Read Buka Helaga (Hiri Motu) 1993 FILIPI 3 Bible Online

FILIPI 3 - Buka Helaga (Hiri Motu) 1993 bible

FILIPI 3

¹Vadaeni, lauegu varavara e, Lohiabada lalonai umui noho dainai, do umui moale. Inai hereva tamona umui dekenai lau torea lou, torea lou, lau hesiku lasi. Badina be inai bamona moale ese umui do ia hamauria.

²Dika bada idia karaia noho taudia, unai sisia, do umui naridia namonamo. Idia ese tauanina idia utua kava gwauraia.

³To ita ese kopina utua kara korikori ita abia vadaeni, idia be lasi. Badina be Lauma Helaga dekena amo Dirava ita tomadiho henia noho, bona Keriso Iesu danu ita hakapua noho, bona tauanina ena toana gauna ita abidadama henia lasi.

⁴Lau ese tauanina ena toana gaudia lau abidadama henia diba. Sedira tau haida ese tauanina ena toana idia abidadama henia, to lau ese idia lau hereaia diba.

⁵Lau vara, vadaeni pura tamona murinai lauegu kopina idia utua. Lau be Israela besena tauna lau vara, lauegu iduhu be Beniamina. Lauegu sene taudia danu be Heberu. Iuda edia Taravatu lau badinaia momokani, badina lau be Farisea orea tauna.

⁶Lauegu goada lau hedinaraia, lau ese ekalesia lau dagedage henia. Bema tau ta ese kara maoromaoro ia davaria diba Taravatu ia badinaia dekena amo, lau be kerere ta lasi momokani.

⁷To inai guna lau idia hanamoa gaudia, be harihari Keriso dainai, lau gwau idia be dika.

⁸Oibe, inai gaudia sibona lasi, to gau ibounai lau laloa be anina lasi gaudia, inai mai anina bada gauna do lau abia totona, gauna be inai: Keriso Iesu, lauegu Lohiabada do lau diba momokani. Ia dainai gau ibounai lau negea vadaeni. Lau laloa idia be momoru, Keriso do lau abia momokani totona.

⁹Lau ura be Keriso danu do lau hakapua momokani. Lau sibona egu kara maoromaoro, Taravatu lau badinaia dekena amo, be hari lau dogoatao lasi. Hari lau dogoatao noho kara maoromaoro, be Keriso lau abidadama henia dekena amo lau davaria gauna. Dirava ia henia kara maoromaoro be abidadama dekena amo.

¹⁰Lauegu ura bada be Keriso, bona iena toreisi lou siahuna do lau diba. Bona lau ura ia ese ia abia hisihisi be lau danu do lau abia, iena mase dalana dekenai danu lau ura do lau mase.

¹¹Unai dala dekenai, mase dekena amo toreisi lou do lau davaria.

¹²Lau gwau lasi lau kwalimu vadaeni, o lau goeva momokani vadaeni. Lasi, to mai egu goada ibounai kwalimu ahuna lau tahua noho, do lau dogoatao gwauraia. Keriso Iesu ia ura inai bamona do lau goadalaia, bona inai totona ia ese lau ia abia, iena murinai do lau raka.

¹³Lauegu varavara taudia e, lau laloa lasi, inai kwalimu ahuna lau abia vadaeni. To kara tamona lau goadalaia noho, lauegu kara gunadia lau laloaboio, bona vaira neganai gaudia do lau goadalaia.

¹⁴Unai dainai heau helulu ena dokona gabuna dekenai maoromaoro lau heau henia, kwalimu ahuna do lau abia totona. Inai kwalimu ahuna be guba dekenai mauri matamata, Dirava ese lau ia boiria totona gauna, Keriso Iesu dainai.

¹⁵Lauma ena gaudia dekenai ita goada vadaeni taudia be inai lauegu laloa bamona do ita laloa be namo. To bema umui haida emui laloa be idau, Dirava ese emui lalona do ia hadiaria diba.

¹⁶Gau badana be inai: Guna ita abia dae hadibaia hereva ena dala do ita badinaia noho be namo.

¹⁷Lauegu varavara e, lauegu kara bamona do umui karaia. Bona aiemai kara bona hereva idia badinaia taudia do umui kamonai henidia.

¹⁸Badina be umui lau hamaoroa guna, bona hari, mai tai danu umui lau hamaoroa lou: Haida be idia raka kerere, idia ese Keriso ena mase satauro dekenai ena anina idia hadikaia noho.

¹⁹Edia dokona be hel dekenai, badina be edia dirava be edia tauanina ena ura. Edia hemarai karadia idia heagilaia, bona inai tanobada gaudia sibona idia laloa.

²⁰To iseda hanua korikori be guba. Bona iseda Hamauria Tauna, Lohiabada Iesu Keriso, ita naria noho, guba dekena amo do ia mai.

²¹Sibona ena siahu bada dekena amo, Keriso ese gau ibounai be iena henunai do ia atodia, bona do ia biagudia noho. Ma inai bamona siahu bada dekena amo, Keriso ese iseda tauanina manokadia bona dikadia do ia senisia, bona iena tauanina mai hairaina danu ena toana bamona, iseda tauanina do ia halaoa.