Read Buka Helaga (Hiri Motu) 1993 ROMA 15 Bible Online

ROMA 15 - Buka Helaga (Hiri Motu) 1993 bible

ROMA 15

¹Ita abidadama goada taudia be namo manoka taudia ita durudia edia abidadama do ia gini totona. Ita sibona iseda moale do ita tahua lasi.

²Ita ibounai ta ta ese iseda badibadinai ia noho tauna do ita hamoalea, iena namo bona iena goada havaraia totona, bona iena abidadama do ia goada totona.

³Badina be Keriso ese sibona ena namo ia tahua lasi, Buka Helaga dekenai ia torea hegeregerena, ia gwau: “Edia hereva dekenai oi idia hadikaia taudia ese lau danu idia hadikaia vadaeni.”

⁴Buka Helaga dekenai idia torea hereva be ita dekenai hadibaia totona idia torea, vadaeni do ita gini goada, bona Dirava ena namo dekenai do ita naria, mai haheauka danu.

⁵Vadaeni Dirava, haheauka bona goada ia henia Diravana ese umui emui lalona do ia hatamonaia, Iesu Keriso ena kara umui karaia noho dainai.

⁶Unai neganai mai emui laloa tamona, bona mai emui hereva tamona, umui ese Dirava, iseda Lohiabada Iesu Keriso ena Tamana do umui hanamoa.

⁷Unai dainai, umui ta ta do umui abia dae, Keriso ese umui ia abia dae hegeregerena, taunimanima ese Dirava do idia hanamoa totona.

⁸Badina be umui lau hamaoroa, Keriso be Iuda taudia durua bona hanamoa totona ia mai, bona ia mai be Dirava ena hereva momokani do ia hedinaraia totona. Inai anina be, Dirava ese iena gwauhamata Iuda sene taudia dekenai ia hamomokania vadaeni.

⁹Bona Iuda lasi bese idauidau taudia ese danu Dirava idia hanamoa diba, iena bogahisihisi dainai, Buka Helaga dekenai ia torea bamona, ia gwau: “Unai dainai Iuda lasi taudia edia huanai oi do lau hanamoa. Oiemu ladana lauegu ane dekenai do lau hanamoa.”

¹⁰Ma ia gwau: “Iuda lasi taudia e, iena abia hidi besena danu do umui moale hebou.”

¹¹Ma Buka Helaga ia gwau, “Umui Iuda lasi taudia ibounai e, Lohiabada do umui hanamoa. Taunimanima ibounai e, Lohiabada do umui hanamoa.”

¹²Ma Isaia danu ia gwau: “Iese ena bese dekena amo tau ta do ia hedinarai, bese idauidau edia lohia tauna do ia lao. Iuda lasi taudia ese ia do idia abidadama henia.”

¹³Dirava be iseda abidadama ena badina korikori dainai ia dekenai ita naria noho. Ia ese umui emui abidadama dainai, moale momokani bona maino momokani do ia henia umui dekenai. Inai dainai umui ese Dirava ena nega namona umui naria dalana, be do ia tubu daekau noho, Lauma Helaga ena siahu dekena amo.

¹⁴Lauegu turana Keristani taudia e, lau diba umui ese kara namona umui karaia noho, bona kara maorona dalana umui diba momokani. Vadaeni umui ta ta dekenai sisiba umui henia diba.

¹⁵To inai revareva lalonai dala haida lau hedinaraia namonamo inai, do umui laloatao totona. Lau be gau ta lau hunia lasi, badina be Dirava ese gaukara idauna ta ia henia vadaeni lau dekenai.

¹⁶Lau be Keriso Iesu ena hesiai tauna Iuda lasi taudia totona. Dirava ena Sivarai Namona lau harorolaia, Dirava ena hahelagaia tauna bamona. Inai dekena amo Iuda lasi taudia be Dirava dekenai idia mai, bona boubou gaudia bamona do idia lao. Dirava hamoalea totona, Lauma Helaga ese idia ia hahelagaia vadaeni.

