Read Buka Helaga (Hiri Motu) 1993 HEBERU 7 Bible Online

HEBERU 7 - Buka Helaga (Hiri Motu) 1993 bible

HEBERU 7

¹Inai Melekisedeka be Salema ena king, bona ia be Ataiai Momokani Diravana ena hahelagaia tauna. Gunaguna Aberahamo ese king haida ia tuari henia, ia aladia mase. Vadaeni iena hanua dekenai ia giroa lou neganai, Melekisedeka be ia danu idia hedavari. Unai neganai Melekisedeka ese Aberahamo ia hanamoa henia.

²Unai neganai Aberahamo ese iena kohu ia haria, kahana 10, vadaeni kahana ta Melekisedeka dekenai ia henia. Melekisedeka ena ladana ena anina gunana be “Kara Maoromaoro ena King,” ma iena ladana ta be “Maino Lohiana,” badina ia be Salema ena king. Salema ena anina be “Maino.”

³Iena tamana, iena sinana bona iena iduhu edia ladana be idia torea lasi. Iena vara dinana be lasi, bona iena mauri dokona danu be lasi. Ia be Dirava ena Natuna bamona ia noho, ia be hahelagaia tauna ela bona hanaihanai.

⁴Unai tau mani umui laloa. Ia be siahu bada tauna, ani? Badina be Aberahamo, iseda sene tauna badana momokani ese kohu ia henia. Oibe, Aberahamo ese tuari lalonai ia kwalimu dainai kohu ia abia. Unai kohu ia haria kahana 10, bona kahana ta Melekisedeka dekenai ia henia.

⁵Momokani, Levi ena tubuna taudia ese hahelagaia taudia edia dagi idia abia diba. Bona taravatu ia gwau Israela taudia ese edia kohu do idia haria, kahana 10, bona kahana ta be Levi hahelagaia taudia dekenai idia henia. Io, Israela taudia be Levi taudia edia varavara, badina ibounai be Aberahamo ena tubuna taudia. Io, idia be varavara, to unai kohu kahana ta, Levi taudia ese idia abia unai Israela taudia edia kohu kahana 10 dekena amo.

⁶Inai Melekisedeka be Levi iduhu tauna lasi, to ia ese Aberahamo ena kohu kahana ta ia abia. Melekisedeka ese danu Aberahamo ia hanamoa henia.

⁷Bona ita diba vadaeni hanamoa ia henia tauna be bada, bona hanamoa ia abia tauna be maragi, ani?

⁸Levi taudia ese Israela edia kohu kahana 10 ena kahana ta idia abia, to unai Levi taudia be do idia mase. Melekisedeka ese danu unai bamona ia abia, to Buka Helaga ia gwau, ia be ia mauri noho.

⁹Bona inai bamona ita hereva diba: Momokani Levi be mai ena maoro unai kohu do ia abia. To gunaguna Melekisedeka ese Aberahamo dekena amo unai bamona kohu ia abia. Inai anina be, Melekisedeka ese Levi dekena amo kohu ia abia danu.

¹⁰Badina be inai: Melekisedeka be Aberahamo danu idia hedavari neganai, Levi be ia do vara lasi, to tamana Aberahamo ena tauanina lalonai ia noho.

¹¹Gunaguna Dirava ese Israela taudia dekenai Taravatu ia henia. Taravatu ia gwau Levi ena iduhu taudia ese hahelagaia gaukara do idia karaia. To bema Levi besena edia hahelagaia gaukara dekena amo taunimanima ese kara maoromaoro momokani idia davaria diba, dahaka dainai Melekisedeka ena orea dekena amo hahelagaia tauna ta ma ia toreisi? Dahaka dainai unai Arona ena orea tauna ta ese unai dagi ia abia lasi?

¹²Bema hahelagaia taudia edia orea ia senisi neganai, Taravatu danu be do ia senisi.

¹³Bona iseda Lohiabada, ita herevalaia noho Tauna, ena orea be idau. Iena iduhu tauna ta ese nega ta hahelagaia gaukara ia karaia lasi.

