Read Buka Helaga (Hiri Motu) 1993 ROMA 13 Bible Online

ROMA 13 - Buka Helaga (Hiri Motu) 1993 bible

ROMA 13

¹Taunimanima ibounai ese gavamani do idia kamonai henia. Badina be gavamani ta ia noho diba lasi bema Dirava ia ura lasi neganai. Gavamani ena siahu be Dirava ese ia henia.

²Unai dainai, gavamani ena hereva idia kamonai henia lasi taudia be Dirava danu idia kamonai henia lasi. Edia kerere davana do idia abia.

³Badina be kara namo tauna ese gavamani dekenai ia gari lasi, to kara dika tauna sibona be ia gari. Oi ura be gavamani ena siahu dekenai do oi gari lasi, a? Be kara namo do oi karaia, vadaeni gavamani ese oi do ia hanamoa.

⁴Gavamani be Dirava ena hesiai gaukara ia karaia, unai dainai ia ese oi do ia hanamoa bona durua. To bema kara dika oi karaia neganai, gavamani dekenai do oi gari, badina ia be mai ena siahu momokani, bona oi do ia panisia. Ia be Dirava ena hesiai tauna, ia ese kara dika tauna ena davana do ia henia.

⁵Unai dainai, gavamani mai ena siahu taudia do umui kamonai henidia, Dirava ena badu umui laloa dainai lasi, to badina be emui lalona dekenai umui diba dala maorona be unai.

⁶Takisi moni danu umui henia ena badina be unai. Badina be gavamani taudia ese gaukara davana idia abia be namo, Dirava ena gaukara do idia karaia diba totona.

⁷Unai dainai ibounai ta ta dekenai edia davana do umui henidia. Takisi gogoa tauna dekenai takisi do umui henia. Kastom moni gogoa tauna dekenai kastom moni do umui henia. Idia gari henia tauna dekenai do umui gari, bona idia mataurai henia tauna dekenai do umui matauraia.

⁸Tau ta dekena amo umui abia-torehai lasi. To inai gau tamona umui laloa noho be namo: Ta ta dekenai do umui lalokau henia noho, badina be lalokau henia tauna ese Mose ena taravatu ibounai ia badinaia momokani vadaeni.

⁹Momokani Taravatu ia gwau: Do umui heudahanai lasi, taunimanima do umui alaia lasi, do umui henaoa lasi, bona tau ta ena kohu dainai do umui mama henia lasi. Inai ibounai, bona Taravatu oredia ibounai be inai Taravatu tamona lalonai idia haboua: Oiemu badibadinai tauna dekenai do oi lalokau henia, oi sibona oi lalokau henia bamona.

¹⁰Daika ese iena badibadinai tauna ia lalokau henia, be do ia hadikaia diba lasi. Unai dainai bema ita lalokau henia, be Taravatu ibounai ita badinaia inai.

¹¹Inai bamona kara ita karaia be namo, badina ita diba iseda nega be kwadogi. Mahuta dekena amo do ita toreisi negana be ia ginidae vadaeni. Badina be Lohiabada ena mai dinana be kahirakahira. Badina be ita abidadama henia hamatamaia nega dekenai iseda hamauria be do daudau, to harihari iseda hamauria be ia kahirakahira vadaeni.

¹²Hanuaboi ia ore vadaeni, daba ia kahirakahira vadaeni, unai dainai dibura ena kara do ita negea, diari do ita abia, unai be iseda kesi do ita halaoa.

¹³Iseda kara do ita naria namonamo, iseda raka be dina dekenai do ita raka. Do ita lebulebu lasi, do ita inua kekero lasi, do ita heudahanai lasi, do ita sihari kava lasi, do ita heai lasi, do ita mama lasi.

¹⁴Lohiabada Iesu Keriso ena tuari dabua do umui atoa, bona emui tauanina ena ura dikadia do umui karaia lasi.