Read Buka Helaga (Hiri Motu) 1993 HEBERU 4 Bible Online

HEBERU 4 - Buka Helaga (Hiri Motu) 1993 bible

HEBERU 4

¹Dirava ena gwauhamata ia do noho, gauna be inai: Ita be iena laga-ani dekenai do ita vareai. Unai dainai, namona be unai laga-ani totona do ita naria namonamo noho mai gari danu, umui ta do ia vareai hegeregere lasi garina.

²Ita ese Sivarai Namona ita kamonaia vadaeni, Israela taudia idia kamonaia bamona. Io, idia kamonaia, to namona ta idia davaria lasi. Badina be idia kamonai kava sibona, idia abidadama henia lasi.

³To ita be Dirava ita abidadama henia dainai, iena laga-ani gabuna do ita vareai diba. Gunaguna Dirava ese unai laga-ani ia herevalaia, ia gwau: “Lauegu badu lalonai, gwauhamata metauna lau gwauraia, lau gwau, ‘Lauegu laga-ani dekenai do idia vareai lasi.’ ” Dirava ese iena laga-ani ia herevalaia. To idaunegai Dirava ese tanobada ia karaia, bona unai neganai iena gaukara ia haorea.

⁴Badina be Buka Helaga ese dina namba 7 ia herevalaia, ia gwau: “Dirava ese iena gaukara ibounai ia karaia haorea, vadaeni dina namba 7 dekenai ia laga-ani.”

⁵Ma Buka Helaga lalonai ia gwau: “Lauegu laga-ani gabuna lalonai do idia vareai lasi.”

⁶Unai Israela taudia, Sivarai Namona idia kamonaia guna taudia ese unai laga-ani idia davaria lasi, idia abidadama henia lasi dainai. To Dirava ena gwauhamata ia do noho dainai, ita diba haida be iena laga-ani lalonai do idia vareai.

⁷Unai dainai Dirava ese dina ta ma ia abia hidi, “hari dina” ia gwauraia. Vadaeni, nega daudau ia lao murinai, Dirava ese Davida ena uduna dekena amo, unai “hari dina” ia herevalaia, ia gwau: “Hari dina bema iena gadona umui kamonai, umui emui lalona do umui koua lasi.”

⁸Bema Iosua ese unai taudia dekenai Dirava ia gwauhamatalaia laga-ani ia henidia, Dirava be dina ta ma do ia herevalaia lasi.

⁹Unai dainai ita diba Dirava ena taudia edia laga-ani be ia do noho. Ia be Dirava ena laga-ani bamona, dina namba 7 dekenai ia laga-ani neganai.

¹⁰Badina be Dirava ena laga-ani dekenai ia vareai tauna ese iena gaukara dekena amo ia laga-ani noho. Ia laga-ani, Dirava ese iena gaukara dekena amo ia laga-ani bamona.

¹¹Unai dainai, mai iseda goada ibounai, Dirava ena laga-ani do ita vareai toho. Bona ita ibounai ese Dirava ena hereva do ita utua lasi, gunaguna idia utua bamona, ita ta do ia boio garina.

¹²Badina be Dirava ena hereva be ia mauri noho, bona ia be mai ena siahu. Ia be mai ena matana momokani. Iena matana ese kaia mai ena kahana ruaosi ena matana ia hereaia momokani. Ia ese tau ta ia gwadaia neganai, unai tau ena lalona momokani dekenai ia vareai. Ia vareai ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.

¹³Gau ta Dirava dekena amo ita hunia diba lasi. Dirava ese ia karaia gaudia ibounai nega ibounai ia itaia noho. Idia be hanaihanai iena matana edia vairanai idia noho. Bona Dirava ese danu iseda kara do ia kota henia.

¹⁴Ita be mai iseda Hahelagaia Tauna Badana, bona ia be Dirava ena vairanai, guba dekenai ia noho. Ia be Iesu, Dirava ena Natuna. Unai dainai namona be iseda abidadama ita dogoatao goada noho. Ita gwauraia noho abidadama be unai.

¹⁵Ita be manoka dainai karadika ese nega momo ita ia hamorua. To iseda Hahelagaia Tauna Badana ese ita ia bogahisihisi henia diba. Badina be ia danu ese dibagani ena mamina ia abia, ita ese ena mamina ita abia hegeregerena. To Iesu ese kara dika ta ia karaia lasi.

¹⁶Unai dainai mai gari lasi danu, Dirava ena bogahisihisi ia noho helai gabuna dekenai ita raka kahirakahira lao, be namo. Vadaeni ia ese ita do ia bogahisihisi henia, bona ia ese hariharibada bona durua ita dekenai do ia henia, iseda metau hegeregerena.