Read Buka Helaga (Hiri Motu) 1993 IOANE 9 Bible Online

IOANE 9 - Buka Helaga (Hiri Motu) 1993 bible

IOANE 9

¹Iesu ia raka lao neganai, ia ese tau ta ia itaia, iena matana ruaosi mai kepulu danu ia vara.

²Vadaeni Iesu ena diba tahua taudia ese idia nanadaia, idia gwau, “Rabi e, daika ena kara dika dainai inai tau mai matakepulu danu ia vara, ia, o iena tamana o iena sinana?”

³Iesu ia gwau, “Lasi, iena kara dika lasi, bona ena tamana o sinana edia kara dika lasi, to Dirava ena siahu ia dekena amo do ia hedinarai totona.

⁴Lau ia siaia Diravana ena kara, be dina lalonai do ita karaia. Badina be hanuaboi do ia mai neganai, tau ta do ia gaukara diba lasi.

⁵Tanobada dekenai lau noho neganai, lau be tanobada ena diari.”

⁶Unai hereva Iesu ia gwauraia, vadaeni tano dekenai ia kanudi, iena kanudi dekenai kopukopu sisina ia karaia, vadaeni matakepulu tauna ena matana ruaosi dekenai ia dahua.

⁷Vadaeni ia hamaoroa, ia gwau, “Oi lao, Siloama ena gohu dekenai do oi lao huria.” Siloama ena anina be “Siaia.” Unai dainai ia be ia lao, iena matana ia huria, vadaeni ia giroa mai, iena matana idia kehoa vadaeni.

⁸Iena badibadinai taudia, bona hanaihanai ia noinoi noho neganai idia itaia taudia ese tau haida idia henanadaia, idia gwau, “Inai be vanegai ia helai noho, ia noinoi noho, tauna, ani?”

⁹Haida idia gwau, “Tauna unai.” Ma haida idia gwau, “Lasi, inai be ia hegeregerena.” Ia sibona ia gwau, “Lau inai.”

¹⁰Vadaeni idia ese idia nanadaia, idia gwau, “Oiemu matana be edena bamona idia kehoa?”

¹¹Ia haere, ia gwau, “Tau ta, iena ladana be Iesu, ia ese kopukopu ia karaia, egu matana ruaosi dekenai ia dahua, vadaeni ia hamaoroa lau dekenai, ia gwau, ‘Oi lao, Siloama dekenai do oi lao, emu matana huria.’ Lau lao, lau huria, vadaeni egu matana idia kehoa.”

¹²Vadaeni idia ese ma idia hena-na-daia, idia gwau, “Inai tau be edeseni?” Ia gwau, “Lau diba lasi.”

¹³Idia ese iena matana idia kehoa tauna be Farisea taudia dekenai idia hakaua lao.

¹⁴Iesu ese kopukopu ia karaia, bona unai tau ena matana ia kehoa dinana be Sabati.

¹⁵Unai dainai, Farisea taudia danu idia nanadaia, “Oiemu matana be edena bamona idia kehoa?” Ia gwau, “Ia ese egu matana ruaosi kopukopu dekena amo ia dahua, lau lao huria, vadaeni egu matana idia kehoa.”

¹⁶Vadaeni Farisea taudia haida idia gwau, “Unai tau be Dirava dekena amo ia mai lasi, badina be Sabati Dina ia badinaia lasi.” To haida idia gwau, “Kara dika tauna ese toa unai bamodia be edena bamona do ia karaia?” Unai dekena amo idia edia hebou ia parara vadaeni.

¹⁷Vadaeni idia ese matakepulu tauna ma idia nanadaia lou, idia gwau, “Inai tau ese oiemu matana ruaosi ia kehoa, oi be edena bamona oi gwauraia?” Ia haere, ia gwau, “Ia be peroveta tauna.”

¹⁸Iuda taudia ese inai tau ena matana guna idia kepulu to gabeai ma idia kehoa herevana be idia abia dae lasi. Unai dainai idia ese iena tamana bona iena sinana idia boiria.

¹⁹Idia nanadaia idia dekenai, idia gwau, “Inai be umui emui natuna, a? Iena matana ruaosi mai kepulu danu ia vara umui gwau, a? To harihari iena matana be edena bamona idia kehoa?”

