Read Buka Helaga (Hiri Motu) 1993 FILIPI 1 Bible Online

FILIPI 1 - Buka Helaga (Hiri Motu) 1993 bible

FILIPI 1

¹Paulo bona Timoteo, ai be Keriso Iesu ena hesiai taudia, ai ruaosi inai revareva ai torea inai. Leta be umui Dirava ena taudia Filipi dekenai, umui Keriso Iesu lalonai umui noho taudia, mai emui gunalaia taudia bona durua taudia dekenai danu.

²Ai ura be Dirava iseda Tamana bona Lohiabada Iesu Keriso ese hariharibada bona maino umui dekenai do idia henia.

³Umui lau laloa negadia ibounai Dirava lau tanikiu henia noho.

⁴Bona umui totona lau noinoi neganai, lauegu guriguri be mai moale danu,

⁵badina be umui ese lau umui durua noho, Sivarai Namona do lau harorolaia totona. Emui durua ia doko lasi, umui matamaia dinana ia mai bona hari.

⁶Bona lau diba momokani, inai gaukara namona umui lalonai ia hamatamaia Diravana ese unai gaukara do ia naria noho, ela bona ia karaia haorea Keriso Iesu ia giroa mai dinana dekenai.

⁷Umui lau lalokau henia bada, bona inai lalokau be maoro danu, badina be inai: Umui bona lau be Dirava ena hariharibada ita abia hebou vadaeni. Inai hariharibada ia noho, harihari, dibura ruma lalonai lau noho neganai. Bona guna danu, dibura ena murimuri dekenai lau noho, Sivarai Namona ena momokani lau gwauraia, bona Keriso lau harorolaia neganai, unai hariharibada ia noho.

⁸Lau hereva momokani Dirava ena vairana dekenai, Keriso Iesu ena lalokau bada ese egu lalokau umui dekenai ia havaraia vadaeni.

⁹Dirava lau noia noho inai bamona: Umui emui lalokau be do ia bada lao noho, mai emui laloa diari, bona mai emui aonega danu.

¹⁰Unai dekena amo gau namodia edia toana do umui diba. Vadaeni mai goeva danu, bona kerere lasi do umui noho, ela bona Keriso do ia giroa mai dinana.

¹¹Umui emui kara ibounai be do idia namodia momokani. Iesu Keriso sibona ese inai bamona kara ia havaraia diba, Dirava ese hanamoa bona hairai do ia abia totona.

¹²Lauegu varavara taudia e, lau ura umui diba, inai lau dekenai idia vara gaudia ese Sivarai Namona idia koua lasi. Lasi, inai lauegu hisihisi ese Sivarai Namona ia durua bona ia hatubua noho.

¹³Badina be Kaisara ena ruma idia gimaia tuari taudia ibounai, bona iniseni idia noho taudia ibounai danu idia diba vadaeni, Keriso ena hesiai gaukara dainai lau be dibura ruma dekenai lau noho.

¹⁴Bona Keristani varavara taudia momo ese lau idia laloa, Keriso dainai dibura lalonai lau noho. Vadaeni inai idia laloa noho dainai, edia lalona ese goada idia davaria. Edia gari idia laloa lasi, bona Sivarai Namona idia harorolaia goada noho.

¹⁵Momokani, haida ese egu gaukara namona dainai lau idia mama henia. Idia ura lau idia halusia, vadaeni Sivarai Namona idia harorolaia noho. To haida be laloa namona dekenai idia harorolaia.

¹⁶Inai bamona taudia idia diba vadaeni Dirava ese Sivarai Namona ena momokani do lau gwauraia dagina be lau dekenai ia henia vadaeni. Bona lau idia lalokau henia dainai idia harorolaia.

¹⁷To haida be idia ura idia sibona edia ladana idia habadaia, unai dainai Keriso idia harorolaia. Idia laloa be dibura ruma lalonai lau noho neganai, be lauegu hisihisi do idia habadaia.

¹⁸Herevana! Lau be lau moale noho! Dala koikoi dekenai, o dala momokani dekenai be herevana. To gau badana korikori be inai: Keriso idia harorolaia noho, dala idauidau ibounai dekenai. Unai dainai lau be lau moale noho.

¹⁹Badina be lau diba umui emui guriguri dainai, bona Iesu Keriso ena Lauma ena durua dekena amo, hamauria do lau abia.

²⁰Lauegu ura badana, bona lau laloa bada noho gauna be inai: Egu gaukara do lau karaia namonamo, bona hemarai karana ta do lau karaia lasi. Lau ura harihari, bona nega ibounai, Keriso do lau gwauraia hedinarai, mai gari lasi danu, bona mai egu lalona ibounai. Unai dekena amo taunimanima do idia diba Keriso ena siahu be bada momokani. Oibe, lau mauri o lau mase, be gau ta lasi, gau badana be Keriso do lau hanamoa.

²¹Badina be, mauri be dahaka? Lau dekenai mauri ena badina be, Keriso danu lau noho. Bona bema lau mase neganai, namo ma bada herea do lau davaria.

²²To bema egu mauri dekena amo gaukara namona ma lau karaia diba, sedira edena dala do lau abia hidi? Mase do lau abia hidi, o mauri do lau abia hidi?

²³Egu ura be rua, lau daradara noho. Lau ura bada Keriso dekenai do lau lao. Unai be namo herea.

²⁴To umui durua totona, namona be lau mauri noho.

²⁵Lau diba inai be maoro, unai dainai do lau mauri noho, umui ibounai durua totona. Bona do umui tubu daekau, bona Keriso do umui abidadama henia mai moale danu, inai ia vara totona umui do lau durua noho.

²⁶Vadaeni umui dekenai do lau giroa mai neganai, Keriso Iesu do umui hanamoa diba lau dainai, badina umui be Keriso lalonai umui noho taudia.

²⁷Gau badana be inai: Keriso ena Sivarai Namona ena dala hegeregerena do umui mauri noho. Vadaeni umui dekenai lau noho, o umui dekenai lau noho lasi neganai, do lau diba umui gini goada noho. Bona do lau diba, mai emui laloa tamona bona ura tamona, Sivarai Namona abidadama henia totona do umui tuari hebou noho.

²⁸Bona Sivarai Namona ena tuari lalonai do umui gini goada, umui idia tuari henia taudia do umui gari henia lasi. Emui gari lasi idia itaia neganai, do idia diba momokani idia kwalimu diba lasi. Badina be Dirava ese hamauria umui dekenai do ia henia.

²⁹Dirava ese iena hariharibada umui dekenai ia henia, Keriso dekenai do umui abidadama henia totona. To inai sibona lasi. Dirava ese danu hariharibada umui dekenai ia henia, Keriso dainai do umui hisihisi totona.

³⁰Guna umui ese lau umui itaia, Sivarai Namona totona lau tuari, bona hari umui kamonai, lau do tuari noho. Vadaeni hari umui ese lau danu ita hisihisi noho, badina ita be tuari tamona lalonai ita tuari hebou noho.