Read Buka Helaga (Hiri Motu) 1993 IOSUA 22 Bible Online

IOSUA 22 - Buka Helaga (Hiri Motu) 1993 bible

IOSUA 22

¹Vadaeni Iosua ese Rubena bona Gado iduhu taudia bona Manase iduhu kahana taudia ia boiria mai.

²Idia dekenai ia hereva, ia gwau, “Lohiabada ena hesiai tauna Mose ese umui ia oda henia kara ibounai be umui karaia vadaeni. Lauegu oda ibounai danu be umui ese umui kamonai henia vadaeni.

³Emui varavara Israela taudia be nega ta umui rakatania lasi ia mai bona harihari. Lohiabada, emui Dirava ena oda danu umui kamonai henia namonamo.

⁴Harihari, Lohiabada, emui Dirava, ese emui varavara Israela taudia dekenai maino ia henia vadaeni, ia gwauhamata henia hegeregerena. Unai dainai do umui giroa lou, emui tano korikori, Lohiabada ena hesiai tauna Mose ese umui dekenai ia henia tano, Ioridane Sinavai unai kahana dekenai do umui giroa lou.

⁵Lohiabada ena hesiai tauna Mose ese umui dekenai ia henia oda bona taravatu do umui kamonai henia momokani. Bona Lohiabada, emui Dirava, do umui lalokau henia, iena dala dekenai do umui raka namonamo, bona iena oda do umui kamonai henia. Io, Lohiabada do umui badinaia momokani, bona iena hesiai gaukara do umui karaia, mai emui kudouna ibounai, bona mai emui lauma ibounai danu.”

⁶Unai neganai Iosua ese idia ia hanamoa, bona idia ia siaia lao. Vadaeni idia edia noho rumadia dekenai idia giroa lou.

⁷Manase iduhu kahana taudia dekenai be Mose ese Basana tano ia henia, to Manase ena iduhu ma kahana taudia dekenai Iosua ese edia tano ia henia, Ioridane Sinavai ena dina diho kahanai, edia varavara taudia danu. Vadaeni Rubena, Gado, bona Manase iduhu kahana taudia ia siaia lao neganai Iosua ese idia ia hanamoa, ia gwau,

⁸“Emui noho ruma dekenai do umui giroa lao, mai emui kohu momo, mai emui boromakau bona mamoe, mai emui siliva, golo, auri laboralabora, bona mai emui dabua momo danu. Tuari dekenai umui abia kohu, be umui bona emui varavara taudia danu, emui huanai do umui haria karaia.”

⁹Unai dainai Rubena iduhu, Gado iduhu, bona Manase iduhu kahana taudia be edia gabu korikori dekenai idia giroa lao. Idia ese Israela taudia oredia Silo, Kanana tano dekenai idia rakatania, bona edia tano, Gileada dekenai idia giroa lao hamatamaia. Unai Gileada tano idia abia guna vadaeni, Lohiabada ese Mose dekenai unai bamona ia oda henidia dainai.

¹⁰Idia be Ioridane Sinavai ena isena dekenai, gabu ta ladana Geliloto dekenai idia ginidae, Kanana tano dekenai. Unuseni Rubena iduhu bona Gado iduhu bona Manase iduhu kahana taudia ese boubou patana badana ta idia haginia, Ioridane Sinavai ena badibadinai.

¹¹Haida ese Israela orena taudia idia hamaorolaia, idia gwau, “Kamonai, Rubena taudia bona Gado taudia bona Manase iduhu kahana taudia ese boubou patana ta idia haginia vadaeni, Geliloto, Kanana ena tano hetoana dekenai, Ioridane Sinavai ena badibadinai, iseda tano dekenai!”

¹²Israela taudia ese unai sivarai idia kamonai neganai, idia ibounai be Silo dekenai idia haboua, unai iduhu toi do idia tuari henia gwauraia.

¹³Unai neganai Israela taudia ese hahelagaia tauna Eleasara ena natuna Pineha idia siaia, Gileada tano dekenai do ia lao, Rubena, Gado, bona Manase iduhu kahana taudia dekenai.

¹⁴Hanua lohia taudia 10 danu Pineha danu idia siaia, Israela iduhu ta ta dekena amo. Idia ibounai be iduhu kwarana taudia.

¹⁵Idia be Rubena taudia bona Gado taudia, bona Manase iduhu kahana taudia dekenai idia ginidae, Gileada tano dekenai. Vadaeni idia hamaoroa, idia gwau,

¹⁶“Lohiabada ena orea taudia ibounai idia hereva, idia gwau, ‘Inai kerere, umui ese umui havaraia gauna, ena anina be dahaka? Israela ena Dirava dekenai kerere umui karaia vadaeni. Hari dina dekenai umui ese Lohiabada dekena amo umui raka siri, iena hereva umui kamonai henia lasi, boubou patana ta umui haginia vadaeni.

¹⁷Iseda kara dika Peoro dekenai ia bada lasi, a? Lohiabada ese gorere bada iena bese dekenai ia atoa, edia kara dika ena davana. Ita ese inai kerere ena hisihisi ita abia noho. Umui laloa unai kerere be davana lasi, bona umui ura kerere ma ta do umui karaia lou, a?

¹⁸Edena bamona, hari umui ura lasi Lohiabada ena murinai do umui raka, a? Bema hari dina Lohiabada ena hereva umui negea, kerukeru ia ese Israela besena ibounai do ia badu henia.

