Read Buka Helaga (Hiri Motu) 1993 1 KORINTO 15 Bible Online

1 KORINTO 15 - Buka Helaga (Hiri Motu) 1993 bible

1 KORINTO 15

¹Lauegu varavara taudia e, Sivarai Namona umui dekenai lau harorolaia gauna, be umui abia dae vadaeni, bona ia lalonai umui emui abidadama ia gini goada noho. Lau ura inai Sivarai Namona umui laloa lou.

²Inai Sivarai Namona dekena amo Dirava ese umui ia hamauria, bema Sivarai Namona ena hereva umui badinaia noho neganai. To gau tamona, umui lau haroro henia Sivarai Namona do umui abidadama henia noho, umui abia dae kava garina.

³Badina be lau davaria hereva badana umui dekenai lau hamaoroa guna: Keriso be ita dainai ia mase, Buka Helaga lalonai ia torea hegeregerena.

⁴Idia guria vadaeni danu, to dina toi murinai mase dekena amo ia toreisi lou, Buka Helaga lalonai ia torea hegeregerena.

⁵Petero ese ia itaia, unai murinai aposetolo taudia 12 ese idia itaia.

⁶Unai murinai, nega tamona dekenai, iseda Keristani varavara taudia 500 mai kahana ese Iesu idia itaia. Inai varavara taudia momo idia do mauri noho, to haida be idia mase vadaeni.

⁷Unai murinai Iamesi ese Iesu ia itaia, bona aposetolo ibounai ese danu ma idia itaia lou.

⁸Idia ibounai idia itaia murinai, lau danu ese Iesu lau itaia, to lau be mero ta ia vara dika bamona.

⁹Badina be aposetolo ibounai ese lau idia hereaia, lau be namo lasi aposetolo tauna lau idia gwauraia. Badina be Dirava ena ekalesia oreana lau dagedage henia.

¹⁰To Dirava ena hariharibada dainai, lau be harihari aposetolo dagi lau karaia noho. Bona lau dekenai ia henia hariharibada be ia henia kava lasi, badina be gaukara bada herea lau karaia vadaeni, aposetolo taudia ibounai lau hereaia vadaeni. To inai be lauegu goada dekenai lasi, Dirava ena hariharibada be lau danu ia noho, ia ese ia karaia.

¹¹Unai dainai, bema lau haroro, o aposetolo taudia haida idia haroro, aiemai haroro hereva be tamona sibona. Bona inai hereva be umui ibounai ese umui abidadama henia vadaeni.

¹²To, bema Keriso be mase dekena amo ia toreisi lou ai harorolaia noho, edena bamona umui haida umui gwau mase taudia do idia toreisi lou lasi?

¹³Mase taudia bema idia toreisi lou lasi neganai, Keriso danu ia toreisi lou lasi.

¹⁴Bona bema Dirava ese Keriso ia hatorea isi lou lasi, aiemai haroro be anina lasi, umui emui abidadama danu be anina lasi.

¹⁵Ma inai danu, bema toreisi lou be lasi, ai aposetolo taudia be Dirava ena hereva ai gwauraia koikoi. Badina be ai be ai hereva badabada vadaeni Dirava ese Keriso ia hatorea isi lou. To, bema Dirava ese mase taudia ia hatorea isi lasi, vadaeni ia ese Keriso danu ia hatorea isi lasi.

¹⁶Io, bema inai be momokani, Dirava ese mase taudia ia hatorea isi lasi neganai, vadaeni ita be inai bamona do ita hereva, “Keriso danu be Dirava ese ia hatorea isi lou lasi.”

¹⁷Bema Dirava ese Keriso ia hatorea isi lasi neganai umui be umui abidadama kava, vadaeni umui be emui kara dika lalonai umui do noho.

¹⁸Bona Keriso idia abidadama henia noho lalonai idia mase taudia danu be do idia boio.

¹⁹Keriso ita abidadama henia noho, bona iena nega namo ita naria noho. To, bema inai tanobada mauri sibona lalonai Keriso ena namo ita naria noho neganai, madi ita be taunimanima ibounai edia huanai ogogami herea.