¹⁷Keriso Iesu danu lau hakapua dainai, lau be Dirava ena gaukara lau karaia noho mai moale bona mai heagi danu.

¹⁸Lau be idau gauna ta do lau harorolaia diba lasi. Lau be inai gau tamona do lau harorolaia: Keriso ese lau dekena amo Iuda lasi taudia Dirava dekenai ia mailaia sivaraina sibona do lau harorolaia. Lau ese inai bamona lau karaia, hereva bona kara dekena amo.

¹⁹Toa bona hoa karadia danu lau karaia, bona Lauma Helaga ese inai gaudia ibounai ia havaraia iena siahu dekena amo. Unai dainai lau loaloa gabudia ibounai, Ierusalema ia lao bona Iluriko, Keriso ena Sivarai Namona lau harorolaia haorea momokani vadaeni.

²⁰Lauegu ura tamona be inai: Sivarai Namona do lau harorolaia, Keriso ena ladana idia do kamonai lasi gabudia dekenai. Badina be lau ura lasi tau ta ese ia haginia vadaeni gaukara ma do lau karaia lou.

²¹Buka Helaga dekenai ia torea hegeregerena, ia gwau: “Iena Sivarai be tau ta ese idia dekenai ia hadibaia lasi taudia, be do idia itaia, bona iena hereva idia do kamonai lasi taudia, be do idia diba.”

²²Oibe, inai gaukara bada ese egu dala ia koua, vadaeni umui dekenai lau mai diba lasi.

²³To harihari egu gaukara inai kahana dekenai be ia ore vadaeni. Lagani momo lalonai, lau ura bada vadaeni, umui dekenai do lau mai.

²⁴Unai dainai Sipania do lau hanaia lao neganai, lau be do lau mai, badina lau ura umui lau itaia, umui danu do ita noho sisina. Lau ura danu umui ese lau do umui durua, egu laolao Sipania dekenai totona.

²⁵To harihari lau be Ierusalema dekenai lau lao inai, unai taudia durua totona.

²⁶Badina be Makedonia bona Akaia taudia ese edia harihari gaudia idia haboua vadaeni Ierusalema ekalesia ogogami taudia dekenai henia totona.

²⁷Idia sibona edia lalokau dekenai idia henia, ta ese ia oda henidia lasi. To momokani unai ogogami taudia idia durudia be namo bona maoro. Badina korikori be, Iuda taudia ese edia lauma gau namodia idia henia vadaeni Iuda lasi bese taudia dekenai. Unai dainai inai Iuda lasi Keristani taudia ese namo edia kohu ma do idia henia Iuda Keristani taudia dekenai, durudia totona.

²⁸Lau ura inai gaukara do lau haorea. Lau ura inai ogogami taudia totona inai idia gogoa moni ibounai do lau henia haorea. Vadaeni inai murinai umui dekenai do lau mai, ma Sipania dekenai do lau lao.

²⁹Lau diba danu, umui dekenai lau mai neganai, Keriso ena hanamoa ibounai do lau mailaia.

³⁰Egu varavara taudia e, umui dekenai lau noinoi, iseda Lohiabada Iesu Keriso dainai, bona Lauma Helaga ese ia henia lalokauna dainai, lau danu totona Dirava dekenai do umui guriguri goadagoada.

³¹Dirava umui noia, ia ese Iudea dekenai kamonai lasi taudia dekena amo lau do ia hamauria, bona egu gaukara Ierusalema dekenai, be Dirava ena taudia ese lau do idia abia dae, mai edia lalona namo danu.

³²Unai murinai, bema Dirava ia ura neganai, mai moale danu umui dekenai do lau mai, vadaeni umui danu laga-ani sisina do lau abia.

³³Maino ia henia Diravana lau noia, ia ese umui dekenai do ia noho. Amen.