Read Buka Helaga (Hiri Motu) 1993 1 IOANE 3 Bible Online

1 IOANE 3 - Buka Helaga (Hiri Motu) 1993 bible

1 IOANE 3

¹Mani do umui laloa, iseda Tamana ese lalokau bada ita dekenai ia henia vadaeni, badina ia ese iena natuna ita ia gwauraia noho. Momokani ita be iena natuna. Unai dainai tanobada taudia be ita idia diba lasi, badina be idia diba lasi Dirava.

²Lauegu lalokau taudia e, harihari ita be Dirava ena natuna, to gabeai ita be edena bamona, be ita do diba namonamo lasi. To inai gauna ita diba namonamo: Keriso do ia hedinarai neganai, ita be iena toana bamona do ita lao, badina be iena toana korikori do ita itaia.

³Keriso idia naria noho mai abidadama danu taudia ibounai ese idia sibodia edia lalona idia hagoevaia noho, Keriso ia goeva hegeregerena.

⁴Kara dika tauna ese Dirava ena taravatu ia utua noho, badina kara dika be taravatu utua gauna.

⁵To umui diba, Keriso ia mai, kara dika do ia kokia totona. Bona ia lalonai be kara dika ia noho lasi.

⁶Keriso ena lalona dekenai ia noho tauna ese kara dika ia karaia noho lasi. To kara dika ia karaia noho tauna ese Keriso nega ta ia itaia lasi, bona Keriso nega ta ia diba lasi.

⁷Lauegu natuna e, do umui naria, tau ta ese umui do ia koia garina. Kara maoromaoro ia karaia tauna be kara maoromaoro tauna, Keriso be maoromaoro bamona.

⁸Satani ese hamatamaia nega dekena amo ia kara dika, unai dainai kara dika ia karaia noho tauna be Satani ena tauna. Dirava ena Natuna ia hedinarai ena badina korikori be inai: Satani ena kara dika do ia haorea momokani totona.

⁹Dirava ena natuna taudia ese kara dika do idia karaia noho lasi, badina be Dirava ena mauri be idia edia lalona dekenai ia noho. Bona unai taudia idia kara dika noho diba lasi, badina Dirava be edia Tamana dainai.

¹⁰Dirava ena natuna taudia be idau, bona Satani ena natuna taudia be ma idau. Edia idau be inai: Kara maoromaoro ia karaia noho lasi tauna be Dirava ena natuna lasi, bona iena tadikakana ia lalokau henia lasi tauna be Dirava ena natuna lasi.

¹¹Hamatamaia nega dekena amo ia mai bona harihari umui kamonai hadibaia hereva be inai: Ibounai ta ta dekenai do ita lalokau henia.

¹²Kaino ena kara bamona do ita karaia lasi, ia be Satani ena tau, bona ia ese iena tadina Abela ia alaia mase. Badina dahaka ia alaia? Badina be Kaino sibona ena kara be kerere, to iena tadina ena kara be maoromaoro.

¹³Unai dainai, lauegu varavara taudia e, tanobada taudia ese umui do idia badu henia, be do umui hoa lasi.

¹⁴Iseda tadikakana ita lalokau henidia dainai, ita diba mase ita rakatania, bona mauri dekenai ita hanaia vadaeni. Tau ta bema ia ese iena tadikakana ia lalokau henia lasi, unai tau be mase lalonai ia do noho.

¹⁵Bona iena tadikakana ia badu henia noho tauna be ala-ala tauna. Umui diba mauri hanaihanai be ala-ala tauna lalonai ia noho lasi.

¹⁶Lalokau ena toana, be inai kara dekena amo do ita diba: Keriso ese ita dainai iena mauri ia atoa diho. Unai dainai ita ese iseda tadikakana dainai, iseda mauri ita atoa diho danu be namo.

¹⁷To, bema tau ta be mai ena kohu momo, bona iena tadikakana ia itaia mai ena ogogami, to ia bogahisihisi henia lasi, edena bamona ia hereva, “Lau ese Dirava lau lalokau henia?”

¹⁸Lauegu natuna e, iseda lalokau be hereva gauna sibona lasi. Namo ita lalokau henia, hereva sibona dekena amo lasi, to mai kara, bona mai momokani danu.

¹⁹Inai iseda lalokau kara dekena amo, be do ita diba ita be momokani taudia. Vadaeni unai dainai, iseda kudouna be mai maino danu, Dirava ena vairana dekenai.

²⁰Bona bema iseda kudouna ese ita idia kota henia noho neganai, Dirava ena vairanai do ita laloa hekwarahi lasi. Badina Dirava ese gau ibounai ia diba, bona iena diba ese iseda kudouna ena diba ia hereaia momokani.

²¹Lauegu lalokau taudia e, bema iseda lalona ese ita idia kota henia lasi neganai, ita be Dirava ena vairanai do ita raka kahirakahira lao, gari ta lasi.

²²Vadaeni do ita noia gaudia ibounai be ia ese ita dekenai do ia henia. Badina be iena taravatu ita badinaia noho, bona ia do ita hamoalea karadia ita karaia noho dainai.

²³Dirava ena taravatu ita dekenai be inai: Iena Natuna Iesu Keriso do ita abidadama henia, bona ita ta ta ibounai dekenai do ita lalokau henia. Unai taravatu be ita dekenai Keriso ese ia henia vadaeni.

²⁴Iena taravatu ia badinaia noho tauna be Dirava ena lalona dekenai ia noho, bona Dirava danu be unai tau ena lalona dekenai ia noho. Dirava ese iena Lauma ita dekenai ia henia vadaeni, bona inai Lauma ese ita ia hadibaia noho, Dirava be iseda lalona dekenai ia noho.