Read Buka Helaga (Hiri Motu) 1993 ROMA 6 Bible Online

ROMA 6 - Buka Helaga (Hiri Motu) 1993 bible

ROMA 6

¹Unai dainai dahaka do ita hereva? Namona be kara dika ita karaia noho, vadaeni unai dekena amo Dirava ena hariharibada do ia bada lao noho, a?

²Lasi, lasi momokani. Ita mase vadaeni dika dekenai, be edena bamona dika ita karaia noho diba iseda mauri lalonai?

³Umui diba lasi, a? Ita bapatiso neganai, Keriso Iesu danu ita hakapua tamona, bona ita be Iesu danu ita mase.

⁴Oibe, bapatiso ita abia neganai, ita be Iesu danu ita mase, bona ia danu ita idia guria hebou. Vadaeni Tamana ese iena siahu badana dekena amo Keriso ia hamauria lou mase dekena amo hegeregerena, ita danu be mauri matamata lalonai do ita raka.

⁵Bema Keriso danu ita hakapua tamona iena mase lalonai, vadaeni ia danu do ita hakapua tamona iena toreisi lou lalonai danu.

⁶Bona ita diba iseda mauri gunana be Keriso danu satauro dekenai ia mase vadaeni, iseda kara dika ena siahu haorea totona. Unai dainai ita be kara dika ena hesiai gaukara do ita karaia lou lasi.

⁷Badina be, tau ta ia mase neganai be kara dika ese unai tau ia guia lou diba lasi.

⁸Oibe, bema Keriso danu ita mase neganai, ita diba Keriso danu do ita mauri danu.

⁹Badina ita diba vadaeni, Keriso be mase dekena amo ia toreisi lou, unai dainai ia be do ia mase lou lasi, mase be ia siahu lasi ia dekenai.

¹⁰Oibe, iena mase be unai nega tamona sibona, bona unai mase dekena amo kara dika ena siahu ia halusia ela bona hanaihanai. To hari ia mauri noho, be Dirava dekenai ia mauri.

¹¹Inai bamona danu umui laloa be namo: Umui mase, vadaeni kara dika be siahu lasi umui dekenai, to umui mauri noho Dirava dekenai, Keriso Iesu danu umui hakapua dainai.

¹²Unai dainai hegeregere lasi kara dika ese umui emui tauanina do ia biagua noho. Emui ura dikadia do umui karaia lou lasi.

¹³Emui mauri kahana ta umui henia lasi kara dika dekenai, dika do ia karaia totona. Lasi, to emui tauanina bona emui kudouna Dirava dekenai do umui henia, badina umui be mase dekena amo umui mauri lou taudia bamona. Unai dainai emui mauri kahana ibounai Dirava dekenai umui henia, kara maoromaoro do umui karaia totona.

¹⁴Kara dika ese umui do ia biagua lasi. Badina be Taravatu henunai umui noho lasi, to Dirava ena hariharibada henunai umui noho.

¹⁵Unai dainai dahaka ita gwau? Kara dika ita karaia be namo, a? Badina be Taravatu henunai lasi, to Dirava ena hariharibada henunai ita noho dainai? Lasi bona lasi momokani.

¹⁶Umui diba lasi, a? Bema umui ese emui tauanina umui henia tau ta dekenai, bona iena hereva umui kamonai henia neganai, umui be iena hesiai gaukara umui karaia noho taudia. Vadaeni, bema umui be kara dika ena hesiai gaukara taudia neganai, umui be mase do umui davaria. To bema umui be Dirava umui kamonai henia neganai, Dirava ese umui do ia gwauraia maoromaoro.

¹⁷To Dirava dekenai tanikiu ita henia. Badina be guna neganai umui be kara dika ena hesiai gaukara umui karaia, to gabeai umui ese mai emui lalona ibounai danu Dirava ena hadibaia hereva umui kamonai henia.

¹⁸Kara dika ena siahu dekena amo Dirava ese umui ia ruhaia, vadaeni Dirava ena hesiai taudia umui lao, kara maoromaoro karaia totona.

¹⁹Umui emui laloa ia do goada lasi dainai, lau be taunimanima edia laloa bamona lau hereva noho. Guna neganai umui ese kara dika idauidau ibounai, bona lebulebu ena hesiai gaukara umui karaia momokani. To harihari umui ese mai emui lalona ibounai danu, kara maoromaoro ena hesiai gaukara do umui karaia, bona Dirava ena taudia korikori do umui lao.

²⁰Umui be kara dika ena hesiai gaukara taudia neganai, Dirava ena kara maoromaoro ese umui ia biagua lasi.

²¹Bona dahaka namo umui davaria unai kara dikadia dekena amo? Gau ta lasi, ani? Bona unai dika dainai sedira hari be hemarai sibona ese ia abia umui. Bona unai karadia ese umui emui mase idia havaraia.

²²To harihari kara dika dekena amo Dirava ese umui ia ruhaia vadaeni, bona ia ese iena hesiai taudia umui ia halaoa vadaeni. Vadaeni hari be gau namona umui davaria, unai be kara helaga, bona iena dokona be mauri hanaihanai.

²³Badina be kara dika ena davana be mase, to Dirava ena harihari gauna davana lasi be mauri hanaihanai, Iesu Keriso iseda Lohiabada lalonai ita noho dainai.