Read Buka Helaga (Hiri Motu) 1993 GUNALAIA TAUDIA 10 Bible Online

GUNALAIA TAUDIA 10 - Buka Helaga (Hiri Motu) 1993 bible

GUNALAIA TAUDIA 10

¹Abimeleka ia mase murinai, tau ta ese ia toreisi, Israela ia hamauria. Iena ladana be Tola, iena tamana be Pua, bona iena tubuna ena ladana be Dodo. Ia be Isakara tauna, iena hanua be Samiri, Eparaima ena ororo tano dekenai.

²Tola ese lagani 23 lalonai Israela taudia ia gunalaia. Vadaeni ia mase, bona Samiri hanua dekenai idia guria.

³Tola ena murinai Iairi, Gileada tauna ia toreisi, ia ese lagani 22 lalonai Israela taudia ia gunalaia.

⁴Iena natuna tau be 30, bona idia be doniki 30 dekenai idia loaloa noho. Edia hanua danu be 30, hanua edia ladana be “Iairi ena Hanua” ia mai bona hari dina. Unai hanua ibounai be Gileada tano dekenai idia noho.

⁵Iairi ia mase neganai, Kamono hanua dekenai idia guria.

⁶Israela taudia ma idia kara dika Lohiabada ena vairanai, dirava idaudia idia tomadiho henia, dirava be inai: Bala, Asataroto, Suria taudia edia dirava, Sidono taudia edia dirava, Moaba taudia edia dirava, Amono taudia edia dirava, bona Pilistia taudia edia dirava. Bona idia ese Lohiabada idia rakatania, iena hesiai gaukara idia karaia lasi.

⁷Vadaeni Lohiabada ese Israela taudia ia badu henidia. Lohiabada ese Pilistia bona Amono taudia ia koua lasi, vadaeni idia ese Israela taudia dekena amo idia kwalimu.

⁸Unai lagani lalonai, unai bese ese Israela taudia idia moia diho, bona idia hisihisi henidia. Lagani 18 lalonai Pilistia taudia bona Amono taudia ese Israela taudia ibounai, Ioridane Sinavai ena dina daekau kahanai, idia hisihisi henidia. Unai be Gileada tano, guna Amoro taudia idia noho gabuna.

⁹Amono taudia ese danu Ioridane Sinavai idia hanaia, Iuda bona Beniamina bona Eparaima iduhu taudia idia tuari henia. Unai dainai Israela taudia be nega dika idia abia, mai edia gari danu.

¹⁰Vadaeni Israela taudia ese Lohiabada dekenai idia tai henia, idia gwau, “Ai be ai kara dika vadaeni oiemu vairana dekenai, badina oi, aiemai Dirava ai rakatania vadaeni, Bala dirava dekenai ai tomadiho henia.”

¹¹Lohiabada ese Israela taudia dekenai ia haere, ia gwau, “Lau ese Aigupito taudia bona Amoro taudia bona Amono taudia bona Pilistia taudia edia siahu dekena amo umui lau hamauria, ani?

¹²Sidono taudia bona Amaleka taudia bona Maono taudia ese danu umui idia hisihisi henia, bona lau dekenai umui tai neganai, lau ese edia imana dekena amo umui lau hamauria.

¹³To umui ese lau umui rakatania vadaeni, idau dirava edia hesiai gaukara umui karaia vadaeni, unai dainai umui do lau hamauria lou lasi.

¹⁴Umui lao, bona umui abia hidi dirava idauidau dekenai do umui tai henia, idia ese emui hisihisi neganai, umui do idia hamauria.”

¹⁵To Israela taudia ese Lohiabada idia hereva henia lou, idia gwau, “Ai be ai kara dika vadaeni. Oi sibona oiemu laloa hegeregerena ai dekenai do oi karaia. To mani emu kara, hari dina, oi ese ai do oi hamauria.”

¹⁶Unai dainai idia ese edia dirava idaudia idia negea momokani, bona Lohiabada dekenai idia tomadiho henia. Vadaeni Lohiabada ese Israela taudia edia hisihisi dainai iena lalona ia hisihisi.

¹⁷Vadaeni Amono taudia idia haboua, do idia tuari totona, bona Gileada tano dekenai idia kamepa. Israela taudia danu idia haboua, Misipa dekenai idia kamepa, Gileada tano dekenai.

¹⁸Israela ena iduhu lohia taudia Gileada dekenai be sibodia dekenai idia herevahereva, idia gwau, “Daika ese Israela taudia do ia gunalaia, Amono taudia ita tuari henia neganai? Unai kara ia karaia tauna, be Gileada dekenai idia noho taudia ibounai edia gunalaia tauna do ia lao.”