Read Buka Helaga (Hiri Motu) 1993 ROMA 12 Bible Online

ROMA 12 - Buka Helaga (Hiri Motu) 1993 bible

ROMA 12

¹Unai dainai, lauegu varavara taudia e, Dirava ena bogahisihisi bada herea dainai umui lau noia, emui tauanina umui henia Dirava dekenai. Boubou gauna bamona do umui henia, mai mauri bona mai helaga danu, Dirava umui dekenai do ia moale totona. Inai bamona tomadiho momokani Dirava dekenai umui henia be namo.

²Inai tanobada taudia edia kara bamona do umui karaia lasi, to Dirava ese emui lalona do ia hagiroa, vadaeni do umui matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.

³Dirava ese iena hariharibada lau dekenai ia henia dainai, umui ta ta ibounai dekenai lau hamaoroa inai: Oi hekokoroku lasi. Oi ese oi sibona oiemu maka do oi diba, bona inai maka do oi hanaia lasi, do oi laloa lasi oi be bada momokani. Umui ibounai emui diba ena maka do umui laloa maoromaoro, Dirava ese umui ta ta dekenai abidadama ia henia hegeregerena.

⁴Umui diba, tau ta ena tauanina ena kahana be momo, to kahana ta ta be mai edia gaukara idauidau.

⁵Unai bamona danu, ita be taunimanima momo, to Keriso lalonai ita be tauanina tamona bamona, taunimanima mai iseda gaukara idauidau, to ita gaukara hebou. Dirava ena hariharibada ese diba idauidau ita ta ta dekenai ia henia.

⁶Unai dainai Dirava ese ita ia henia hegeregerena, inai diba ita gaukaralaia be namo. Bema tau ta ena diba be haroro, Dirava ena Sivarai do ia gwauraia, iena abidadama hegeregerena.

⁷Bema tau ta ena diba be taunimanima durua, vadaeni do ia durua. Bema iena diba be hadibaia, vadaeni do ia hadibaia.

⁸Bema iena diba be taunimanima edia lalona do ia hagoadaia, vadaeni do ia karaia namonamo. Bema gau ita henia haida dekenai, do ita henia mai moale danu. Daika ese gaukara ia naria, be iena gaukara do ia karaia mai goada danu. Bogahisihisi tauna be do ia bogahisihisi henia mai ena lalo namo danu.

⁹Taunimanima umui lalokau henia koikoi lasi, to umui lalokau henia momokani. Dika do umui negea momokani, to namo do umui dogoatao momokani.

¹⁰Umui ta ta do umui lalokau henia, tadikaka edia lalokau ta ta dekenai bamona. Umui ta ta dekenai danu do umui matauraia.

¹¹Gaukara goada. Gaukara lalonai do umui lahedo lasi. Lohiabada ena gaukara do umui karaia, mai emui lalona ibounai.

¹²Lohiabada ena namo umui dekenai do umui laloa noho mai moale danu. Nega dika ia mai neganai do umui gini goada. Guriguri do umui goadalaia nega ibounai.

¹³Bema Dirava ena taudia be mai edia gau lasi neganai, umui durudia. Bema idau taudia be umui dekenai idia mai neganai, emui ruma dekenai do umui abidia dae.

¹⁴Umui dekenai idia dagedage taudia do umui hadikaia lasi, to Dirava umui noia, ia ese idia do ia hanamoa, do ia hadikadia lasi.

¹⁵Idia moale taudia danu do umui moale, idia taitai taudia danu do umui tai.

¹⁶Do umui noho hebou mai moale bona lalona tamona danu. Umui sibona do umui habadaia lasi, to manau taudia danu do umui noho hebou. Umui sibona emui aonega do umui hekokorokulaia lasi.

¹⁷Bema tau ta ese umui dekenai ia kara dika henia neganai, iena kara dika davana do umui henia lasi, to taunimanima ibounai edia vairana dekenai kara namo sibona do umui karaia.

¹⁸Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.

¹⁹Lauegu lalokau taudia e, dika ena davana do umui henia lasi, davana henia be, Dirava sibona. Badina be Buka Helaga ia gwau: “Lohiabada ia gwau, ‘Dika ena davana be lau sibona ese do lau karaia.’ ”

²⁰Buka Helaga ma ia gwau: “Unai dainai, oi dekenai badu henia tauna, bema ia hitolo, aniani do oi henia, bema ia ranu mase, ranu do oi henia. Unai bamona do umui karaia, be ia ese iena kara do ia laloa, bona do ia hemarai bada.”

²¹Namo lasi dika ese umui do ia halusia, to umui ese kara namo dekena amo dika do umui halusia.