Read Buka Helaga (Hiri Motu) 1993 IOSUA 19 Bible Online

IOSUA 19 - Buka Helaga (Hiri Motu) 1993 bible

IOSUA 19

¹Iosua ese laki gadara dekena amo tano ia abia hidi iduhu iharuana totona be Simeona, iena bese ta ta dekenai. Simeona taudia edia tano be Iuda taudia edia tano ena huanai.

²Inai tano ena lalonai be inai hanua: Bere Sieba, Sieba, Molada,

³Hasasuala, Bala, Eseme,

⁴Eletolada, Betulu, Horoma,

⁵Sikilaga, Bete Makaboto, Hasa Susa,

⁶Bete Lebaoto, Saruhene. Inai be hanua ibounai 13, mai edia hanua maragidia danu.

⁷Inai danu: Aina, Rimono, Etere, Asana. Inai be hanua ibounai 4, mai edia hanua maragidia danu.

⁸Hanua maragidia ibounai danu, unai hanua idia hagegea gaudia, be Simeona taudia edia, ela bona Balata Bere, ena ladana ta be Rama, Negebe kahana dekenai. Simeona iduhu taudia edia hanua, mai edia tano be unai, edia bese ta ta ibounai edia huanai idia haria.

⁹Simeona taudia edia tano be Iuda taudia edia tano lalonai, badina be Iuda ena tano be bada herea. Unai dainai Simeona taudia ese edia tano be Iuda tano ena kahana dekena amo idia abia.

¹⁰Iosua ese tano ia abia hidi iduhu ihatoina totona be Sebuluno, iena bese ta ta dekenai: Edia tano ena hetoana gabuna ta be Saridi.

¹¹Saridi dekena amo hetoana be dina diho kahanai ia lao, ela bona Mareala, ma ela bona Dabesete. Dabesete dekena amo sinavai maragina ena isena dekenai ia lao, Iokoneama ena dina daekau kahana dekenai.

¹²Ma Saridi ena dina daekau kahana dekenai, tano hetoana ia lao, ela bona Kisaloto Taboro.

¹³Ma Kisaloto Taboro dekena amo ela bona Daberata. Vadaeni ia daekau lao, ela bona Iapia. Iapia dekena amo dina daekau kahanai ia lao, ela bona Gata Hepere bona Ete Kasino. Ma ia lao, ela bona Rimono bona Nea.

¹⁴Mirigini kahana dekenai, tano hetoana be Hanatoni dekena amo ia lao, ela bona Ipitahele Koura dekenai ia doko.

¹⁵Inai hanua danu be Sebuluno taudia edia: Katata, Nahalala, Simarona, Idala, bona Betelehema. Edia hanua ibounai be 12, mai edia hanua maragidia danu.

¹⁶Sebuluno taudia edia bese ta ta ibounai ese inai tano idia abia, bona unai hanua danu idia abia, mai edia hanua maragidia danu.

¹⁷Iosua ese tano ia abia hidi iduhu namba 4 totona be Isakara, iena bese ta ta dekenai.

¹⁸Edia tano lalonai inai hanua idia noho: Ieserele, Kesuloto, Suneme,

¹⁹Haparaimi, Sihono, Anaharata,

²⁰Rabiti, Kisiono, Ebese,

²¹Remete, Ene Ganima, Ene Hada, Bete Pase.

²²Edia tano hetoana danu ia lao, ela bona Taboro, Sahasuma, bona Bete Semese. Vadaeni tano hetoana be Ioridane Sinavai dekenai ia doko. Hanua ibounai be 16, mai edia hanua maragidia danu.

²³Isakara taudia edia bese ta ta ibounai ese inai tano idia abia, bona unai hanua danu idia abia, mai edia hanua maragidia danu.

²⁴Iosua ese tano ia abia hidi iduhu namba 5 totona be Asere, iena bese ta ta dekenai.

²⁵Edia tano lalonai inai hanua idia noho: Helekata, Hali, Betene, Akasapa.

²⁶Alamaleka, Amada, Misala. Dina diho kahana dekenai, Asere ena tano hetoana be ia lao, Karamele bona Sihoro Libinata hanua ruaosi dekenai ia kamokau.

