Read Buka Helaga (Hiri Motu) 1993 HEBERU 5 Bible Online

HEBERU 5 - Buka Helaga (Hiri Motu) 1993 bible

HEBERU 5

¹Hahelagaia Tauna Badana idia abia hidi dalana be inai bamona: Taunimanima edia huanai dekena amo Dirava ese ia abia hidi, ia be Dirava ena hesiai tauna, taunimanima durua totona. Iena gaukara danu be, kara dika kokia totona boubou gaudia ia karaia, bona harihari gaudia ia henia.

²Ia danu be mai ena manoka dainai, ia be taunimanima edia manoka bona edia aonega lasi ia bogahisihisi henia diba.

³Bona ia be manoka dainai, ia ese boubou gaudia ia henia, taunimanima sibona totona lasi, to ia sibona totona danu.

⁴Inai Hahelagaia Tauna Badana ena gaukara be bada herea. Tau ta ese unai gaukara ena siahu be sibona ia abia diba lasi, to Dirava ese unai tau ia boiria, vadaeni unai dagi ia henia, guna Dirava ese Arona ia boiria bamona.

⁵Keriso danu be inai bamona. Ia sibona ese ia hanamoa, vadaeni ia sibona Hahelagaia Tauna Badana ena gaukara ia abia, a? Lasi momokani. Dirava ese unai dagi ia henia, bona Dirava ese Iesu ia herevalaia, ia gwau: “Oi be lauegu Natuna. Hari dina oi lau havaraia vadaeni.”

⁶Ma gabu ta danu dekenai Dirava ese Iesu ia herevalaia lou, ia gwau: “Oi be hahelagaia tauna ela bona hanaihanai. Oi be Melekisedeka ena orea tauna.”

⁷Ia be tanobada dekenai ia noho neganai, Iesu ese Dirava ia guriguri henia, mai taitai bona mai matana ranu danu. Ia noinoi, badina ia diba Dirava ese mase dekena amo ia hamauria lou diba. Bona Dirava ese Iesu ena noinoi ia abia dae, badina Iesu be sibona ena ura gauna ia noia lasi, bona ia be Dirava henunai ia manau noho dainai.

⁸Iesu be Dirava ena Natuna, to ia ese hisihisi ia abia, bona unai hisihisi ese Dirava kamonai henia dalana ia hadibaia.

⁹Ela bona ia be namo momokani vadaeni, iena namo ese ibounai edia namo ia hereaia. Unai dainai ia be hegeregere vadaeni, ia dekenai idia kamonai henia taudia ibounai dekenai, be mauri hanaihanai do ia henidia. Dirava ese inai dala ia havaraia.

¹⁰Bona Dirava ese Iesu ia gwauraia Hahelagaia Tauna Badana, Melekisedeka ena orea momokani lalonai.

¹¹Melekisedeka totona hereva momo ai ura hadibaia, to umui ai hadibaia be auka, badina be umui emui lalona idia do metau dainai.

¹²Nega ia ginidae vadaeni, umui be hadibaia taudia do umui halaoa totona. To umui be do diba maragi taudia. Unai dainai tau ta ese Dirava ena hereva, diba hamatamaia gaudia umui dekenai ia hadibaia lou be namo. Badina umui be rata sibona umui inua diba, umui be do hegeregere lasi aniani korikori do umui ania.

¹³Rata ia inua tauna be do beibi bamona. Ia be maoro bona kerere edia toana ia diba lasi.

¹⁴To aniani korikori be tau badadia idia ania diba. Idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.