Read Buka Helaga (Hiri Motu) 1993 IAMESI 5 Bible Online

IAMESI 5 - Buka Helaga (Hiri Motu) 1993 bible

IAMESI 5

¹Kohu momo taudia e, lauegu hereva do umui kamonai henia. Do umui taitai, mai boiboi danu do umui tai, metau bona hisihisi umui dekenai do idia ginidae dainai.

²Emui kohu be dika bona bodaga vadaeni, bona emui dabua be pitopito ese idia ania ore.

³Emui golo bona emui siliva idia raraka vadaeni, bona edia raraka ese emui dika do ia hedinaraia. Inai raraka ese danu emui tauanina do ia ania, lahi bamona. Unai kohu momo umui haboua vadaeni, inai dokona dinadia lalonai.

⁴Umui kamonai, emui uma lalonai idia gaukara taudia edia davana umui henidia lasi. Unai dainai mai boiboi danu idia maumau noho. Emui uma ena anina idia utua taudia edia taitai be Dirava, Siahu Ibounai Lohiabada ia kamonai vadaeni.

⁵Tanobada dekenai umui noho neganai, umui ura henia karadia bona gaudia umui moalelaia, mai lebulebu danu. Bona aniani bada umui ania dainai, emui tauanina idia bada herea, boroma idia ubua digara bamona, vadaeni umui noho hegaegae ala-ala dinana totona.

⁶Umui ese kara maoromaoro taudia umui gwauraia kerere, bona umui aladia mase. Bona idia ese unai emui dika idia koua lasi.

⁷Unai dainai, lauegu varavara taudia e, do umui haheauka noho ela bona Lohiabada do ia giroa mai. Umui laloa: Biru tauna ese iena uma anina ia naria, mai ena haheauka danu. Oibe, ia naria ela bona medu ginigunana bona medu dokona danu idia diho vadaeni.

⁸Umui danu do umui haheauka. Bona mai abidadama ena laloa goada danu, Lohiabada do umui naria noho, badina iena mai be kahirakahira.

⁹Lauegu varavara e, umui ta ta dekenai do umui maumau lasi, Dirava ese umui do ia kota henia garina. Kota Biaguna ia gini hegaegae noho iduara dekenai, iena mai be kahirakahira.

¹⁰Lauegu varavara taudia e, peroveta taudia do umui laloa. Lohiabada ena ladana dekenai idia hereva neganai, hisihisi lalonai idia haheauka bona idia goada. Edia kara bamona do umui karaia be namo.

¹¹Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.

¹²Lauegu varavara taudia e, gau bada herea be inai: Hereva metau o hereva helaga dekena amo do umui gwauhamata lasi. Guba, o tanobada, o idau gauna ta ena ladana dekenai do umui gwauhamata lasi. To bema “oibe” oi hereva gwauraia neganai, “oibe” sibona do oi gwau. Bona bema “lasi” oi hereva gwauraia neganai, “lasi” sibona do oi gwau. Hereva haida ma do umui gwauraia lasi, Dirava ena panisi do umui davaria garina.

¹³Umui emui huanai be tau ta ia hisihisi noho, a? Do ia guriguri be namo. Tau ta ia moale, a? Di-ra-va hanamoa ane do ia abia be namo.

¹⁴Umui ta ia gorere, a? Ia ese eka-le-sia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, Lohiabada ena ladana dekenai.

¹⁵Inai guriguri mai abidadama danu ese gorere tauna do ia hanamoa. Lohiabada ese iena mauri do ia hanamoa, bona iena kara dika do ia gwauatao.

¹⁶Unai dainai umui ta ta dekenai emui kara dikadia do umui gwauraia hedinarai, bona umui ta ta totona do umui guriguri. Vadaeni unai neganai, Dirava ese emui mauri do ia hanamoa. Kara maoromaoro tauna ena guriguri be mai ena siahu. Inai bamona guriguri ese taunimanima ia durua diba.

¹⁷Elia be taunimanima sibona, ita bamona. To ia ese Dirava dekenai ia guriguri goadagoada, medu do ia diho lasi. Vadaeni lagani toi bona hua 6 lalonai medu ia diho lasi.

¹⁸Ma Elia ia guriguri lou, vadaeni medu be guba dekena amo ia diho, bona tano ese iena anina ia havaraia.

¹⁹Lauegu varavara taudia e, bema umui ta be hereva momokani ena dala dekena amo ia raka siri, bona bema ta ese ia hakaua lou, inai be namo bada.

²⁰Inai do umui laloa namonamo: Bema tau ta ese kara dika tauna ia durua, vadaeni unai dika tauna ese iena dala dikana ia rakatania, unai durua tauna ese unai tau ena lauma be mase dekena amo do ia hamauria. Bona unai durua tauna ena kara dika momo danu, be Dirava ese do ia gwauatao.