Read Buka Helaga (Hiri Motu) 1993 2 KORINTO 5 Bible Online

2 KORINTO 5 - Buka Helaga (Hiri Motu) 1993 bible

2 KORINTO 5

¹Ita be inai bamona ita diba: Inai tanobada dekenai ita noho palai ruma, iseda tauanina, bema ia dika neganai, Dirava ese iena ruma ta guba dekenai be ita dekenai do ia henia. Inai ruma be taunimanima ese idia karaia lasi, to ia be noho hanaihanai gauna.

²Momokani, iniseni ia noho ruma dekenai ita noho neganai be ita tai noho, ita ura bada iseda guba ruma dekenai ita noho.

³Vadaeni guba ruma dekenai ita noho neganai, ita be mai iseda guba tauanina.

⁴Inai tanobada palai ruma dekenai ita noho neganai, iseda maduna metau dainai ita tai noho. Ita ura momokani lasi iseda tanobada tauanina ita kokia, to ita ura iseda guba tauanina do ita atoa, vadaeni mauri ese mase ena gabu do ia abia.

⁵Iseda mauri dekenai inai senisi do ia vara totona, Dirava ese iseda dala ia karaia hegaegae vadaeni. Bona ia ese iena Lauma Helaga ita dekenai ia henia vadaeni, momokani ena toana bamona. Inai bamona karaia ia karaia dainai, ita diba momokani iena gwauhamata gaudia ibounai dohore ita abia.

⁶Unai dainai iseda lalona bona iseda kudouna idia goada noho nega ibounai. Io, dahaka dahaka ia vara, ita be gari ta lasi, badina ita diba Lohiabada bona iena guba dekenai ita noho diba lasi, bema inai tauanina dekenai ita do noho neganai.

⁷Iseda abidadama dekena amo ita diba inai gaudia be momokani. Badina iseda mauri be abidadama kara dekena amo, itaia kara dekena amo lasi.

⁸Io, iseda lalona bona kudouna idia goada noho, bona ita ura bada iseda tanobada tauanina ita rakatania, vadaeni Lohiabada dekenai do ita noho.

⁹To iseda ura badana momokani be inai: Dirava ia ura henia karadia sibona do ita karaia, do ia moale totona. Inai bamona do ita karaia, iniseni ita noho neganai, o unuseni, guba dekenai ita noho neganai.

¹⁰Badina ita ibounai be Keriso ena Kota gabuna dekenai dohore ita gini. Vadaeni iseda tauanina dekenai ita karaia karadia edia davana do ita abia, namo o dika.

¹¹Vadaeni, Lohiabada ai gari henia dainai, ai ese taunimanima ai sisiba henia goada, do idia abidadama henia totona. Aiemai laloa ibounai be Dirava ia diba, ia diba aiemai laloa be maoromaoro momokani. Lau ura bada umui danu umui diba aiemai laloa be maoromaoro momokani.

¹²Inai hereva dekenai ai ura aiemai ladana ai hanamoa lou gwauraia, a? Lasi, to badina korikori be, ai ura umui ese ai do umui heagilaia diba, taunimanima haida edia vairanai. Badina be taunimanima haida ese tau ta ena toana idia laloa momo, to iena lalona bona kara idia laloa lasi. Bona ai ura inai bamona laloa kerere taudia do umui haere henia diba.

¹³Bema ai be kava, unai be Dirava ena gaukara ai karaia dainai. Bema ai laloa maoromaoro, unai be umui durua totona.

¹⁴Keriso ena lalokau ese ai ia biagua noho, badina be hari ai diba momokani Tau tamona ese taunimanima ibounai dainai ia mase. Inai anina be ita ibounai Keriso danu ita mase hebou vadaeni.

¹⁵Oibe, Keriso ese taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna, ena mauri bona iena ura gaudia do ita laloa bona karaia.

¹⁶Unai dainai, hari ia lao, tau ta, iena toana sibona dekena amo do ita laloa lasi. Guna be Keriso ita laloa iena tauanina toana dekena amo, to harihari be unai dala dekena amo do ita laloa lasi.

¹⁷Bema tau ta Keriso danu ia hakapua tamona neganai, unai tau be tau matamatana. Iena kara gunadia be idia ore, mauri matamata ia abia vadaeni inai.

¹⁸Inai kara ibounai be Dirava ese ia karaia. Guna ita be Dirava danu ita turana lasi, to Keriso ena kara dekena amo, Dirava ese iena turana ita ia halaoa vadaeni. Bona ia ese gaukara ta ai dekenai ia henia, gauna inai: Taunimanima do ai veria, do ai haroro henia, ela bona idia danu Dirava ena turana idia lao.

¹⁹Aiemai haroro hereva be inai: Dirava be Keriso lalonai ia noho, bona ia ese Keriso dekena amo, tanobada taudia danu ia turana karaia noho. Keriso lalonai, Dirava ese edia kara dika ia laloatao lasi. Inai bamona haroro gaukara Dirava ese ai dekenai ia henia vadaeni, taunimanima be ia danu do idia turana karaia totona.

²⁰Unai dainai ai be Keriso ena hereva gwauraia hedinarai taudia, Dirava ese aiemai uduna dekena amo umui dekenai ia noia noho. Vadaeni Keriso ena ladana dainai umui ai noia, Dirava do umui dagedage henia lou lasi, to ia danu do umui turana karaia.

²¹Keriso be kara dika lasi momokani, to Dirava ese dika ia karaia Tauna dekenai ia halaoa vadaeni ita dainai. Vadaeni bema Keriso lalonai ita noho neganai, Dirava ena kara maoromaoro do ita abia.