Read Buka Helaga (Hiri Motu) 1993 HEBERU 3 Bible Online

HEBERU 3 - Buka Helaga (Hiri Motu) 1993 bible

HEBERU 3

¹Unai dainai, lauegu Keristani varavara taudia e, umui be Dirava ese ia abia hidi vadaeni. Lau ura Iesu do umui laloa, ia be Dirava ese ia siaia vadaeni, iseda abidadama ena Hahelagaia Tauna Badana do ia lao.

²Dirava ese Iesu ia abia hidi vadaeni inai dagi do ia karaia totona, bona Iesu ese Dirava ena ura ia badinaia. Mose ese Dirava ena dubu gaukara ia badinaia namonamo bamona, Iesu danu Dirava ena ura ia badinaia namonamo.

³Dirava ese hairai badana Iesu dekenai ia henia, to Mose dekenai be hairai maragina ia henia. Badina be ruma haginia tauna be idia matauraia bada, to ia karaia rumana be idia matauraia maragi.

⁴Momokani, ruma ibounai be mai edia karaia tauna, to gau ibounai ia karaia tauna be Dirava sibona.

⁵Mose ese gaukara namona ia karaia, Dirava ena bese ia naria totona, to ia be hesiai tauna sibona. Ia ese danu vaira neganai Dirava do ia gwauraia gaudia ia herevalaia guna.

⁶To Keriso be Dirava ena Natuna korikori. Unai dainai ia be Dirava ena bese ena kwarana tauna momokani. Ia ese unai bese ia naria noho, iena Tamana ena ura hegeregerena. Ita be Dirava ena bese taudia, bema mai abidadama, moale, bona laloa goada danu Lohiabada ena mauri hanaihanai ita naria noho neganai.

⁷Unai dainai Lauma Helaga ena hereva ita kamonai henia be gau badana. Ia be inai bamona ia gwau: “Hari dina bema iena gadona umui kamonai,

⁸umui emui lalona do umui koua lasi, gunaguna emui sene taudia idia karaia bamona, Dirava ena hereva idia negea neganai, taunimanima noho lasi gabuna dekenai, lau ese idia lau tohoa neganai.

⁹Unai gabu dekenai, lagani 40 lalonai lau Dirava egu kara idia itaia, to idia ese lau idia dibagania, bona lau idia tohoa.

¹⁰Unai dainai lau ese unai taudia lau badu henia, lau gwau, ‘Nega ibounai inai taudia, be lauegu dala dekena amo idia raka siri. Lauegu hereva idia kamonai henia lasi.’

¹¹Vadaeni lauegu badu lalonai, gwauhamata metauna lau gwauraia, lau gwau, ‘Lauegu laga-ani gabuna dekenai do idia vareai lasi.’ ”

¹²Lauegu varavara taudia e, do umui naria namonamo, umui ta ese ia laloa kerere, iena abidadama be lasi, vadaeni Mauri Diravana do ia rakatania garina.

¹³Hari inai negai be Dirava ese ia herevalaia, “hari dina.” Inai “hari dina” ia do noho dainai, umui ta ta dekenai durua hereva do umui henia, emui lalona hagoadaia totona. Dina ibounai inai bamona do umui karaia, umui ta be kara dika ese ia koia garina, bona unai tau ese iena lalona be Dirava dekena amo do ia koua garina.

¹⁴Guna Keriso ita abidadama henia. Vadaeni namona be inai abidadama do ita badinaia noho, ela bona ita mase. Bema inai bamona ita karaia neganai, ita be Keriso ena taudia korikori.

¹⁵Buka Helaga inai bamona ia gwau: “Hari dina bema iena gadona umui kamonai, umui emui lalona do umui koua lasi, gunaguna umui emui sene taudia idia karaia bamona, Dirava ena hereva idia negea neganai.”

¹⁶Inai taudia be daika, Dirava ena gadona idia kamonai, to iena hereva idia negea? Taudia be unai, Mose ese Aigupito dekena amo ia hakaudia, ani?

¹⁷Bona lagani 40 lalonai Dirava ese ia badu henidia taudia be daika? Taudia be unai, idia kara dika, vadaeni taunimanima noho lasi gabuna dekenai idia moru, idia mase, ani?

¹⁸Ma daika taudia be Dirava ese gwauhamata metauna ia henidia, ia gwau, “Lauegu laga-ani gabuna dekenai do umui vareai lasi?” Taudia be unai, iena hereva idia negea taudia, ani?

¹⁹Unai dainai, ita diba vadaeni, Dirava idia abidadama henia lasi dainai, iena laga-ani gabuna dekenai idia vareai lasi.