Read Buka Helaga (Hiri Motu) 1993 1 TIMOTEO 4 Bible Online

1 TIMOTEO 4 - Buka Helaga (Hiri Motu) 1993 bible

1 TIMOTEO 4

¹Lauma Helaga ese ia gwauraia hedinarai vadaeni, nega gabeai tau haida ese Iesu badinaia kara do idia rakatania, lauma koikoidia do idia kamonai henia, bona lauma dikadia edia hadibaia hereva do idia abia dae.

²Inai hadibaia hereva be koikoi taudia ese do idia gwauraia. Edia laloa maoromaoro dalana idia hamasea vadaeni, auri siahu herea ese edia lalona ia gabua dikadika bamona.

³Idia ese taunimanima do idia taravatua, idia gwau do idia headava lasi, bona aniani haida do idia ania lasi. To unai aniani be Dirava ese ia karaia, do ita ania totona. Abidadama taudia bona hereva momokani idia diba taudia ese Dirava do idia tanikiu henia murinai, inai aniani idia ania diba.

⁴Dirava ese ia karaia gaudia ibounai be namo, bona mai taravatu lasi. Taunimanima ese Dirava do idia tanikiu henia murinai, aniani ibounai do idia ania diba.

⁵Badina be Dirava ena hereva, bona taunimanima edia guriguri ese ia hahelagaia vadaeni.

⁶Inai bamona hereva bema Keristani varavara taudia dekenai oi hadibaia neganai, oi be Keriso Iesu ena hesiai tauna namona ta. Bona Iesu oi abidadama henia, bona iena hadibaia hereva oi badinaia noho dainai, oiemu lauma danu do oi ubua noho.

⁷To gori kavakavadia do oi negea momokani, idia be anina lasi gaudia. Dirava ena ura kara do oi tahua, bona do oi badinaia noho.

⁸Tauanina hagoadaia totona treinini bema ita karaia, inai kara ese ita do ia durua sisina. To bema Dirava totona ita treinini noho, ia ese iseda lauma do ia hagoadaia, bona inai kara ese ita do ia durua bada herea. Io, bema iseda lauma idia namo neganai, durua do ita abia inai tanobada ena mauri dekenai, bona gabeai do ita abia mauri dekenai danu.

⁹Inai be hereva momokani, bona ita abia dae bona hamomokania be namo.

¹⁰Oibe, inai hereva be momokani dainai, ita hekwarahi bona ita hisihisi noho. Badina be Mauri Diravana ita abidadama henia noho. Ia be taunimanima ibounai edia Hamauria Tauna, to ia be abidadama taudia edia Hamauria Tauna momokani.

¹¹Inai bamona hereva do oi hadibaia goadagoada.

¹²Ibounai do idia itaia oi be tau matamata, to do oi naria, ta ese oi be anina lasi gauna do ia gwauraia garina. Lasi, to oiemu noho mauri dekenai, Keriso ena kara do oi hedinaraia. Vadaeni oiemu hereva namona, kara namona, lalokau, abidadama bona laloa goevagoeva idia itaia neganai, oiemu kara bamona do idia karaia.

¹³Buka Helaga taunimanima dekenai do oi duahia, sisiba goada do oi henidia, bona hadibaia gaukara do oi goadalaia noho, ela bona lau ginidae.

¹⁴Dirava ese oi dekenai ia henia harihari gauna, oiemu lauma ena diari do oi gaukaralaia goadagoada, do oi hesiku lasi. Inai siahu oi ese oi abia, peroveta hereva dainai, bona ekalesia tau badadia ese edia imana oiemu kwarana dekenai idia atoa neganai.

¹⁵Oiemu diba bona goada do oi gaukaralaia, mai oiemu lalona ibounai. Vadaeni taunimanima ibounai ese oiemu goada do idia itaia, ia bada lao noho.

¹⁶Oi sibona oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.