Read Buka Helaga (Hiri Motu) 1993 2 KORINTO 4 Bible Online

2 KORINTO 4 - Buka Helaga (Hiri Motu) 1993 bible

2 KORINTO 4

¹Dirava ena bogahisihisi dainai inai haroro gaukara ai dekenai ia henia, unai dainai ai be hesiku lasi.

²Ai be hemarai karadia, taunimanima idia hunia gaudia, ai negea vadaeni, bona koikoi karadia be ai karaia lasi. Dirava ena hereva danu ai senisia lasi. Ai be hereva momokani ai gwauraia hedinarai noho, Dirava ena vairana dekenai. Unai dekena amo taunimanima idia diba, ai be mai momokani danu Dirava ena gaukara ai karaia noho.

³Bema ai ese ai harorolaia Sivarai Namona be hunia gauna, unai be mase dala idia raka noho taudia sibona dekenai ia be hunia gauna.

⁴Oibe, idia abidadama henia diba lasi, badina be inai tanobada ena dirava ese edia lalona ia koua, dibura dekena amo. Vadaeni Keriso ena hairaina bona iena Sivarai Namona ena diari idia itaia diba lasi. Keriso be Dirava ena toana momokani Tauna.

⁵Badina be aiemai haroro ena badina be ai sibona lasi. Aiemai haroro ena badina be Keriso Iesu, ia be Lohiabada. Ai ese Iesu ena hereva ai badinaia noho, unai dainai ai be umui emui hesiai taudia.

⁶Guna neganai Dirava ia hereva, ia gwau, “Dibura dekena amo diari do ia hedinarai.” Unai Dirava danu ese aiemai lalona dekenai iena diari ia atoa, ai do ia hadiaria totona. Inai diari be inai bamona: Ai diba momokani Dirava ena hairai diarina be Keriso ena vairana dekenai ia hedinarai noho.

⁷To ai, inai diari ai abia vadaeni taudia, be hodu, manoka gaudia sibona bamona do ai noho. Inai anina be taunimanima ibounai do idia diba inai siahu badana be Dirava sibona dekena amo, ai dekena amo ia mai lasi.

⁸Kahana ibounai dekena amo, hisihisi bona metau ai dekenai idia henia noho, to ai idia hadikaia momokani lasi. Nega haida ai laloa daradara, to gaukara dekena amo ai doko lasi.

⁹Taunimanima momo ese ai idia dagedage henia, to Dirava ese ai ia rakatania lasi. Ai idia botaia, ai moru, to ai mase lasi.

¹⁰Nega ibounai aiemai tauanina dekenai Iesu ena mase ai abia loaloa noho, Iesu ena mauri danu aiemai tauanina dekenai taunimanima do idia itaia totona.

¹¹Aiemai mauri dinadia ibounai, Iesu ena gaukara ai karaia noho dainai, haida ese ai idia alaia gwauraia. Inai ai karaia, be Iesu ena mauri aiemai tauanina dekenai taunimanima do idia itaia totona.

¹²Unai kara dainai mase be aiemai lalona dekenai ia gaukara noho, to umui emui lalona dekenai mauri ia gaukara noho.

¹³Buka Helaga ia torea, ia gwau: “Lau be Dirava lau abidadama henia, vadaeni hereva lau gwauraia.” Aiemai abidadama be unai ia torea hereva bamona, ai danu be ai abidadama noho, unai dainai ai danu ai hereva noho.

¹⁴Ai diba vadaeni Lohiabada Iesu ia hatorea isi Dirava ese ai danu do ia hatorea isi, Iesu danu. Vadaeni unai neganai, ai bona umui be Dirava ena vairana dekenai do ita gini.

¹⁵Inai kara ibounai be umui durua totona idia vara noho, bona Dirava ena hariharibada be taunimanima momo herea ese do idia davaria totona. Unai dekena amo unai taunimanima momo herea ese Dirava do idia hanamoa bada herea momokani.

¹⁶Unai dainai ai be hesiku diba lasi. Aiemai tauanina be idia bodaga lao noho, to aiemai lauma be dina ibounai idia matamata lao noho.

¹⁷Badina be hari ai abia noho hisihisi be metau lasi gaudia, bona do idia noho nega daudau lasi. Oibe, inai hisihisi maragi idia ore murinai, Dirava ese ai do ia hanamoa bada herea momokani guba dekenai, ela bona hanaihanai.

¹⁸Unai dainai matana dekenai ita itaia gaudia be do ita laloa lasi, to matana dekenai ita itaia lasi gaudia do ita laloa. Matana dekenai ita itaia gaudia be idia noho nega daudau lasi, to matana dekenai ita itaia lasi gaudia be nega hanaihanai do idia noho.