tamona, lauegu Basileia be iniseni lasi.”

³⁷Pilato ia gwau, “Inai dainai, oi be king ta, a?” Iesu ia haere, ia gwau, “Inai be oi ese oi hereva lau be king. Hereva momokani gwauraia hedinarai totona lau vara, bona lau mai inai tanobada dekenai. Hereva momokani idia badinaia taudia ibounai ese lauegu hereva idia kamonai henia.”

³⁸Pilato ia gwau, “Hereva momokani be dahaka?” Unai bamona Pilato ia hereva, ma ia giroa lou murimuri dekenai, Iuda taudia dekenai ia hamaoroa, ia gwau, “Kerere ta ia dekenai lau davaria lasi.

³⁹To nega ibounai iseda kara hegeregere, Pasova ena aria neganai tau ta do lau ruhaia murimuri dekenai. Umui ura Iuda taudia umui emui King do lau ruhaia murimuri dekenai, a?”

⁴⁰Vadaeni idia ma idia boiboi, idia gwau, “Unai tau be lasi! To Baraba oi ruhaia!” Unai Baraba be henaoa tauna.