Read Buka Helaga (Hiri Motu) 1993 1 KORINTO 10 Bible Online

1 KORINTO 10 - Buka Helaga (Hiri Motu) 1993 bible

1 KORINTO 10

¹Lauegu varavara taudia e, iseda sene taudia dekenai dahaka kara idia vara mani umui laloa. Idia be Mose ena murinai idia raka noho neganai ori ta henunai idia noho. Bona idia ibounai Davara Kakakaka aena dekenai idia raka hanaia, mai mauri danu.

²Idia ibounai Mose ena bapatiso idia abia, ori bona davara lalonai.

³Idia ibounai ese lauma ena aniani tamona idia ania.

⁴Bona idia ibounai be lauma ena ranu tamona idia inua. Badina be Keriso ese ia henidia ranu idia inua. Ia be idia danu ia loaloa noho lauma Nadina bamona, edia lauma durua totona. Oibe, unai Nadi be Keriso.

⁵To idia momo edia kara be Dirava ese ia ura henia lasi, vadaeni taunimanima idia noho lasi tano dekenai idia mase ore.

⁶Unai kara ia vara be ita dekenai toa ta bamona, gau dikadia do ita ura henia lasi, idia ese idia ura henia bamona.

⁷Kaivakuku danu do umui tomadiho henia lasi, idia haida idia karaia bamona. Buka Helaga lalonai ia torea bamona, ia gwau, “Taunimanima idia helai diho, idia aniani, muramura kekero idia inua, vadaeni idia toreisi, idia gadara kava, bona sihari kava.”

⁸Sihari kava bona heudahanai karadia do ita karaia lasi, idia haida idia karaia bamona. Unai dina tamona lalonai ibounai 23,000 idia mase ore.

⁹Lohiabada ena siahu do ita tohoa lasi, idia haida ese idia karaia bamona. Vadaeni gaigai ese unai taudia idia koria mase.

¹⁰Bona Dirava dekenai do ita maumau lasi, idia haida idia karaia bamona. Vadaeni Alaia Aneruna ese idia ia alaia mase.

¹¹Oibe, iseda sene taudia dekenai unai bamona kara idia vara, be ita dekenai toa bamona, do ita itaia mai gari danu. Edia sivarai danu Buka Helaga lalonai idia torea vadaeni, idia ese ita do idia sisiba henia totona. Badina be tanobada ena dokona be kahirakahira negana ita noho inai.

¹²Unai dainai, tau ta bema ia laloa ia gini goada, namona be ia naria namonamo, do ia moru garina.

¹³Umui dekenai idia pidia dibagani ibounai ese taunimanima ibounai dekenai danu idia pidia noho. To Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.

¹⁴Unai dainai, lauegu turana lalokau e, kaivakuku dekenai umui tomadiho henia lasi, umui rakatania.

¹⁵Umui be diba taudia. Unai dainai lauegu hereva umui laloa namonamo.

¹⁶Anibou Helaga ita ania neganai, kapusi dekena amo Dirava ita hanamoa. Bona unai kapusi dekena amo ita inua neganai, Keriso ena rarana ita inua hebou, ani? Bona paraoa ita makohia neganai, Keriso ena tauanina ita ania hebou, ani?

¹⁷Ita be momo herea, to paraoa be tamona sibona. Unai dainai ita be tauanina tamona, badina be paraoa tamona ita ania.

¹⁸Israela taudia edia kara mani umui laloa. Boubou vamuna idia ania taudia be Dirava danu pata helagana ena gaukara idia karaia hebou, ani?

¹⁹Lauegu hereva ena anina be dahaka? Kaivakuku dekenai henia boubou gauna be mai anina, a? Kaivakuku danu be gau momokani, a?

²⁰Lasi! To lauegu hereva ena anina be inai: Iuda lasi taudia edia boubou gaudia be lauma dikadia dekenai idia henia, Dirava dekenai idia henia lasi. Lau ura lasi lauma dikadia danu umui gaukara hebou.

²¹Lohiabada ena kapusi bona lauma dikadia edia kapusi ruaosi nega tamona umui inua diba lasi. Lohiabada ena pata dekenai noho aniani, bona lauma dikadia edia pata dekenai noho aniani ruaosi be nega tamona umui ania diba lasi.

²²Edena bamona? Umui ura Dirava umui habadua, a? Be, iseda goada ese Dirava ena goada ia hereaia diba, a?

²³Momokani, gau ibounai be taravatu lasi ita dekenai, to namo lasi ita laloa gau ibounai be namo ita dekenai. Gau ibounai be taravatu lasi ita dekenai, to namo lasi ita laloa gau ibounai ese ita do idia hagoadaia.

²⁴Tau tamona sibona ena namo do ia tahua lasi, to namona be tau haida edia namo do ia tahua.

²⁵Hoihoi gabuna dekenai idia hoia vamu ibounai umui ania diba. Hoihoi tauna do umui nanadaia lasi, do umui laloa hekwarahi garina.

²⁶Badina be Buka Helaga ia torea bamona, ia gwau: “Tanobada bona tanobada lalonai idia noho gaudia ibounai be Dirava ena.”

²⁷Bema Iesu dekenai ia abidadama lasi tauna ese aniani totona umui ia boiria, bona umui ura lao neganai, ia namo, umui lao. Aniani ia henia gaudia ibounai be do umui ania, umui nanadailaia lasi, bona umui laloa momo lasi.

²⁸To bema tau ta ese umui ia hamaoroa, ia gwau, “Inai be boubou vamuna,” vadaeni unai vamu do umui ania lasi, unai ia hereva tauna ena lalona do umui hadikaia garina.

²⁹Lau be umui emui lalona totona lau herevalaia lasi, to unai tau ena lalona totona lau hereva, unai vamu do umui ania lasi. Sedira umui ta ese lau ia henanadaia, ia gwau, “Dahaka dainai lauegu ura lau karaia diba lasi, tau ta do lau hadikaia garina.

³⁰Bema Dirava lau tanikiu henia, vadaeni lau aniani neganai, dahaka dainai mai tanikiu danu lau ania gauna totona tau ta ese lau do ia gwauraia kerere?”

³¹Egu haere be inai: Umui aniani o umui inuinu, o dahaka dahaka umui karaia neganai, inai gau ibounai do umui karaia Dirava hanamoa totona.

³²Umui ibounai do umui noho namonamo, vadaeni Iuda taudia, Iuda lasi taudia, bona Dirava ena ekalesia taudia ese emui kara namo do idia itaia, be do umui hakaudia kerere lasi.

³³Lauegu kara bamona do umui karaia. Lauegu kara ibounai be, taunimanima ibounai ese lau do idia ura henia totona lau karaia. Lauegu namo lau tahua lasi, to ibounai edia namo lau tahua noho, mauri do idia davaria totona.