²⁰To hereva momokani be inai: Keriso be Dirava ese mase dekena amo ia hatorea isi. Unai ia karaia dainai, Keriso ese mase lalonai idia mahuta noho taudia edia toreisi lou ia hamomokania vadaeni. Toreisi lou taudia be ia ese idia ia gunalaia.

²¹Badina be tau tamona dekena amo mase ia vara, bona inai bamona danu, tau tamona dekena amo mase dekena amo toreisi lou ia vara.

²²Badina be taunimanima ibounai Adamu dainai idia mase vadaeni, unai bamona danu Keriso idia abidadama henia dainai ibounai do idia mauri.

²³To ta ta edia nega, edia nega dekenai mauri do idia abia. Keriso ia toreisi lou guna, unai murinai, ia giroa mai neganai, Keriso idia badinaia taudia ibounai danu do idia toreisi lou.

²⁴Unai murinai dokona do ia ginidae, vadaeni Keriso ese gunalaia taudia ibounai, lohia taudia ibounai, bona siahu taudia ibounai do ia haorea. Unai neganai danu Keriso ese Dirava ena Basileia be Tamana Dirava ena imana dekenai do ia atoa.

²⁵Badina be Keriso ese gau ibounai do ia biagua, ela bona Dirava ese ia dekenai idia tuari taudia ibounai iena aena henunai do ia atodia.

²⁶Ia dekenai idia tuari taudia ibounai ia ese ia haorea murinai, Dirava ese mase danu do ia haorea.

²⁷Badina be Buka Helaga ia gwau: “Dirava ese gau ibounai iena aena henunai ia atoa.” Inai hereva ia gwau, Dirava ese gau ibounai Keriso henunai ia atoa. Unai dainai ita diba Dirava be Keriso henunai lasi.

²⁸To Dirava ese gau ibounai Keriso henunai ia atoa murinai, Natuna ese sibona Dirava ena henunai do ia atoa, Oibe, Dirava, gau ibounai Keriso henunai ia atoa Diravana, be unai neganai gau ibounai edia biaguna momokani do ia lao.

²⁹Umui haida umui gwau mase taudia idia toreisi lou lasi. Bema inai be momokani, badina dahaka haida ese bapatiso idia abia mase taudia totona? Sedira toreisi lou idia hamomokania dainai unai bamona idia karaia, ani?

³⁰Bona ai danu be edena bamona? Badina be dahaka nega ibounai mase kahirakahira ai noho?

³¹Lauegu varavara taudia e, dina ibounai lau idia alaia mase gwauraia, to lau gari lasi. Inai bamona lau hereva ena badina be dahaka? Badina korikori be, umui bona lau be Keriso Iesu iseda Lohiabada lalonai ita mauri noho, bona umui lau heagilaia dainai.

³²Bema lau be uda boroma danu lau heatu Efeso dekenai inai tanobada mauri ena namo abia totona, dahaka namo lau davaria diba? Bema mase taudia Dirava ese ia hatorea isi lasi neganai, inai bamona ita hereva namo, “Laloa lasi, ita aniani bona ita inuinu, badina be kerukeru do ita mase.”

³³Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia.

³⁴Umui emui laloa kavakava umui hadokoa, bona emui kara dika daladia umui rakatania. Umui kamonai. Umui haida be Dirava umui diba lasi. Inai bamona lau hereva, do umui hemarai totona.

³⁵Sedira tau ta ia henanadai, ia gwau, “Mase taudia be edena bamona do idia toreisi? Edia tauanina be do edena bamona?”

³⁶Kava taudia e, uhe ta tano lalonai oi hadoa neganai, be do ia tubu lasi ela bona ia mase guna.

³⁷Oi hadoa gauna be gabeai ia vara anina, a? Lasi, oi hadoa gauna be uhe sibona, sedira uiti uhena o idau uhe ta.

³⁸To Dirava ese unai uhe dekenai anina ia henia, iena ura hegeregerena, uhe ta ta edia anina korikori ia henia.

³⁹Tauanina danu ibounai be toana tamona lasi: Ta be taunimanima edia tauanina, ma ta be boroma edia tauanina, ma ta be manu edia tauanina, ma ta be gwarume edia tauanina.