¹⁴Badina be ita diba vadaeni, iseda Lohiabada be Iuda ena iduhu dekena amo ia vara. To Mose ese inai orea ia herevalaia lasi, hahelagaia taudia ia abia hidi neganai.

¹⁵Inai hereva ena anina be, hari ita itaia namonamo diba, hahelagaia tauna matamata ta ia hedinarai vadaeni, Melekisedeka ena toana hegeregerena.

¹⁶Dirava ese inai hahelagaia tauna matamata ena dagi ia henia, taunimanima edia iduhu o edia taravatu dekena amo lasi. To inai dagi ia abia, iena mauri hanaihanai siahuna dekena amo.

¹⁷Dirava ese Buka Helaga lalonai ia hereva, ia gwau, “Oi be hahelagaia tauna ela bona hanaihanai. Oi be Melekisedeka ena orea tauna.”

¹⁸Dirava ese taravatu gunana ia kokia, badina unai taravatu be manokamanoka bona anina lasi.

¹⁹Badina be Mose ena Taravatu ese tau ta ia hanamoa momokani diba lasi. To harihari Dirava ese dala matamata ia kehoa vadaeni, inai dala matamata ese taravatu gunana ia hereaia, bona inai dala dekena amo Dirava kahirakahira dekenai ita lao diba.

²⁰Dirava ese hahelagaia tauna ena dagi Iesu dekenai ia henia kava lasi. Lasi, Dirava ese hereva helagana ia gwauraia guna, vadaeni unai dagi ia henia.

²¹Hahelagaia taudia gunadia be unai bamona lasi. Idia edia dagi abia totona, Dirava ese unai bamona hereva helagana ia gwauraia lasi. To Dirava ese hereva helagana ia gwauraia guna, vadaeni ia ese Iesu be hahelagaia tauna ia halaoa. Dirava ese Iesu dekenai ia hereva henia, ia gwau: “Lohiabada ese hereva helagana ia gwauraia vadaeni, bona iena lalona do ia senisia lasi. Ia gwau, ‘Oi be hahelagaia tauna, ma inai dagi do oi abia noho, ela bona hanaihanai.’ ”

²²Unai dainai hari ita diba, inai Dirava ena gwauhamata taravatuna, Iesu ese ia hamomokania gauna, be namo momokani. Ia ese unai gwauhamata taravatuna gunana ia hereaia momokani.

²³Gunaguna unai hahelagaia taudia momo herea idia noho, badina be idia mase bona edia gaukara dekena amo idia doko dainai.

²⁴To Iesu be ia noho hanaihanai, unai dainai iena hahelagaia gaukara be ia noho nega ibounai, bona ta ese iena gabu do ia abia diba lasi.

²⁵Unai dainai Iesu be mai ena siahu, iena ladana dainai Dirava dekenai idia mai taudia do ia hamauridia. Badina be inai: Iesu ia noho hanaihanai, bona ia ese inai taudia totona Dirava ia noia noho hanaihanai.

²⁶Iesu, inai Hahelagaia Tauna Badana ese ita ia durua diba. Ia be helaga. Ia be kara dika lasi, kerere ta lasi. Ia be kara dika taudia bamona lasi. Ia be goeva momokani, bona guba ena ataiai momokani dekenai ia daekau vadaeni.

²⁷Ia be Hahelagaia Taudia Badadia haida bamona lasi. Idia ese dina ibounai boubou gaudia idia henia, idia sibona edia kara dika totona guna, gabeai taunimanima edia kara dika totona. To Iesu be inai bamona ia karaia lasi. Ia ese boubou gauna tamona ia henia, nega tamona sibona. Badina be ia ese iena mauri be Dirava dekenai ia henia.

²⁸Mose ena Taravatu ese mai edia manoka taudia ia abia hidi, Hahelagaia Tauna Badana ena dagi do idia karaia totona. To Dirava ena gwauhamata hereva helagana, Taravatu murinai ia hedinarai gauna, ese Dirava ena Natuna ia abia hidi inai dagi totona. Dirava ese iena Natuna ia hanamoa bada, unai dainai ia goeva momokani vadaeni, ela bona hanaihanai.