Read Buka Helaga (Hiri Motu) 1993 GALATIA 6 Bible Online

GALATIA 6 - Buka Helaga (Hiri Motu) 1993 bible

GALATIA 6

¹Lauegu varavara taudia e, bema Keristani tauna ta ia kerere neganai, umui Lauma Helaga umui kamonai henia taudia ese unai tau do umui hakaua lou, mai manau danu. To umui naria namonamo, dibagani ese umui danu do ia koia garina.

²Umui ta ta dekenai umui durua henia, emui metau do umui huaia totona. Inai dala dekenai Keriso ena taravatu do umui badinaia.

³Bema tau ta sibona inai bamona ia laloa, “Lau be namo,” to momokani ia be namo lasi neganai, ia be sibona ia koia.

⁴Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To bema iena kara be tau ta ena kara danu ia hahegeregerea, unai tau do ia gwauraia kerere totona, unai be namo lasi.

⁵Badina be ibounai ta ta sibona ena metau, ena metau do idia huaia.

⁶Dirava ena hadibaia hereva ia tahua tauna ese iena hadibaia tauna dekenai harihari gaudia do ia henia be namo, iena gaukara davana.

⁷Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia.

⁸Bema tauanina ena ura ia hadoa neganai, ia ese mase do ia abia. Bema Lauma ena gau ia hadoa neganai, ia ese mauri hanaihanai do ia abia.

⁹Kara namodia ita karaia be namo, ita hesiku lasi. Bema ita manoka lasi, nega do ia ginidae huahua do ita abia.

¹⁰Unai dainai, dala ita davaria neganai, taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.

¹¹Mani umui itaia, inai toretore be revareva badadia egu imana dekenai umui dekenai lau torea noho.

¹²Tau haida idia hereva goada noho, umui ese kopina utua kara do umui abia. Badina dahaka inai bamona idia karaia? Badina ta be inai: Idia ura taunimanima ibounai ese idia do idia hanamoa. To badina korikori be inai: Idia laloa, “Namo lasi haida idia diba ita be Keriso ena satauro ita abidadama henia, ita do idia alaia mase garina.”

¹³Idia ese kopina utua kara idia abia, to Taravatu idia kamonai henia lasi. Idia ura be kopina utua kara do umui abia, taunimanima edia hanamoa bada do idia abia totona.

¹⁴To lau be gau ta do lau heagilaia lasi, iseda Lohiabada Iesu Keriso ena satauro sibona do lau heagilaia. Badina be Iesu ena satauro dekena amo, lau dekenai tanobada gaudia idia mase, bona lau be tanobada gaudia dekenai lau mase.

¹⁵Kopina utua kara, bona kopina utua lasi kara ruaosi be anina lasi. To gau ta be mai anina bada herea: Vara matamata, Dirava ese ita dekenai ia havaraia gauna.

¹⁶Inai bamona laloa idia abia dae bona badinaia taudia be namo. Dirava ena maino bona bogahisihisi be idia edia latanai do ia noho, badina inai taudia be Dirava ena Israela momokani orea taudia.

¹⁷Lauegu hereva dokona be inai: Tau ta ese lau dekenai hisihisi do ia henia lou lasi. Badina be lauegu kopina ena bero toana ese idia hedinaraia lau be Iesu ena hesiai tauna mai guia danu.

¹⁸Lauegu varavara taudia e, iseda Lohiabada Iesu Keriso ena hariharibada, be umui ibounai emui lauma dekenai do ia noho. Amen.