Read Buka Helaga (Hiri Motu) 1993 2 TESALONIKA 3 Bible Online

2 TESALONIKA 3 - Buka Helaga (Hiri Motu) 1993 bible

2 TESALONIKA 3

¹Aiemai varavara taudia e, aiemai hereva dokona be inai: Ai totona do umui guriguri, vadaeni Lohiabada ena hereva do ia tubu haraga noho. Umui noinoi, taunimanima momo ese mai mataurai danu, Lohiabada ena hereva do idia abia dae, umui ese umui abia dae hegeregerena.

²Umui guriguri danu, Dirava ese kara dika bona kara kerere taudia dekena amo ai do ia hamauria. Badina be taunimanima haida sibona be mai edia abidadama Dirava dekenai.

³To Lohiabada be momokani. Ia ese umui do ia haginia goada, bona Satani dekena amo umui do ia hamauria.

⁴Ai be Lohiabada ai abidadama henia dainai, ai ese umui danu ai abidadama henia. Ai diba momokani, umui dekenai ai hadibaia hereva be umui karaia noho, bona do umui karaia noho.

⁵Lohiabada ese umui emui lalona do ia hakaudia, vadaeni Dirava ena lalokau, bona Keriso ese ia henia haheauka, do umui diba momokani.

⁶Aiemai varavara taudia e, Lohiabada Iesu Keriso ena ladana dainai, umui dekenai ai hereva mai goada danu, inai bamona: Mai lahedo danu idia noho, bona aiemai hereva idia kamonai lasi Keristani taudia, idia dekena amo do umui raka siri.

⁷Umui diba danu aiemai kara bamona umui karaia be namo. Umui dekenai ai noho neganai be ai lahedo lasi.

⁸Badina be ai ese tau ta ena aniani ai ania kava lasi. To dina bona hanuaboi ai gaukara mai hekwarahi danu, ai dainai umui ta ese moni do ia halusia kava garina.

⁹Ai be siahu taudia dainai, umui ese aniani ai dekenai umui henia be maoro. To ai ura lasi, badina be ai ura aiemai manau kara bamona do umui karaia.

¹⁰Ai be umui dekenai ita noho neganai, aiemai hadibaia hereva ta be inai bamona, “Bema tau ta ese gaukara ia karaia lasi neganai, aniani ta umui henia lasi.”

¹¹Inai bamona ai hereva, badina ai kamonai umui haida be umui gaukara lasi, to haida edia gau bona edia kara umui herevalaia kava momo sibona.

¹²Lohiabada Iesu Keriso ena ladana dainai, inai bamona idia karaia noho taudia dekenai ai hereva mai goada danu, bona ai sisiba henidia, ai gwau, “Mai manau danu do umui gaukara, umui noho namonamo, bona umui sibona emui aniani do umui davaria.”

¹³Aiemai varavara taudia e, kara namona karaia totona do umui hesiku lasi.

¹⁴Bema tau ta ese inai revareva, ai torea gauna, ia abia dae lasi neganai, inai tauna be do umui itaia namonamo, vadaeni do umui atoa siri, do ia hemarai totona.

¹⁵Do umui dagedage henia lasi umui tuari henia tauna bamona, to ia be emui tadina bamona do umui sisiba henia sibona.

¹⁶Lohiabada, iseda maino ena badina korikori, ese nega ibounai emui mauri ta ta lalonai, lalo namo do ia henia. Lohiabada be umui ibounai dekenai do ia noho.

¹⁷Inai hanamoa hereva be lau, Paulo, egu imana dekenai lau torea noho. Lauegu revareva ibounai edia dokona kahana dekenai egu ladana lau sainia inai bamona. Inai bamona sibona lau torea.

¹⁸Iseda Lohiabada Iesu Keriso ena hariharibada be umui ibounai dekenai do ia noho.