Read Buka Helaga (Hiri Motu) 1993 TITO 1 Bible Online

TITO 1 - Buka Helaga (Hiri Motu) 1993 bible

TITO 1

¹Lau Paulo, lau be Dirava ena hesiai tauna, bona Iesu Keriso ena aposetolo tauna. Dirava ese lau ia abia hidi bona lau ia siaia, Dirava ese ia abia hidi taudia edia abidadama do lau hagoadaia totona. Oibe, lau ia siaia, hereva momokani idia dekenai do lau hadibaia, Dirava do idia badinaia momokani totona.

²Edia abidadama lau durua, badina inai abidadama ese mauri hanaihanai ia havaraia noho. Inai mauri hanaihanai be tanobada ia do karaia lasi neganai, Dirava ese ia gwauhamatalaia, bona Dirava be koikoi diba lasi.

³Bona harihari, iena nega korikori dekenai, Dirava ese iena gwauhamata ena anina ia hedinaraia vadaeni. Inai gwauhamata gauna be iena Sivarai Namona, bona lau ese lau harorolaia, Dirava, iseda Hamauria Tauna ena oda dainai.

⁴Tito e, lauegu natuna korikori, inai revareva oi dekenai lau torea, iseda abidadama be tamona dainai. Lau ura be Tamana Dirava, bona Keriso Iesu, iseda Hamauria Tauna ese hariharibada bona maino oi dekenai do idia henia.

⁵Kerete dekenai oi lau rakatania badina be, unai gabu dekenai idia do maoro lasi gaudia do oi hamaoromaoroa totona. Bona lau ura danu hanua ta ta ibounai lalonai ekalesia gunalaia taudia do oi abia hidi. Lauegu hadibaia hereva oi laloaboio lasi, ani?

⁶Ekalesia gunalaia tauna be kerere ta lasi tauna, bona ia be adavana tamona tauna. Iena natuna be Iesu do idia abidadama henia, idia be lebulebu lasi, bona edia tamana bona sinana do idia kamonai henia.

⁷Badina be ekalesia orea gunalaia tauna ese Dirava ena gaukara ia naria dainai, ia be kerere ta lasi tauna. Ia be hekokoroku lasi, ia be badu haraga lasi, kekero lasi, bona moni do ia mataganigani henia lasi.

⁸Ia ese idau taudia iena ruma dekenai do ia abia dae. Ia ese kara namodia do ia ura henia. Ia be aonega tauna, kara maoromaoro tauna, helaga tauna, bona ia sibona ena tauanina do ia naria bona biagua diba tauna.

⁹Hereva momokani, ita abidadama henia bona ita hadibaia gauna, do ia badinaia momokani. Unai karadia dekena amo ia be hegeregere, haida do ia hagoadaia, hadibaia hereva namodia dekena amo. Danu do ia hegeregere, hereva momokani idia negea taudia do ia hamaoromaoroa.

¹⁰Badina be tau momo ese hereva momokani idia kamonai henia lasi, bona hereva kavakava dekena amo haida idia hakaua kerere. Iuda taudia momo ese inai bamona idia karaia noho.

¹¹Idia edia hadibaia hereva be iseda hereva bamona lasi, bona idia ese taunimanima haida, bona edia famili taudia ibounai dekenai, daradara idia havaraia vadaeni. Inai hadibaia koikoi idia karaia noho, moni do idia abia totona. Idia edia kara bona edia hereva do oi hadokoa.

¹²Kerete taudia edia peroveta tauna ta ese inai bamona Kerete taudia ia herevalaia, ia gwau, “Kerete taudia be nega ibounai idia koikoi noho, idia be uda boroma dikadia bamona, lahedo dikadika, bona aniani sibona idia laloa taudia.”

¹³Inai hereva be momokani. Unai dainai idia do oi gwau henia goadagoada, Sivarai Namona do idia abidadama henia maoromaoro totona.

¹⁴Vadaeni, unai neganai Iuda taudia edia gori, bona hereva momokani idia negea taudia, be do idia kamonai henia lou lasi.

¹⁵Laloa bona kudouna goevagoeva taudia dekenai, gau ibounai be goevagoeva. To laloa miro taudia dekenai, bona Dirava idia abidadama henia lasi taudia dekenai, gau ta be ia goevagoeva lasi. Badina be unai miro ese edia laloa bona edia kudouna ia hadikaia dainai.

¹⁶Idia gwau Dirava idia diba, to edia kara dekena amo idia ese Dirava idia negea. Idia be dika bada, Dirava idia kamonai henia lasi, bona kara namona ta idia karaia diba lasi.