¹⁹“ ‘Bema emui tano be guriguri totona ia goeva lasi neganai, namona be do umui hanaia lou, Lohiabada ena tano, iena Palai Dubu ia noho tanona, lalonai do umui noho. Aiemai tano haida do umui abia, to Lohiabada dekenai do umui dagedage lasi, bona umui ese ai danu do umui hakererea lasi Lohiabada ena vairana dekenai. Boubou patana idauna ta, iseda Dirava, Lohiabada ena lasi, be do umui haginia lasi.

²⁰Akana, Sera ena natuna do umui laloa, ia ese Lohiabada ia taravatua gaudia ia abia kava, bona unai kerere ena davana be, Israela taudia ibounai ese idia davaria, ani? Akana ena kerere davana be mase, be ia sibona lasi, to iseda bese taudia momo idia mase.’ ”

²¹Vadaeni Rubena taudia bona Gado taudia bona Manase iduhu kahana taudia ese Israela ena lohia taudia idia haere henia, idia gwau,

²²“Dirava korikori be Lohiabada! Dirava korikori be Lohiabada! Ia ese aiemai kara ena anina ia diba, bona ai ura Israela taudia ibounai do idia diba danu! Bema Lohiabada dekenai ai dagedage, o bema iena vairana dekenai ai kara dika neganai, hari dina ai do umui alaia mase!

²³“Bema ai ese Lohiabada ena hereva ai negea, bona inai boubou patana be ai ese ai haginia, ai sibona ese gabua bouboudia, o paraoa bouboudia, o maino karaia bouboudia do ai karaia totona, Lohiabada ese davana ai dekenai do ia henia.

²⁴To lasi, ai ese unai boubou patana ai haginia ena anina be inai: Nega gabeai sedira umui emui natudia ese aiemai natudia do idia gwau henia, do idia gwau, ‘Badina dahaka umui ese Lohiabada, ai Israela taudia emai Dirava dekenai umui tomadiho?

²⁵Lohiabada ese Ioridane Sinavai be ai bona umui Rubena bona Gado taudia iseda huanai ia atoa, tano hetoana. Umui be Lohiabada ena taudia lasi.’ Emui natudia bema unai bamona do idia hereva neganai, sedira aiemai natudia ese Lohiabada tomadiho henia kara do idia hadokoa.

²⁶“Unai dainai ai sibona ai herevahereva, ai gwau, ‘Namona be, boubou patana ta do ita haginia, gabua boubou totona lasi, o boubou ta totona lasi gauna.’

²⁷To toa gauna sibona, ai bona umui, iseda huanai, bona aiemai bese, bona emui bese edia huanai. Inai toa ena anina be, ai ese Lohiabada ai tomadiho henia noho momokani, iena Palai Dubu korikori dekenai. Unuseni gabua bouboudia, kara dika totona bouboudia, bona maino karaia bouboudia do ai karaia noho. Vadaeni nega gabeai umui emui natudia ese aiemai natudia dekenai inai bamona do idia gwau diba lasi, ‘Umui be Lohiabada ena bese taudia lasi.’

²⁸“Bona ai laloa, bema nega ta inai bamona ai dekenai, o aiemai natudia dekenai idia hereva neganai, aiemai natudia do idia gwau, ‘Umui itaia! Aiemai tubudia ese boubou patana ta idia haginia, iena toana be Lohiabada ena boubou patana bamona. To ia be gabua bouboudia totona lasi, o boubou haida totona lasi, ia be toa ta sibona, aiemai taunimanima bona emui taunimanima iseda huanai.’

²⁹“Ai ese Lohiabada do ai dagedage henia diba lasi momokani! Ai ese gabua bouboudia, o paraoa bouboudia, o kara dika totona bouboudia totona boubou patana ta ai karaia lasi momokani! Ai ese Lohiabada, aiemai Dirava ena boubou patana, iena Palai Dubu ena vairana dekenai ia gini noho gauna be do ai rakatania lasi, o haidaua lasi, momokani.”

³⁰Hahelagaia tauna Pineha bona hanua lohia taudia, Israela iduhu kwarana taudia ese Rubena taudia bona Gado taudia, bona Manase taudia edia hereva idia kamonai, vadaeni idia edia lalona idia namo.

³¹Bona Pineha, hahelagaia tauna Eleasara ena natuna ese Rubena, bona Gado, bona Manase taudia ia hamaoroa, ia gwau, “Harihari ai diba Lohiabada be iseda huana dekenai ia noho, badina be umui ese iena hereva umui negea lasi momokani. Bona unai dainai umui ese Lohiabada ena badu dekena amo Israela taudia ibounai umui hamauria vadaeni.”

³²Vadaeni hahelagaia tauna Pineha Eleasara bona hanua lohia taudia ese Rubena taudia bona Gado taudia idia rakatania, Gileada tano dekenai. Idia giroa lou, Kanana tano dekenai idia lao, bona unai sivarai be Israela taudia edia vairanai idia gwauraia.

³³Israela taudia idia moale bada unai hereva dainai. Israela taudia ese Dirava idia hanamoa, bona edia tuari hereva, Rubena bona Gado edia tano hadikaia totona hereva, idia hadokoa.

³⁴To Rubena bona Gado taudia ese unai boubou patana ena ladana idia atoa “Uitnesi.” Idia gwau, “Inai boubou patana be uitnesi ta ita ibounai iseda huana dekenai, Lohiabada tamona sibona be Dirava.”