Read Buka Helaga (Hiri Motu) 1993 GUNALAIA TAUDIA 17 Bible Online

GUNALAIA TAUDIA 17 - Buka Helaga (Hiri Motu) 1993 bible

GUNALAIA TAUDIA 17

¹Tau ta be Eparaima ena ororo tano dekenai ia noho, iena ladana be Mika.

²Ia ese iena sinana ia hamaoroa, ia gwau, “Unai siliva moni 1100 oi dekena amo tau ta ese ia henaoa neganai, oi ese unai henaoa tauna ena latanai hadikaia hereva metauna oi gwauraia. Lau ese unai oiemu hadikaia hereva lau kamonai, badina lau ese unai moni lau henaoa. Oi itaia, oiemu moni be inai.” Iena sinana ia gwau, “Egu natuna e, Lohiabada ese oi do ia hanamoa.”

³Mika ese unai moni be iena sinana dekenai ia henia lou. Vadaeni iena sinana ia gwau, “Unai hadikaia hereva ese oi, egu natuna do ia hadikaia garina, lau ese inai siliva moni be Lohiabada dekenai do lau henia. Vadaeni au dekenai kaivakuku ta do idia karaia, bona siliva do idia havevea, bona siliva dekena amo inai kaivakuku do idia koua. Unai dainai egu natuna e, inai siliva moni oi dekenai do lau henia lou.”

⁴Vadaeni Mika ese unai siliva moni be iena sinana dekenai ia henia lou. Iena sinana ese siliva moni 200 ia abia, siliva ia gaukaralaia diba tauna dekenai ia henia, bona ia ese au dekena amo kaivakuku ia karaia guna, gabeai siliva dekena amo ia koua. Kaivakuku be Mika ena ruma lalonai ia atoa.

⁵Inai tau, Mika be mai ena dubu. Vadaeni ia ese epodi dabua helagana, bona kaivakuku haida ia karaia, bona iena natuna tau ta ia abia hidi, iena hahelagaia tauna ia halaoa.

⁶Unai dinadia lalonai, Israela taudia be mai edia king lasi. Bona Israela taudia be idia ta ta sibona edia laloa hegeregerena idia karaia.

⁷Uhau ta be Betelehema dekenai ia noho, Iuda tano dekenai. Ia be Iuda iduhu tauna, ia be Levi tauna danu.

⁸Unai tau be Betelehema dekena amo ia toreisi, ia laolao, iena noho gabuna ta do ia tahua totona. Dala dekenai ia raka noho neganai, Mika ena ruma, Eparaima ena ororo tano dekenai ia ginidae.

⁹Mika ese uhau ia nanadaia, ia gwau, “Oi mai edeseni?” Uhau ia haere, ia gwau, “Lau be Levi tauna, Betelehema, Iuda tano dekena amo lau mai. Egu noho ruma ta lau tahua noho.”

¹⁰Vadaeni Mika ese uhau dekenai ia haere, ia gwau, “Namona be lau dekenai do oi noho, lauegu tamana, bona lauegu hahelagaia tauna do oi lao. Bona lagani ta ta ibounai siliva moni 10 oi dekenai do lau henia, oiemu dabua bona oiemu aniani danu do lau henia.”

¹¹Vadaeni inai Levi uhau tauna ese Mika iena hereva ia abia dae. Ia be Mika ena ruma dekenai ia noho, bona ia be Mika ese iena natuna tau ta bamona ia halaoa.

¹²Mika ese unai Levi tauna ia abia hidi, vadaeni ia be Mika ena hahelagaia tauna ia lao, bona Levi tauna be Mika ena ruma dekenai ia noho.

¹³Mika ia gwau, “Harihari lau diba Lohiabada ese lau do ia hanamoa, badina be Levi tauna ta lau abia vadaeni, bona ia be lauegu hahelagaia tauna.”