Read Buka Helaga (Hiri Motu) 1993 ROMA 4 Bible Online

ROMA 4 - Buka Helaga (Hiri Motu) 1993 bible

ROMA 4

¹Unai dainai aiemai tubuna Aberahamo be edena bamona do ai herevalaia? Dahaka diba ia davaria?

²Bema Aberahamo be sibona ena kara dainai Dirava ena vairanai ia maoromaoro neganai, ia be ia hekokoroku diba. To ia be Dirava ena vairanai ia hekokoroku diba lasi.

³Buka Helaga be inai bamona ia hereva, “Aberahamo ese Dirava ia abidadama henia, bona iena abidadama dainai Dirava ia gwau ia be maoromaoro vadaeni.”

⁴Tau ta ia gaukara neganai davana ia abia. Inai davana be harihari gauna lasi, to iena gaukara davana korikori.

⁵To tau ta bema ia gaukara lasi, to iena abidadama be, Dirava ese dika taudia ia gwauraia maoromaoro diba, unai tauna be abidadama tauna. Bona Dirava ia gwau, unai bamona tauna ena abidadama dainai, be ia maoromaoro vadaeni.

⁶Oibe, taunimanima haida idia noho, Dirava ese edia kara ia laloa lasi, to ia gwau idia be maoromaoro vadaeni. Davida ese inai bamona taudia ia herevalaia, ia gwau idia be mai moale bada danu.

⁷Davida ia gwau: “Edia kerere Dirava ese ia gwauatao, bona edia dika ia kokia vadaeni taudia be idia moale!

⁸Lohiabada ese iena dika ia laloa lasi tauna, be mai moale danu.”

⁹Inai bamona moale be kopina utua taudia sibona idia abia, a? Lasi. Kopina utua lasi taudia danu do idia abia. Buka Helaga ena hereva mani ita laloa lou, ia gwau: “Aberahamo ese Dirava ia abidadama henia, bona iena abidadama dainai, Dirava ia gwau ia be maoromaoro vadaeni.”

¹⁰Edena negai Dirava ese Aberahamo ia gwauraia maoromaoro? Aberahamo ena kopina ia do utua lasi neganai, o iena kopina ia utua murinai? Lasi, kopina utua kara ia do abia lasi neganai, Dirava ese ia gwauraia maoromaoro.

¹¹Oibe, kopina utua kara ia do abia lasi neganai, Dirava ese Aberahamo ia gwauraia maoromaoro, iena abidadama dainai. Inai murinai, Aberahamo ese kopina utua kara ia abia, inai be Dirava ese ia gwauraia maoromaoro guna ena toana. Unai dainai Aberahamo be kopina idia utua lasi taudia edia tubuna, bema Dirava ese ia gwauraidia maoromaoro, ia dekenai idia abidadama henia dainai.

¹²Aberahamo danu be kopina utua kara idia abia taudia edia tubuna, edia kopina idia utua dainai sibona lasi, to badina be Dirava idia abidadama henia, Aberahamo ese ia abidadama henia bamona, kopina utua ia do abia lasi neganai.

¹³Dirava ese Aberahamo bona iena natudia dekenai ia gwauhamata, tanobada ibounai do ia henia idia dekenai. Inai gwauhamata ia henia, ena badina be dahaka? Aberahamo ese Taravatu ia badinaia dainai? Lasi, ia henia badina be Aberahamo ena abidadama dainai, Dirava ese ia gwauraia maoromaoro.

¹⁴Bema Taravatu idia badinaia taudia sibona mo ese Dirava ena gwauhamata gauna idia abia, abidadama taudia edia abidadama be anina lasi. Bona bema inai bamona neganai, Dirava ena gwauhamata be gwauhamata kava.

¹⁵Taravatu ese Dirava ena badu ia havaraia noho. To bema Taravatu be lasi neganai, Taravatu makohia danu be lasi.

¹⁶Unai dainai, Dirava ena gwauhamata be abidadama dainai taunimanima ese do idia abia. Iena gwauhamata be harihari gauna, Dirava ese ia henia, Aberahamo bamona idia karaia taudia ibounai dekenai. Unai be Taravatu idia badinaia taudia sibona lasi, to abidadama taudia danu. Badina be Aberahamo be ita ibounai iseda tamana.

¹⁷Badina Buka Helaga inai bamona ia torea, ia gwau, “Bese momo edia tamana lau ese oi lau halaoa vadaeni.” Inai gwauhamata be ia gini auka noho Dirava ena vairana dekenai. Bona Aberahamo ese Dirava ia abidadama henia. Inai Dirava ese mase taudia ia hamauria lou diba, bona ia ese idia do vara lasi gaudia ia havaraia diba.

¹⁸Aberahamo ia diba lasi edena bamona Dirava ese unai iena gwauhamata gaudia do ia karaia, to ia ese Dirava dekenai ia abidadama henia momokani, daradara ta lasi. Unai dainai ia be bese momo herea edia tamana Dirava ese ia halaoa. Buka Helaga ia torea bamona, ia gwau, “Oiemu bese momo herea momokani do idia vara.”

¹⁹Aberahamo ena mauri lagani be kahirakahira 100, bona iena tauanina be mase gauna bamona. Sara danu ia buruka momokani, bona natuna ia havaraia diba lasi. Aberahamo ese inai ibounai ia laloa, to iena abidadama ia goada noho.

²⁰Dirava ese unai gwauhamata ia henia dainai, Aberahamo ia laloa daradara lasi. To iena abidadama ia bada dainai, Dirava ese siahu ia henia, unai dainai Aberahamo ese Dirava ia hanamoa henia.

²¹Ia diba momokani Dirava ese iena gwauhamata do ia hamomokania.

²²Unai dainai Dirava ese Aberahamo ia gwauraia maoromaoro, iena abidadama dainai.

²³Inai Buka Helaga ena hereva, “Dirava ese Aberahamo ia gwauraia maoromaoro,” be ia sibona totona lasi.

²⁴Inai hereva be ita totona danu ia torea, badina ita ese Dirava ita abidadama henia, ia ese iseda Lohiabada Iesu ia hatorea isi lou mase dekena amo. Bona Dirava ia gwau inai bamona abidadama taudia be maoromaoro iena vairanai.

²⁵Dirava ese Iesu ia siaia, iseda dika dainai do ia mase totona, ma ia ese Iesu ia hatorea isi lou mauri dekenai. Inai toreisi lou dekena amo, Dirava ena vairanai ita maoromaoro diba.