Read Buka Helaga (Hiri Motu) 1993 APOSETOLO EDIA KARA 27 Bible Online

APOSETOLO EDIA KARA 27 - Buka Helaga (Hiri Motu) 1993 bible

APOSETOLO EDIA KARA 27

¹Idia laloa, ai be lagatoi do ai guia, Italia dekenai ai lao. Inai dainai Paulo mai dibura taudia haida danu be tuari kapena ta dekenai idia henia, iena ladana be Iulio. Ia be Augusto ena orea tauna ta.

²Adaramuteno taudia edia lagatoi ta dekenai ai guia. Inai lagatoi be Asia ena kone gabudia do ia lao. Vadaeni ai heau lao, bona Makedonia tauna ta, Tesalonika dekena amo, ena ladana be Arisitako ai danu ia lao.

³Kerukeru dina dekenai Sidono dekenai ai kamokau. Unuseni Iulio ia bogahisihisi Paulo dekenai. Ia ruhaia, bona iena dala ia karaia, iena turadia dekenai do ia lao, bona idia dekena amo iena ura gaudia ia abia.

⁴Unai gabu ai rakatania, bona aiemai vairana dekenai lai ia mai dainai, Kupro ena lai bada lasi kahana dekenai ai heau.

⁵Kilikia bona Pamupulia edia davara dekenai ai heau, bona Mura hanua dekenai, Lukia tano dekenai ai kamokau.

⁶Unuseni, kapena ese Alesandria ena lagatoi ta ia davaria, Italia do ia lao. Unai lagatoi dekenai kapena ese ai ia udaia, ai guia.

⁷Dina momo metairametaira ai heau, bona mai hekwarahi bada danu Kenido hanua kahirakahira ai kamokau. Unuseni lai ese aiemai dala ia koua, vadaeni Kerete ena lai bada lasi kahana dekenai ai heau, Salamone iduka henuna kahanai.

⁸Mai hekwarahi bada danu kone kahirakahira ai heau. Vadaeni, gabu ta dekenai ai kamokau, ena ladana idia atoa Lagatoi Noho Gabu Namodia. Unai gabu bona Lasea hanua idia edia pada be daudau lasi.

⁹Unuseni ai noho ela bona nega daudau ia ore, bona davara ia dika bona gari negana ia ginidae, badina be Iuda taudia edia aniani taravatua ena nega be ia ore. Unai dainai Paulo be idia dekenai ia sisiba, ia gwau,

¹⁰“Tatau e, lau diba vadaeni, iseda laolao do ia dika. Gau momo do idia boio. Kohu bona lagatoi sibona lasi, to ita danu sedira do ita mase.”

¹¹To kapena ese lagatoi ena taria tauna bona lagatoi ena biaguna tauna idia edia hereva ia abia dae, Paulo ena hereva ia abia dae lasi.

¹²Unai be lagatoi kamokau gabuna namona lasi, keruma neganai. Unai dainai lagatoi taudia momo idia ura davara dekenai do ai heau. Idia ura Poinike dekenai ai kamokau, unuseni do ai noho medu ena neganai. Unai Poinike be lagatoi kamokau gabuna ta Kerete motumotu dekenai mai ena vareai gabudia, ta be diho lahara kahanai, bona ta be lahara kahanai.

¹³Lai namona diho kahana dekena amo ia toa, vadaeni idia laloa edia dala idia karaia be hegeregere, unai dainai dogo idia veria, bona Kerete ena kone kahirakahira dekenai idia heau.

¹⁴To nega sisina murinai, guba bada herea ladana lahara ia toa, motumotu dekena amo.

¹⁵Lai ese lagatoi ia hodaia lao. Ai ura lai ena vaira kahanai ai heau, to hegeregere lasi. Unai dainai ai karaia toho lasi, bona lai ese lagatoi ia hodaia lao sibona.

¹⁶Motumotu maragina ta ena ladana Kauda, ena lai bada lasi kahanai ai heau. Unuseni, ai hekwarahi bada dingi hamauria totona.

¹⁷Idia ese dingi idia veria daekau lagatoi dekenai. Bona kwanau goadadia dekena amo lagatoi ena ihuana idia kumia auka, hagoadaia totona. Idia gari badina be sedira lagatoi do ia hure lao, Afrika ena boe dekenai do ia kamokau. Unai dainai palai idia veria diho, bona lai ese ia hodaia lao.

¹⁸Kerukeru, guba dikana ese lagatoi ia botaia dikadika noho dainai, kohu be davara dekenai idia negea hamatamaia.

¹⁹Dina ihatoina dekenai, lagatoi gaudia danu ma idia negea, edia imana dekenai.

²⁰Dina momo, dina bona hisiu ai itaia lasi, bona guba ia toa dikadika momokani. Bona ai laloa mauri do ai davaria diba lasi momokani.

