Read Buka Helaga (Hiri Motu) 1993 IOSUA 12 Bible Online

IOSUA 12 - Buka Helaga (Hiri Motu) 1993 bible

IOSUA 12

¹Israela taudia ese guna Ioridane Sinavai ena dina daekau tanona idia halusia, bona idia noholaia. Tano be inai: Aranona Sinavai dekena amo ela bona Heremona Ororo, bona Arabaha tano palaka ena dina daekau kahana ibounai. Inai gabudia edia king taudia be inai:

²Ta ena ladana be Sihona. Ia be Amoro taudia edia king, bona Hesebona hanua dekenai ia noho. Sihona ena basileia ena lalonai be Gileada tano kahana. Inai tano be Aroere, Aranona Koura ena isena dekenai, bona inai koura ena huanai ia noho hanua dekena amo ela bona Iaboka Sinavai, Amono taudia edia tano hetoana.

³Bona Arabaha ena dina daekau kahana tano danu be Sihona ena, Galilea Gohu ena dina daekau kahana dekena amo ela bona Bete Iesimoto, ela bona Davara Mase, bona diho kahana tano ela bona Pisiga Ororo ena henuna tanona.

⁴Ma king ta Israela taudia ese idia halusia guna, iena ladana be Oga, Basana ena king. Ia be Repaima tauna, bona Repaima taudia be kahirakahira ibounai idia mase ore, tamona tamona idia do noho. Oga be Asataroto hanua bona Ederei hanua dekenai ia noho.

⁵Iena basileia ena tano be Heremona Ororo, bona Saleka, bona Basana tano ibounai ela bona Gesuru taudia bona Makata taudia edia tano hetoana. Gileada tano kahana danu be Oga ena, ela bona Sihona, Hesebona ena king, ena tano hetoana.

⁶Inai king ruaosi be Mose bona Israela taudia ese idia halusia. Mose, Lohiabada ena hesiai tauna ese inai king ruaosi edia tano ia abia, Rubena iduhu taudia bona Gado iduhu taudia, bona Manase iduhu kahana taudia dekenai ia henia, edia tano korikori.

⁷Iosua bona Israela taudia ese Ioridane Sinavai ena dina diho kahanai noho taudia idia halusia, Bala Gado dekena amo, Lebanona Koura dekenai, ela bona Halaka Ororo, Seiri kahana dekenai. Vadaeni Iosua ese unai tano ia abia, Israela iduhu edia huanai ia haria, iduhu ta ta dekenai, edia tano, edia tano ia henia. Unai tano be edia tano korikori ia lao, ela bona nega ibounai. Unai tano lalonai inai kahadia idia noho:

⁸Ororo gabudia, dina ia diho kahana ororo edia henunai tanodia, Arabaha ena tano palaka, dina daekau kahana ena ororo hekei gabudia, tano kaukau, bona Negebe tanona. Unai tanodia dekenai be guna inai bese taudia idia noho: Hiti taudia, Amoro taudia, Kanana taudia, Perisi taudia, Hivi taudia, bona Iebusu taudia.

⁹Israela taudia ese inai hanua badadia edia king taudia idia halusia: Ieriko ena king, Ai ena king. (Ai hanua be Betele hanua kahirakahira.)

¹⁰Ierusalema ena king, Heberona ena king,

¹¹Iaramutu ena king, bona Lakisi ena king.

¹²Egalona ena king, Gesere ena king.

¹³Debiri ena king, Gedere ena king.

¹⁴Horoma ena king, Arada ena king.

¹⁵Libini ena king, Adulama ena king.

¹⁶Makeda ena king, Betele ena king.

¹⁷Tapua ena king, Hepere ena king.

¹⁸Apeka ena king, Lasarono ena king.

¹⁹Madona ena king, Hasoro ena king.

²⁰Simarona Merona ena king, Akasapa ena king.

²¹Tanaka ena king, Megido ena king.

²²Kedesi ena king, Iokoneama ena king. (Iokoneama be Karamele dekenai.)

²³Doro ena king, (Doro be Napata Doro dekenai), Goimi ena king. (Goimi be Gilegala dekenai.)

²⁴Tirisa ena king. Israela ese inai king ibounai 31 idia halusia, bona edia tano idia abia.