Read Buka Helaga (Hiri Motu) 1993 1 KORINTO 4 Bible Online

1 KORINTO 4 - Buka Helaga (Hiri Motu) 1993 bible

1 KORINTO 4

¹Namona be umui laloa ai be Keriso ena hesiai taudia, bona ai ese Dirava ena hunia hereva ai naria namonamo taudia.

²Hesiai tauna ena gaukara lalonai gau badana momokani be inai: Iena biaguna ena ura do ia karaia momokani.

³Lau be inai bamona lau laloa: Bema umui ese, o taunimanima haida ese lau umui kota henia neganai, unai be gau ta lasi. Lau sibona danu ese egu kara lau kota henia lasi.

⁴Momokani lau diba lasi egu kerere ta ia noho o lasi. To unai dainai lau be maoromaoro momokani, a? Lasi, Lohiabada sibona ese lau do ia kota henia.

⁵Unai dainai tau ta do umui gwauraia kerere haraga lasi. Naria ela bona Lohiabada do ia mai. Ia ese dibura lalonai idia hunia gaudia be diari lalonai do ia hedinaraia, ma ia ese taunimanima edia hunia laloa do ia hedinaraia. Bona unai neganai tau ibounai ese Dirava ena hanamoa hereva do idia abia, edia kara hegeregerena.

⁶Lauegu varavara taudia e, umui emui laloa lau hagoadaia totona, lau ura Apolo bona lau, aiemai manau kara do umui laloa. Aiemai kara bamona do umui karaia, bona Buka Helaga ena hereva do umui utua lasi. Lau ura lasi umui hekokoroku, bona tau ta umui abia dae, to tau ma ta umui negea.

⁷Egu turana e, edena bamona oi be hekokoroku momo? Oi davaria gaudia ibounai be Dirava ese oi dekenai ia henia vadaeni, ani? Oibe, Dirava ese inai gau oi dekenai ia henia, harihari gaudia bamona. Unai dainai, badina dahaka oi hekokoroku, inai gau sibona oiemu goada dekena amo oi abia bamona?

⁸Harihari umui be boga kunu vadaeni, harihari umui be kohu momo taudia. Umui ese ai umui hereaia vadaeni, bona king hegeregere umui halaoa, ani? Bema umui be king momokani be namo, vadaeni ai danu king taudia do ai halaoa umui danu.

⁹To inai be lasi, badina lau laloa inai bamona: Dirava ese ai aposetolo taudia be gabeai taudia momokani ai ia halaoa vadaeni. Ai be hegeregere taunimanima ese edia kota dekenai idia gwau ai be do ai mase. Vadaeni ai mase neganai, ibounai ese edia matana dekenai ai do idia itaia, taunimanima bona aneru danu.

¹⁰Keriso ena ladana ai abia isi totona, ai be kavakava taudia bamona, to umui be Keriso danu umui hakapua dainai, umui be aonega taudia. Ai be manoka, to umui be goada. Ai be idia kirikirilaia, to umui be idia hanamoa.

¹¹Dina ibounai ia mai bona harihari ai be hitolo, ai be ranu mase, ai be dabua lasi, ai idia botaia, bona ai be noho ruma ta lasi.

¹²Ai hekwarahi bada noho, aiemai imana dekenai ai gaukara noho. Ai dekenai idia hereva dika noho, to ai ese idia ai hanamoa. Ai idia dagedage henia noho, to davana ai henia lasi.

¹³Aiemai ladana idia hadikaia noho, to idia dekenai ai hereva mai manau danu. Ai be tanobada ena kukuri, bona gau ibounai edia momoru be ai idia halaoa vadaeni, ia mai bona harihari.

¹⁴Inai hereva lau torea lasi umui be do umui hemarai totona. Lasi, to umui be lauegu natuna, lauegu lalokau dainai, lau ura umui lau sisiba henia.

¹⁵Umui laloa: Bema Keriso ena mauri dalana umui dekenai idia hadibaia taudia ibounai be 10,000, inai be gau ta lasi. Umui emui tamana be tamona sibona. Oibe, Keriso Iesu ena mauri dalana diba totona umui emui tamana be lau sibona. Lau ese Sivarai Namona umui dekenai lau haroro henia dainai umui be lauegu natuna.

¹⁶Unai dainai, umui lau noia, lauegu kara bamona do umui karaia.

¹⁷Inai totona Timoteo lau siaia, ia lao umui dekenai. Ia be lauegu lalokau merona, mai ena kara momokani danu, Keriso ena mauri dalana lalonai. Ia ese lauegu gaukara bona lauegu kara Iesu Keriso ena mauri matamata lalonai, be umui dekenai do ia hadibaia. Ekalesia orea ibounai dekenai lau hadibaia hereva, be ia ese umui dekenai do ia hamaoroa.

¹⁸Umui haida umui laloa lau be umui do lau vadivadi henia lasi, vadaeni umui hekokoroku.

¹⁹To, bema Lohiabada ia ura neganai, lau be nega sisina umui dekenai do lau mai. Vadaeni inai hekokoroku taudia do lau diba, idia be mai siahu momokani o lasi. Edia hereva be gau ta lasi,

²⁰badina be Dirava ena Basileia be hereva gauna lasi, to ia be siahu gauna.

²¹Umui ura edena bamona lau mai umui dekenai? Mai kwadia auna do lau mai, o mai lalokau bona manau danu?