²¹Idia be nega daudau idia aniani lasi, vadaeni Paulo ese idia edia huanai ia gini, ia gwau, “Tatau e, guna lau gwauraia hereva, Kerete ita rakatania lasi herevana, bema umui kamonai henia be namo. Bema unai bamona, inai dika bona kohu halusia be umui dekenai do ia vara lasi.

²²To harihari umui dekenai lau noinoi, umui goada karaia, badina be umui ta ena mauri do ia boio lasi. Lagatoi sibona do ia boio.

²³Lau be Dirava ena tau, bona ia dekenai lau tomadiho henia. Varani hanuaboi aneru ta lau dekenai ia gini,

²⁴ia gwau, ‘Paulo e, oi gari lasi, Kaisara ena vairana dekenai do oi gini, bona Dirava ese oi danu idia laolao taudia edia mauri oi dekenai ia henia vadaeni.’

²⁵Unai dainai, tatau e, umui goada karaia, badina be Dirava lau abidadama henia noho, lau ia hamaoroa gaudia hegeregere do idia vara.

²⁶To motumotu ta dekenai do ita hure daekau.”

²⁷Guba ena hanuaboi namba 14 ia mai vadaeni, ai be Adaria davara badana ena huanai lai ese ai ia hodaia lao. Bona hanuaboi momokani neganai, lagatoi taudia idia laloa tano be kahirakahira.

²⁸Vadaeni, davara ena dobu makana idia abia hahetoho gauna dekenai, ena dobu be 40 mita. Nega daudau lasi ma idia tohoa lou, 30 mita idia davaria.

²⁹Idia gari, sedira lagatoi be nadi dekenai do ia heau daekau. Inai dainai dogo hani lagatoi ena murina kahana dekena amo idia negea diho, vadaeni idia guriguri dina do ia daekau haraga totona.

³⁰Lagatoi taudia idia ura lagatoi idia rakatania. Vadaeni, dingi be davara dekenai idia atoa diho, to hunia bamona idia karaia, idia ura taunimanima idia laloa dogo haida ma idia negea diho lagatoi ena kwarana kahanai.

³¹To Paulo ese kapena mai ena tuari taudia danu dekenai ia hereva, ia gwau, “Bema idia be lagatoi dekenai idia noho lasi, umui mauri diba lasi.”

³²Vadaeni tuari taudia ese dingi ena kwanau idia utua, dingi ia moru vadaeni davara dekenai.

³³Dina be kahirakahira ia daekau neganai, Paulo ese ibounai ia hamaoroa aniani do idia ania. Ia gwau, “Dina 14 lalonai umui noho kava, umui aniani lasi.

³⁴Unai dainai, umui dekenai lau hamaoroa, aniani umui ania namo, mauri umui davaria totona. Badina be emui kwarana ena huina ta do ia boio lasi, lasi momokani.”

³⁵Unai bamona ia hereva, vadaeni Paulo ese paraoa sisina ia abia, idia edia vairanai Dirava ia tanikiu henia, ia makohia, ia ania.

³⁶Vadaeni, idia edia lalona idia moale, bona idia ibounai danu aniani idia ania.

³⁷Lagatoi dekenai idia guia taudia ibounai be 276.

³⁸Aniani idia ania hegeregere, vadaeni paraoa be davara dekenai idia negea diho, lagatoi do ia haraga totona.

³⁹Daba rere neganai, motumotu ta idia itaia, to ena ladana idia diba lasi. Gohu ta idia itaia, mai ena kone, bona idia laloa, bema dala idia davaria neganai lagatoi do idia abia lao unai gabu dekenai.

⁴⁰Vadaeni, dogo ibounai ena kwanau idia utua, davara lalonai idia rakatania. Bona taria gaudia edia kwanau idia ruhaia, bona kwarana kahana ena palai idia veria daekau, lai ese lagatoi do ia hodaia lao totona. Vadaeni, kone kahana dekenai idia heau lao.

⁴¹To lagatoi ese boe dekenai ia kamokau. Kwarana kahana ia kamokamo momokani, ia marere lasi. To murina kahana be hurehure ena goada ese ia makohia.

⁴²Tuari taudia idia laloa dibura taudia do idia alaia mase, haida idia nahu lao bona idia heau garina.

⁴³To kapena ia ura be Paulo ia hamauria dainai edia dala ia koua. Ia ese oda ia gwauraia, nahu diba taudia do idia paudobi guna, bona kone dekenai idia nahu lao.

⁴⁴Idia murinai noho taudia be do idia diho, haida reirei latanai, ma haida lagatoi gaudia edia latanai. Inai bamona idia karaia, ela bona tano dekenai ibounai idia daekau lao mai mauri danu.