⁴⁰Guba taudia edia tauanina bona tanobada taudia edia tauanina danu idia noho. To guba taudia edia hairai be ta, tanobada taudia edia hairai be idau.

⁴¹Dina ena hairai be ta, hua ena hairai be ma ta, hisiu edia hairai danu be idau. Bona hisiu ta ta edia hairai be idauidau.

⁴²Mase taudia edia toreisi lou danu be unai bamona. Tauanina ita guria neganai ia be bodaga diba gauna, to ia toreisi lou neganai ia be bodaga diba lasi gauna.

⁴³Tauanina ita guria neganai ia be manoka bona iena toana be dika. To Dirava ese ia hatorea isi neganai, tauanina be ia goada bona mai hairaina danu.

⁴⁴Tauanina ita guria neganai ia be tanobada gauna. To Dirava ese ia hatorea isi neganai, ia be lauma anina gauna. Badina be taunimanima edia tauanina idia noho hegeregerena, unai bamona danu guba taudia edia lauma anina idia noho.

⁴⁵Buka Helaga lalonai ia torea, ia gwau: “Tau ginigunana, Adamu, be Dirava ese ia karaia, taunimanima edia mauri ia abia.” To Adamu dokona, gabeai ia mai Tauna be mauri hanaihanai ia henia Laumana.

⁴⁶Lauma ena mauri be guna lasi, to tauanina ena mauri be guna. Bona lauma ena mauri be gabeai ia vara.

⁴⁷Adamu ginigunana be tano kahuna dekena amo Dirava ese ia karaia, bona ia be tanobada dekena amo. To Adamu iharuana be guba dekena amo ia mai.

⁴⁸Tanobada taudia be tanobada ena tano kahuna dekena amo ia mai tauna hegeregerena. Guba taudia be guba dekena amo ia mai tauna hegeregerena.

⁴⁹Tanobada ena tano kahuna dekena amo ia mai tauna ena toana ita abia vadaeni. Unai bamona danu, guba dekena amo ia mai tauna ena toana do ita abia.

⁵⁰To lauegu varavara taudia e, lauegu hereva ena anina be inai: Tauanina bona rara ese Dirava ena Basileia do idia abia diba lasi. Bona mase tauna danu ese mase diba lasi taudia edia mauri ia abia diba lasi.

⁵¹Umui kamonai. Hunia hereva umui lau hamaoroa inai: Ita ibounai do ita mase lasi, to Dirava ese ita ibounai do ia senisia, do ita idau.

⁵²Inai be karaharaga momokani do ia vara, matana hakapua haraga ena nega bamona, dokona kibina do idia hiriria neganai. Oibe, kibi do idia hiriria, vadaeni mase taudia do idia toreisi lou, bona do idia mase lou diba lasi. Bona ita ibounai Dirava ese do ia senisia, do ita idau.

⁵³Badina be do ia bodaga diba gauna ese bodaga diba lasi gauna bamona do ia halaoa. Bona do ia mase diba gauna ese mase diba lasi gauna do ia halaoa.

⁵⁴Oibe, inai kara do ia vara: Mase diba gauna Dirava ese do ia senisia, mase diba lasi gauna do ia halaoa. Bona inai bamona ia vara neganai, Buka Helaga ena hereva ta be do ia momokani vadaeni, hereva ia gwau: “Dirava ese mase ia haorea, Dirava ena kwalimu be ia momokani vadaeni!”

⁵⁵“Mase e, oiemu kwalimu be edeseni? Mase e, oiemu hisihisi ena siahu be edeseni?”

⁵⁶Mase ese iena hisihisi siahuna be kara dika dekena amo ia abia, bona kara dika ena siahu be Taravatu dekena amo ia abia.

⁵⁷To Dirava ita hanamoa! Lohiabada Iesu Keriso ena siahu dainai Dirava ese ita ia hagoadaia, vadaeni ita kwalimu!

⁵⁸Unai dainai, lauegu varavara taudia e, egu lalokau, do umui gini goada, do umui marere lasi. Nega ibounai Lohiabada ena gaukara do umui karaia goadagoada. Badina be umui diba Lohiabada ena gaukara lalonai, emui hekwarahi be hekwarahi kava lasi momokani.