Read Buka Helaga (Hiri Motu) 1993 1 KORINTO 7 Bible Online

1 KORINTO 7 - Buka Helaga (Hiri Motu) 1993 bible

1 KORINTO 7

¹Umui emui revareva lalonai lau dekenai umui torea hereva edia davana be inai: Tatau idia headava lasi danu be ia namo.

²To lebulebu ia vara garina tatau ese edia adavana ta ta do idia abia be namo. Hahine taudia danu edia adavana korikori sibona do idia abia be namo.

³Tau ese iena adavana dekenai headava kara do ia henia, hahine ese danu iena adavana dekenai headava kara do ia henia.

⁴Hahine ese sibona ena tauanina ia biagua lasi, to tau ese ia biagua. Tau ese danu sibona ena tauanina ia biagua lasi, to hahine ese ia biagua.

⁵Umui ta ta dekenai headava kara do umui koua lasi. To bema umui laloa tamona, headava kara karaia lasi, guriguri goadalaia totona, unai be ia namo. To nega daudau lasi, headava kara do umui karaia lou. Badina be sedira emui haheauka be hegeregere lasi, bona Satani ena dibagani ese umui do ia abia garina.

⁶Inai sisiba be lauegu laloa sibona, ia be taravatu lasi:

⁷Lauegu ura be umui ibounai lau bamona do umui noho, to tau ta ta dekenai Dirava ese maoro ia henia, do ia headava, o do ia headava lasi. Ta ena maoro be inai bamona, ma ta ena maoro be unai bamona.

⁸Headava lasi taudia dekenai bona vabu dekenai inai bamona lau hereva: Lau hegeregere, headava lasi umui noho be namo.

⁹To bema idia edia lalona ena ura, bona edia tauanina idia biagua hegeregere lasi neganai, namona be idia headava. Namo lasi ura dikadika ese idia ia araia, lahi bamona.

¹⁰To headava taudia totona inai taravatu lau gwauraia, hahine ese tau do ia rakatania lasi. Inai be lauegu taravatu lasi, to Lohiabada ena.

¹¹To bema ia rakatania, ia be headava lasi do ia noho, o do ia giroa lou iena adavana dekenai. Tau danu ese iena adavana do ia rakatania lasi.

¹²Taunimanima oredia dekenai lau ura hereva. Inai hereva be Lohiabada ena lasi. Lauegu sisiba be inai: Sedira emui Keristani varavara tauna ta be mai ena adavana, abidadama lasi hahine. Bema unai hahine ia ura iena tau danu ia noho neganai, iena tau ese do ia rakatania lasi.

¹³Bona Keristani varavara hahine ta danu sedira mai ena adavana, abidadama lasi tauna. Bema unai tau ia ura iena hahine danu ia noho neganai, iena hahine ese do ia rakatania lasi.

¹⁴Badina be Keristani hahine ese iena adavana, abidadama lasi tauna ia hahelagaia noho. Bona Keristani tauna ese iena adavana, abidadama lasi hahine ia hahelagaia noho. Bema lasi neganai, umui emui natudia be helaga lasi. To momokani, harihari be idia helaga noho.

¹⁵To bema abidadama lasi tauna o abidadama lasi hahine ese iena adavana, Keristani tauna o hahine ia ura rakatania neganai, iena dala koua lasi. Inai bamona ia vara neganai, Keristani tauna o hahine ese unai abidadama lasi tau o hahine idia rakatania dala do idia koua lasi, dibura lalonai idia koua bamona. Lasi momokani. Badina Dirava ese umui ia boiria, maino lalonai do umui noho totona.

¹⁶To oi Keristani hahine, sedira bema ia danu oi noho, oi ese oiemu tau do oi durua diba, vadaeni ia ese Keristani tauna do ia halaoa, ani? Bona oi Keristani tauna, sedira bema ia danu oi noho, oi ese oiemu hahine do oi durua diba, vadaeni ia ese Keristani hahine do ia halaoa, ani?

¹⁷Lohiabada ese umui ta ta dekenai gaukara ena diba ia henia, bona Dirava ese umui ia boiria hegeregerena, unai bamona do umui mauri noho. Ekalesia orea ibounai lalonai inai bamona lau hadibaia noho.

¹⁸Sedira kopina ia utua vadaeni tauna be Dirava ese ia boiria. Vadaeni iena kopina utua toana do ia kokia gwauraia lasi. Sedira kopina utua lasi tauna be Dirava ese ia boiria. Vadaeni ia be kopina utua kara do ia tahua lasi.

