Read Buka Helaga (Hiri Motu) 1993 HEBERU 13 Bible Online

HEBERU 13 - Buka Helaga (Hiri Motu) 1993 bible

HEBERU 13

¹Umui Keristani taudia e, nega ibounai emui Keristani varavara taudia do umui lalokau henidia, be gau badana.

²Do umui laloaboio lasi, idau taudia emui ruma lalonai do umui abia dae. Badina be haida ese unai bamona idia karaia neganai, aneru idia abia dae. To idia diba lasi unai be aneru.

³Dibura ruma lalonai idia koua taudia do umui laloa. Oibe, umui be idia danu dibura ruma dekenai umui noho bamona, do umui lalodia. Hisihisi idia abia noho taudia do umui laloa. Umui be idia danu nega tamona umui hisihisi noho bamona do umui lalodia.

⁴Headava kara be taunimanima ibounai ese do idia matauraia be namo. Tatau mai edia hahine e, emui headava do umui naria, ia be goevagoeva Dirava ena vairana dekenai. Do ia miro lasi. Badina be Dirava ese heudahanai taudia bona headava hadikaia taudia edia kerere davana do ia henia momokani.

⁵Moni do umui ura henia dikadika lasi. To umui dekenai ia noho gauna, be inai bamona do umui laloalaia, “Lau dekenai noho gauna be namo, ia hegeregere vadaeni.” Badina be Dirava be inai bamona ia hereva, ia gwau: “Lau ese umui do lau negea lasi, bona umui do lau rakatania lasi Lasi bona lasi momokani.”

⁶Unai dainai, mai goada danu, inai bamona do ita hereva, “Lohiabada be lauegu durua Tauna, lau be lau gari diba lasi. Taunimanima edena bamona lau do idia hadikaia diba?”

⁷Umui emui hakaua taudia gunadia do umui laloatao. Idia ese Dirava ena hereva umui dekenai idia hadibaia. Edia mauri dalana do umui laloa lou, bona edia abidadama kara hegeregerena do umui badinaia.

⁸Iesu Keriso be varani bona hari ia idau lasi. Bona do ia idau lasi, ela bona hanaihanai.

⁹Do umui naria, hadibaia hereva idauidau ese dala maorona dekena amo umui idia hakaua kerere garina. To namona be, Dirava ena hariharibada dekena amo, iseda lauma ese goada idia abia. Aniani taravatu idauidau ese iseda lauma do idia hagoadaia lasi. Inai bamona taravatu idia kamonai henia taudia ese durua idia abia lasi.

¹⁰Ita be mai iseda boubou patana. To Iuda taudia edia hahelagaia taudia be hegeregere lasi iseda boubou patana dekena amo aniani idia ania.

¹¹Iuda taudia edia Hahelagaia Tauna Badana ese boromakau bona mamoe edia rarana, be Helaga Herea Gabuna dekenai do ia abia lao, kara dika kokia boubouna do ia karaia totona. To unai boromakau o mamoe edia tauanina be kamepa ena murimurinai idia gabua.

¹²Unai bamona dainai, Iesu danu be hanua badana ena murimurinai ia mase, iena rarana dekena amo taunimanima do ia hagoevaia totona, vadaeni do idia helaga.

¹³Unai dainai, ita be namo Iesu dekenai do ita lao, hanua ena murimurinai, bona iena hemarai danu do ita abia hebou.

¹⁴Badina be inai tanobada dekenai iseda noho hanaihanai hanuana be lasi. To noho hanaihanai hanuana, gabeai do ia hedinarai gauna, ita tahua noho.

¹⁵Unai dainai namona be Dirava do ita hanamoa, Iesu ena ladana dainai. Bona inai hanamoa Dirava dekenai do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.

¹⁶Kara namodia do umui laloaboio lasi, bona kohu lasi taudia danu, umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.

¹⁷Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia edia henunai do umui noho. Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.

¹⁸Umui ese ai totona do umui guriguri noho, badina ai laloa aiemai kudouna ena laloa be maoromaoro, Dirava ena vairanai. Bona ai ura be nega ibounai kara maoromaoro do ai karaia.

¹⁹Oibe, lau be umui lau noia goadagoada, Dirava do umui noia, ia ese lauegu mai dala do ia durua. Vadaeni ia ese, umui dekenai lau do ia siaia haragaharaga.

²⁰Dirava be maino ena badina momokani. Ia ese iseda Lohiabada Iesu mase dekena amo ia hatorea isi lou. Iesu be Mamoe Naria Tauna Badana, badina be ia ese Dirava ena noho hanaihanai gwauhamata ia hamomokania vadaeni. Oibe, Iesu ese unai Dirava ena gwauhamata badana ia hamomokania. Badina be inai: Ia sibona ena rarana, boubou gauna bamona, ia bubua diho dainai.

²¹Vadaeni, inai maino Diravana ese gau namodia ibounai umui dekenai do ia henia, bona idia dekena amo umui do ia hanamoa momokani. Vadaeni umui ese iena ura do umui karaia. Bona namona be Dirava ese Iesu Keriso ena siahu dekena amo, iseda lalona dekenai do ia gaukara, vadaeni Dirava hamoalea karadia do ita havaraia. Keriso dekenai hairai bada do ia noho ela bona hanaihanai. Amen.

²²Lauegu varavara taudia e, umui lau noia goada, inai revareva, umui hagoadaia totona gauna, do umui abia dae mai haheauka danu. Badina be lau torea herevadia be lata lasi.

²³Lau ura umui diba, iseda varavara Timoteo be dibura ruma dekena amo idia ruhaia vadaeni. Bema lau dekenai ia mai haraga neganai, ia bona lau, ai ruaosi, umui itaia totona do ai mai.

²⁴Umui ese emui hakaua taudia bona Keristani taudia ibounai dekenai aiemai hanamoa do umui henia. Dirava ena taudia ibounai Italia dekenai ese edia hanamoa umui dekenai idia siaia inai.

²⁵Dirava ena hariharibada umui ibounai dekenai do ia noho.