Read Buka Helaga (Hiri Motu) 1993 HEBERU 8 Bible Online

HEBERU 8 - Buka Helaga (Hiri Motu) 1993 bible

HEBERU 8

¹Ai ese ai gwauraia vadaeni hereva ena anina be inai: Ita be mai iseda Hahelagaia Tauna Badana. Ia be Siahu Momokani Diravana ena helai gabuna badana idiba kahanai ia helai noho, guba dekenai.

²Ia ese Hahelagaia Tauna Badana ena hesiai gaukara guba ena tomadiho dubu dekenai ia karaia noho, unai be Palai Dubu momokanina, taunimanima ese idia haginia lasi, Lohiabada sibona ese ia haginia.

³Hahelagaia Taudia Badadia ibounai edia gaukara be harihari gaudia bona boubou gaudia Dirava dekenai idia henia. Unai dainai Keriso danu ese boubou gauna ta ia henia.

⁴Bema Keriso be tanobada dekenai ia noho neganai, ia ese hahelagaia gaukara do ia karaia lasi. Badina be inai: Hahelagaia taudia idia noho vadaeni, bona boubou gaudia idia henia noho, Iuda edia Taravatu hegeregerena.

⁵Idia ese hahelagaia gaukara idia karaia noho, to edia dubu be guba ena dubu helaga ena toana sibona. Inai be Dirava ese Mose ia hamaorolaia bamona. Mose ese guriguri palai dubu ta ia haginia gwauraia neganai, Dirava ese ia hamaoroa, ia gwau, “Oi naria namonamo, gau ibounai do oi karaia, ororo dekenai oi dekenai lau hadibaia ena laulau hegeregerena.”

⁶To harihari, Iesu ese hahelagaia gaukara ia abia. Bona iena gaukara ese unai hahelagaia taudia gunadia edia gaukara ia hereaia. Badina be Dirava ena taravatu matamatana, Keriso ese ia havaraia gauna, ese taravatu gunana ia hereaia. Bona Dirava ena gwauhamata ese taravatu gunana ena gwauhamata danu ia hereaia.

⁷Bema taravatu gunana be mai ena kerere lasi neganai, taravatu matamatana ta be Dirava ese do ia laloa lasi.

⁸To Dirava ese iena taudia edia kerere ia gwauraia, ia gwau, “Lohiabada ia hereva, ia gwau, ‘Kamonai, dina ta do ia ginidae, lau ese taravatu matamatana do lau karaia, Israela besena danu, bona Iuda besena danu.

⁹Inai taravatu be, edia sene taudia danu lau karaia gauna bamona lasi. Idia edia imana lau abia dinana dekenai, Aigupito tano dekena amo idia lau hakaua lao neganai, idia ese lauegu taravatu idia badinaia lasi. Unai dainai idia lau negea.’ ” Lohiabada be unai bamona ia hereva.

¹⁰Lohiabada ma ia gwau, “Vaira neganai lau ese taravatu ta ma, be Israela taudia danu do lau karaia. Lauegu taravatu be edia lalona dekenai do lau atoa, edia kudouna dekenai do lau torea. Unai neganai lau be idia edia Dirava, idia danu be lauegu bese taudia.

¹¹Idia ta ta ibounai ese, edia gado tamona taudia do idia hadibaia lasi, bona idia ta ta ibounai be, edia varavara dekenai do idia hereva lasi, inai bamona, ‘Lohiabada do oi diba be namo.’ Badina idia ibounai be lau do idia diba, tau maragidia ibounai, ia lao bona tau badadia danu.

¹²Lau ese edia kara dika do lau gwauatao, bona edia kerere do lau laloaboio.”

¹³Dirava ese taravatu matamatana ia herevalaia. Unai hereva dekena amo, Dirava ese unai taravatu gunana be do ia ore gauna ia halaoa vadaeni. Iena siahu ia ore gauna, gau gunana, be nega sisina sibona do ia noho, vadaeni, do ia ore momokani.