²⁰Vadaeni iena tamana bona sinana idia gwau, “Ai diba inai be aiemai natuna, mai matakepulu danu ia vara,

²¹to harihari iena matana edena bamona idia kehoa be ai diba lasi, iena matana ia kehoa tauna danu be ai diba lasi. To aiemai natuna do umui nanadaia, ia be tau badana vadaeni, ia sibona do ia hereva.”

²²Iena tamana bona sinana unai bamona idia hereva, badina be Iuda taudia dekenai idia gari. Badina Iuda taudia be idia hereva hebou vadaeni, tau ta bema Iesu do ia gwauraia ia be Keriso, ia be dubu dekena amo do idia lulua murimuri dekenai.

²³Unai dainai iena tamana bona sinana idia gwau, “Ia be tau badana vadaeni, do umui nanadaia.”

²⁴Vadaeni idia ese matakepulu tauna ma idia boiria lou, idia gwau, “Dirava do oi hanamoa, badina ai be ai diba vadaeni unai tau be kara dika tauna.”

²⁵Ia ese ia haere, ia gwau, “Ia be kara dika tauna o lasi lau diba lasi, gau tamona sibona lau diba, guna egu matana ruaosi idia kepulu, to harihari be lau itaia noho.”

²⁶Vadaeni idia nanadaia lou, idia gwau, “Ia ese oi dekenai be dahaka ia karaia? Oiemu matana be edena bamona ia kehoa?”

²⁷Ia haere, ia gwau, “Be! Umui lau hamaoroa momokani vadaeni, to umui be kamonai lasi lau dekenai. Dahaka dainai umui ura be do umui kamonai lou? Umui danu iena diba tahua taudia do umui lao gwauraia?”

²⁸Vadaeni idia hereva dika henia, idia gwau, “Oi be iena diba tahua tauna, ai be Mose ena diba tahua taudia.

²⁹Ai be ai diba Dirava ese Mose dekenai ia hereva henia, to unai tau be edeseni dekena amo ia mai, ai be ai diba lasi.”

³⁰Matana idia kehoa tauna ia gwau, “Ia! Lau be lau hoa, badina be umui diba lasi ia be edeseni dekena amo ia mai, to ia ese lauegu matana ia kehoa.

³¹Ita diba Dirava ese kara dika taudia edia hereva ia kamonai henia lasi, to Dirava ese ia dekenai ia matauraia, bona iena ura ia karaia tauna ena hereva be ia kamonai henia.

³²Tanobada ia hamatamaia dekena amo, tau ta ese mai matakepulu danu ia vara tauna ta ena matana ia kehoa ena sivarai, be ta ita do kamonaia lasi.

³³Inai tau be Dirava dekena amo bema ia mai lasi, be ia ese gau ta do ia karaia diba lasi.”

³⁴Idia haere henia, idia gwau, “Oi be kara dika lalonai oi vara, to edena bamona ai dekenai oi hadibaia, a?” Vadaeni idia ese idia lulua murimuri dekenai.

³⁵Iesu be ia kamonai idia ese murimuri dekenai idia lulua, vadaeni ia davaria, ia nanadaia, ia gwau, “Taunimanima ena Natuna dekenai oi abidadama henia, a?”

³⁶Ia be ia haere, ia gwau, “Lohiabada e, ia be daika? Mani oi hamaoroa lau dekenai, vadaeni ia dekenai do lau abidadama henia.”

³⁷Iesu ia gwau, “Tauna oi itaia vadaeni, ia be inai harihari ia hereva henia oi dekenai.”

³⁸Vadaeni ia gwau, “Lohiabada e, lau abidadama inai.” Vadaeni ia ese ia tomadiho henia.

³⁹Iesu ia gwau, “Kota henia totona inai tanobada dekenai lau mai vadaeni, unai dainai matakepulu taudia be edia matana do idia kehoa, bona matana idia kehoa taudia be edia matana do idia kepulu.”

⁴⁰Farisea taudia haida be ia dekenai idia noho, vadaeni unai hereva idia kamonai. Vadaeni idia ese idia nanadaia, idia gwau, “Ai danu aiemai matana idia kepulu, a?”

⁴¹Iesu ia haere idia dekenai, ia gwau, “Emui matana bema idia kepulu, umui be kerere lasi danu do umui noho, to umui gwau, ‘Ai itaia diba,’ unai dainai umui emui kerere be ia noho.