²⁷Unai gabu dekena amo dina daekau kahana dekenai ia lao, ela bona Bete Dagona bona Sebuluno bona Ipitahele Koura, ma mirigini kahanai ia lao, ela bona Bete Emeka bona Neiele. Ma mirigini kahana ia lao, ela bona Kabulu dekenai.

²⁸Tano hetoana ma ia lao, ela bona Eberona, bona Rehoba, bona Hamona, bona Kana, ma ia lao, ela bona hanua badana Sidono.

²⁹Sidono dekena amo tano hetoana ma ia lao, ela bona Rama, ela bona magu badana hanua, Turo. Turo dekena amo ia lao, ela bona Hosa, bona Davara Badana ena kone dekenai ia doko. Inai hanua danu be Asere ena: Mahalaba, Akasiba,

³⁰Umaha, Apeka, Rehoba. Asere edia hanua ibounai be 22, mai edia hanua maragidia danu.

³¹Asere taudia edia bese ta ta ibounai ese inai tano idia abia, bona unai hanua danu idia abia, mai edia hanua maragidia danu.

³²Iosua ese tano ia abia hidi iduhu namba 6 totona be Napatali, iena bese ta ta dekenai:

³³Edia tano hetoana be Helepe dekenai ia matamaia, ouki auna Sananima dekena amo, bona Adami Nekebe, Iabinele, bona Lakumu ia hanaia, bona Ioridane Sinavai dekenai ia doko.

³⁴Tano hetoana be dina diho kahana dekenai ia lao, ela bona Asinoto Taboro, ma unuseni dekena amo ela bona Hukoko. Diho kahana dekenai Napatali ena tano hetoana be Sebuluno ena hetoa hegeregerena, bona dina diho kahanai, ena tano hetoana bona Asere be hetoa tamona. Ioridane Sinavai be Napatali ena dina daekau kahanai tano hetoana.

³⁵Napatali ena hanua mai magudia danu be inai: Sidima, Sere, Hamata, Rakata, Kinerete,

³⁶Adama, Rama, Hasoro,

³⁷Kedesi, Ederei, Ene Hasoro,

³⁸Irono, Migidalele, Horeme, Bete Anata, Bete Seme. Ena hanua ibounai be 19, mai edia hanua maragidia danu.

³⁹Napatali taudia edia bese ta ta ibounai ese inai tano idia abia, bona unai hanua danu idia abia, mai edia hanua maragidia danu.

⁴⁰Iosua ese tano ia abia hidi iduhu namba 7 totona be Dano, iena bese ta ta dekenai.

⁴¹Edia tano lalonai inai hanua idia noho: Sora, Esetaoli, Iri Semese,

⁴²Salabina, Aialono, Itila,

⁴³Elona, Timuna, Ekarona,

⁴⁴Eleteke, Gibetona, Balata,

⁴⁵Iehuda, Beneberaka, Gata Rimono,

⁴⁶Meiakono, Rakono, bona Iopa kahana ena tano.

⁴⁷To gabeai inai gabu noho taudia ese Dano taudia idia tuari henia. Idia ese Dano taudia idia lulua lao. Vadaeni Dano taudia ese idia toreisi, idia lao, Laisi taudia idia tuari henia. Laisi hanua idia abia, bona hanua taudia idia alaia ore. Vadaeni Dano taudia be Laisi hanua dekenai idia noho, bona ena ladana idia atoa Dano, edia sene tauna ena ladana.

⁴⁸Dano taudia edia bese ta ta ibounai ese inai tano idia abia, bona unai hanua danu idia abia, mai edia hanua maragidia danu.

⁴⁹Tano be idia haria haorea, bona tano hetoana ibounai idia gwauraia ore neganai, Israela taudia ese Iosua Nunu dekenai tano ta idia henia, idia edia huana dekenai.

⁵⁰Lohiabada ena oda hegeregerena, idia ese Iosua ia noia hanua, be ia dekenai idia henia, ladana be Timinata Sera, Eparaima ena ororo tano dekenai. Iosua ese unai hanua ma ia haginia lou, bona unuseni ia noho.

⁵¹Eleasara, hahelagaia tauna, Iosua Nunu, bona Israela iduhu gunalaia taudia ese laki gadara dekena amo inai tano kahana ibounai iduhu ta ta dekenai idia haria, Silo dekenai, Lohiabada ena vairanai. Idia haria gabuna be Lohiabada ena Palai Dubu. Tano haria gaukara be unai bamona idia karaia haorea.