Read Buka Helaga (Hiri Motu) 1993 2 TIMOTEO 2 Bible Online

2 TIMOTEO 2 - Buka Helaga (Hiri Motu) 1993 bible

2 TIMOTEO 2

¹Lauegu natuna e, Keriso Iesu danu oi hakapua dainai, iena hariharibada lalonai do oi goada noho.

²Lauegu hadibaia hereva, be oi ese oi kamonai vadaeni, bona taunimanima momo edia vairanai lau gwauraia. Inai hadibaia hereva be abidadama goada taudia dekenai ma do oi gwauraia. Vadaeni idia ese ma taunimanima haida dekenai unai hereva do idia gwauraia lou.

³Keriso Iesu ena tuari tauna namona ta do oi lao. Oiemu dagi ena hisihisi bona metau do oi abia, ai tuari taudia ai abia bamona.

⁴Tuari tauna ese inai tanobada mauri ena gaukara idauidau bona tuari danu nega tamona ia karaia diba lasi. Lasi, to ia be tuari gaukara sibona do ia karaia, iena tuari biaguna do ia hamoalea totona.

⁵Tau ta danu gadara gabuna ia goada helulu neganai, bema gadara taravatu ia badinaia lasi neganai, ia ese kwalimu ahuna ia abia diba lasi.

⁶Biru tauna, bema ia hekwarahi bada neganai, ia sibona ese uma ena anina do ia abia guna be namo.

⁷Lauegu hereva ena anina do oi laloa, badina be Lohiabada ese edia anina korikori oi dekenai do ia hadibaia.

⁸Iesu Keriso do oi laloatao noho, ia be Davida ena bese tauna, mase dekena amo ia toreisi lou. Inai bamona lau gwauraia, Sivarai Namona lau harorolaia neganai.

⁹Sivarai Namona lau harorolaia dainai, hisihisi lau abia noho, bona dibura tauna bamona auri dekena amo lau idia guia. To Dirava ena hereva idia guia diba lasi.

¹⁰Unai dainai, hisihisi ibounai lalonai lau haheauka, Dirava ese ia abia hidi vadaeni taudia do lau durua totona. Badina be lau ura idia danu ese Keriso Iesu ia mailaia hamauria namona do idia davaria. Inai hamauria ena hairaina be do ia noho ela bona hanaihanai.

¹¹Inai hereva be momokani: “Bema ia danu ita mase, vadaeni ia danu do ita mauri.

¹²Bema ita haheauka, bona ita gini goada noho, ita be ia danu do ita lohia taudia. To bema ita ese ia ita negea, ia danu ese ita do ia negea.

¹³Bema iseda gwauhamata ia dekenai ita badinaia lasi, iena gwauhamata ita dekenai do ia badinaia noho, badina be iena gwauhamata hereva ia senisia diba lasi, lasi momokani.”

¹⁴Oiemu taunimanima do oi hamaorodia, inai hadibaia hereva do idia laloaboio lasi. Bona do oi sisiba henidia, anina lasi hereva gaudia totona do idia hepapahuahu lasi. Badina unai dekena amo namo ta do ia vara lasi, ma danu, unai hepapahuahu hereva ese, idia kamonai noho taudia edia abidadama ia hadikaia diba.

¹⁵Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.

¹⁶Hereva kavakava, Dirava ena laloa idia badinaia lasi taudia edia hepapahuahu dekena amo do oi raka siri, badina be unai kara ese taunimanima Dirava dekena amo ia luludia oho.

¹⁷Oibe, hereva unai bamona be toto dikana bamona, ia be ia bada lao noho. Humenaio bona Pileto be unai bamona.

¹⁸Idia ruaosi be hereva momokani idia rakatania vadaeni, idia gwau: Mase dekena amo toreisi lou be ia ore vadaeni. Inai hereva koikoi dekena amo, haida edia abidadama ia manoka vadaeni.

¹⁹To Dirava ese ia haginia vadaeni ruma badina ena nadi badana ia gini noho, bona tau ta ese ia hamarerea diba lasi. Inai nadi ena latanai, inai hereva idia torea vadaeni, “Lohiabada ia diba momokani, daika be iena taudia korikori.” Ma inai hereva danu idia torea, “Bema tau ta ia gwau ia be Lohiabada ena, ia ese kerere karadia do ia rakatania.”

²⁰Ruma badadia lalonai, disi be golo bona siliva gaudia sibona lasi, to au bona raro gaudia danu. Unai disi haida be gaukara namodia totona, to disi haida be gaukara kavakava totona sibona.

²¹Tau ta bema unai lau gwauraia kara dika dekena amo sibona ia hagoevaia neganai, ia be goevagoeva do ia lao, Dirava ena vairanai, bona ia be gaukara namona disi bamona. Ia be Dirava ena tau momokani, bona ia ese iena Biaguna ia durua diba. Do ia noho hegaegae, gaukara namodia ibounai do ia karaia totona.

²²Uhau edia lebulebu karadia do oi rakatania, bona inai kara do oi badinaia: Kara maoromaoro, abidadama, lalokau, bona maino. Mai edia laloa goevagoeva, bona Lohiabada ena durua idia noia noho taudia, idia danu do oi turana karaia.

²³To hepapahuahu kavakavadia bona anidia lasi hereva dekena amo do oi raka siri. Oi diba vadaeni, idia ese heai idia havaraia.

²⁴Lohiabada ena hesiai tauna be do ia heai lasi, to taunimanima ibounai dekenai do ia bogahisihisi henia. Ia ese Dirava ena dala do ia hadibaia namonamo, mai ena goada bona haheauka danu.

²⁵Ia ese, iena hereva idia utua taudia do ia sisiba henidia, mai ena manau danu. Badina be bema ia manau neganai, sedira Dirava ese idia do ia durua, vadaeni edia lalona do idia giroa, bona hereva momokani do idia davaria.

²⁶Guna Satani ese iena koikoi dekena amo idia ia abia, vadaeni iena ura idia karaia. To bema hereva momokani idia davaria bona diba neganai, edia laloa do idia maoromaoro, vadaeni Satani ena koikoi dekena amo do idia roho mauri.