¹⁹Badina be kopina utua, o utua lasi, ruaosi be anina lasi, to Dirava ena taravatu badinaia sibona be mai anina.

²⁰Dirava ia boiridia neganai idia noho hegeregerena, unai bamona do idia noho be namo.

²¹Dirava ese oi ia boiria neganai oi be hesiai tauna mai guia danu, a? Oi laloa lasi. To bema oi idia ruhaia dalana oi davaria neganai, do oi abia dae. Unai be namo.

²²Badina be hesiai tauna bema Lohiabada ese ia boiria neganai, ia be Lohiabada ena ura kwalimu tauna do ia lao. To ura kwalimu tauna bema Keriso ese ia boiria neganai ia be Keriso ena hesiai tauna.

²³Dirava ese umui ia hoia, mai davana, unai dainai taunimanima edia hesiai mai guia taudia umui lao lasi.

²⁴Lauegu varavara taudia e, umui ta ta Dirava ese umui ia boiria neganai umui noho hegeregerena, unai bamona do umui noho be namo.

²⁵Ma emui henanadai ta be headava lasi taudia totona, memero bona kekeni. Dirava ese taravatu ta lau dekenai ia henia lasi. To Dirava ese lau ia bogahisihisi henia dainai aonega idauna lau dekenai ia henia. Unai dainai lauegu laloa do lau gwauraia.

²⁶Lau laloa, hari inai nega be dika dainai, harihari umui noho bamona do umui noho, unai be namo.

²⁷Oi be mai oiemu hahine, a? Oi rakatania lasi. Oi headava lasi, a? Kekeni ta oi tahua lasi.

²⁸To bema oi headava, inai be kara dika lasi. Bona kekeni bema ia headava, inai danu be kara dika lasi. To lau laloa, headava taudia be inai tanobada ena metau bada do idia abia, bona lau ura lasi inai bamona metau umui dekenai idia vara.

²⁹Varavara taudia e, lauegu hereva ena anina be inai: Nega be kwadogi. Unai dainai inai nega kwadogina ia noho lalonai, tatau mai edia adavana be adavana lasi taudia bamona do idia noho be namo.

³⁰Bona taitai taudia be taitai lasi taudia bamona do idia noho be namo. Bona moale taudia be moale lasi taudia bamona do idia noho. Bona hoihoi taudia be kohu lasi taudia bamona do idia noho.

³¹Bona tanobada ena gau namodia idia abia noho taudia be do idia noho, inai gaudia be anina lasi bamona. Badina be inai tanobada, hari ia noho toana bamona, be kahirakahira do ia ore.

³²Lau ura lasi laloa hekwarahi umui abia. Headava lasi tauna ese Lohiabada do ia hamoalea daladia ia laloa.

³³To headava tauna ese tanobada gaudia ia laloa, badina be ia ura iena hahine do ia hamoalea.

³⁴Unai dainai iena laloa be rua. Headava lasi hahine, bona tau ia diba lasi kekeni ese Lohiabada ena gaukara idia laloa, badina idia ura edia tauanina bona lauma be helaga. To headava hahine be tanobada gaudia ia laloa, badina be ia ura iena tau do ia hamoalea.

³⁵Umui durua totona inai bamona lau hereva. Lau ura lasi umui emui dala do lau koua. Lau ura kara namo bona kara maoromaoro do umui karaia, bona Lohiabada ena gaukara do umui karaia momokani, mai laloa rua lasi.

³⁶To bema tau ta ia laloa iena maoheni kekeni dekenai kara namo ia karaia noho lasi. Bema ia ura dikadika unai kekeni, bona dala ma ta ia noho lasi neganai, iena ura do ia karaia be namo, do idia headava. Inai be kara dika lasi.

³⁷To bema tau ta ese iena lalona ia auka, bona ia laloa do ia headava lasi be namo, bona bema ia be mai ena goada iena ura do ia biagua, vadaeni ia ese unai kekeni ia adavaia lasi danu be namo.

³⁸Unai dainai bema tau ta ese iena kekeni ia adavaia, ia be kara namo ia karaia vadaeni. To bema tau ta ese ia headava lasi, ia be kara namo herea ia karaia vadaeni.

³⁹Hahine ese iena adavana do ia badinaia ela bona tau ena mauri dokona. To bema iena tau ia mase neganai unai hahine ese ia ura henia tauna do ia adavaia diba, taravatu lasi. To Keristani tauna sibona do ia adavaia diba.

⁴⁰To lauegu laloa be inai: Bema ia vabu noho be iena lalona do ia namo. Bona lau laloa danu Dirava ena Lauma be egu lalona dekenai ia noho.