Read Buka Helaga (Hiri Motu) 1993 GUNALAIA TAUDIA 19 Bible Online

GUNALAIA TAUDIA 19 - Buka Helaga (Hiri Motu) 1993 bible

GUNALAIA TAUDIA 19

¹Unai dinadia lalonai, Israela be mai ena king lasi neganai, Levi tauna ta be Eparaima ororo tano dekenai ia noho, gabu daudau dekenai. Ia ese hesiai hahine ta Betelehema hanua dekena amo ia adavaia. Betelehema be Iuda tano dekenai.

²To dina ta unai hahine ese unai Levi tauna ia badu henia, vadaeni ia toreisi, iena tamana ena ruma dekenai ia giroa lou, Betelehema dekenai. Hua 4 be unuseni ia noho.

³Vadaeni iena tau, Levi tauna ia toreisi, hahine ena murina dekenai ia lao, edia hepapahuahu do ia hamaoromaoroa, bona hahine do ia hakaua lou totona. Levi tauna ese iena hesiai tauna bona doniki rua ia abia lao. Hahine ese iena tamana ena ruma lalonai Levi tauna ia abia dae, bona hahine ena tamana ese ia itaia neganai, ia danu ia abia dae, mai moale danu.

⁴Hahine ena tamana ia ura bada iena ruma dekenai Levi tauna ia noho, vadaeni dina toi unuseni ia noho. Idia aniani hebou, idia inuinu hebou, bona idia mahuta unuseni.

⁵Dina namba 4, idia be daba maragi neganai idia toreisi, bona Levi tauna ia hegaegae vadaeni, do idia raka gwauraia. To hahine ena tamana ese iena ravana ia noia, ia gwau, “Mani do oi aniani guna, goada do oi abia, vadaeni do umui raka.”

⁶Vadaeni tau ruaosi idia helai diho, idia aniani hebou, bona idia inuinu hebou. Ma hahine ena tamana ese ia noia, ia gwau, “Mani emu kara do oi mahuta, oiemu lalona do ia moale.”

⁷Levi tauna ia toreisi, do ia lao gwauraia, to ravana ese ia noia lou, ela bona unuseni ma ia mahuta lou.

⁸Dina namba 5 dekenai daba maragi, Levi tauna ia toreisi, do ia raka gwauraia. To hahine ena tamana ia gwau, “Do oi aniani, do oi naria, ela bona adorahi.” Vadaeni ruaosi idia aniani hebou lou.

⁹Vadaeni Levi tauna, mai ena hahine, bona mai ena hesiai tauna danu idia toreisi, do idia raka gwauraia. To hahine ena tamana ia gwau, “Oi itaia, dina be kahirakahira ia diho, mani emu kara iniseni do umui mahuta ela bona dabai. Hari be adorahi, bona hanuaboi be kahirakahira. Iniseni do umui noho, bona do ita moale hebou. Kerukeru daba maragi neganai do umui toreisi, emui ruma dekenai do umui giroa lao.”

¹⁰To Levi tauna be ia ura lasi unuseni do ia mahuta. Ia be ia toreisi, mai ena adavana, bona mai edia hesiai tauna bona edia doniki rua. Idia be Iebusu, unai gabu ena ladana ta be Ierusalema, dekenai idia lao gwauraia.

¹¹Iebusu kahirakahira idia ginidae neganai, dina be kahirakahira ia diho. Unai dainai hesiai tauna ese Levi tauna ia hamaoroa, ia gwau, “Mani emu kara, inai Iebusu taudia edia hanua dekenai do ita mahuta.”

¹²To iena biaguna ia haere, ia gwau, “Lasi, unai idau bese taudia edia hanua do ita raka vareai lasi. Idia be Israela taudia lasi. Do ita raka hanaia, Gibea dekenai do ita lao.”

¹³Levi tauna ese iena hesiai tauna ma ia hamaoroa, ia gwau, “Oi mai, unai Gibea kahana tano do ita lao, Gibea hanua o Rama hanua dekenai do ita mahuta.”

¹⁴Vadaeni ma idia raka lao, dala dekenai idia lao, bona Gibea hanua be kahirakahira neganai, dina be ia diho momokani vadaeni. Unai Gibea be Beniamina taudia edia hanua ta.

¹⁵Dala idia rakatania, unai hanua dekenai do idia noho totona. Hanua lalonai idia raka vareai, bona hanua ena ariara dekenai idia helai diho, badina tau ta ese idia ia abia dae lasi iena ruma dekenai.

¹⁶Unai adorahi dekenai tau buruka ta be iena uma gaukara dekena amo ia mai. Ia be guna Eparaima ororo tano dekena amo ia mai, to Gibea hanua dekenai ia noho, to hanua dekenai idia noho taudia be Beniamina taudia.

¹⁷Tau buruka ese ariara dekenai ia helai laolao tauna ia itaia. Tau buruka ia gwau, “Oi be edeseni oi lao, bona edeseni oi mai?”

¹⁸Levi tauna ia haere, ia gwau, “Ai be Betelehema, Iuda tano, dekena amo ai mai. Hari ai be aiemai ruma Eparaima ena ororo dekenai ai giroa lao noho. To tau ta ese iena ruma dekenai ai ia abia dae lasi.

¹⁹Ai be mai rei kaukau bona aniani aiemai doniki totona, bona beredi bona uaina idia noho lau, bona egu hahine, bona egu hesiai tauna totona. Aiemai aniani ibounai ia noho.”

²⁰Tau buruka ia gwau, “Egu ruma dekenai umui noho diba! Lau ese umui do lau naria, lau ura lasi ariara dekenai umui noho ela bona dabai.”

²¹Vadaeni ia ese iena ruma dekenai idia ia hakaua vareai, bona doniki dekenai edia aniani ia henia. Ranu be iena vadivadi taudia dekenai ia henia, edia aena idia huria, bona idia aniani bona inuinu.

²²Idia moale noho neganai, lebulebu taudia haida be ruma idia hagegea, bona iduara idia botaia dikadika. Idia ese ruma biaguna, unai tau buruka, idia hamaoroa, idia gwau, “Oiemu ruma dekenai ia noho tauna do oi hakaua murimurina dekenai, ai ese do ai sihari henia.”

²³To ruma ena biaguna be idia dekenai murimuri dekenai ia raka, ia gwau, “Egu turadia e, mani emui kara unai bamona kara dikana do umui karaia lasi. Inai tau be lauegu vadivadi tauna, unai kara mirona do umui karaia lasi.

²⁴Umui itaia, egu natuna kekeni rami hebouna ia noho, bona tau ena hahine danu ia noho. Idia be do lau hakaua umui dekenai, do umui abia, emui ura hegeregere idia dekenai do umui karaia, to inai tau dekenai unai kara mirona do umui karaia lasi.”

²⁵To hanua taudia ese idia kamonai henia lasi. Unai dainai Levi tauna ese iena hahine ia abia, ia doria lao murimuri dekenai. Idia ese unai hahine idia abia, bona hanuaboi ena nega ibounai lalonai idia sihari henia, ela bona daba rere. Unai neganai idia ruhaia.

²⁶Daba rere neganai hahine be ia lao, tau buruka ena ruma ena iduara dekenai ia moru diho, bona unuseni ia noho ela bona dina ia daekau.

²⁷Hahine ena tau be dabai ia toreisi, ruma ena iduara ia kehoa, iena laolao ma do ia lao gwauraia. Vadaeni iena hahine ia itaia, iduara ena vairanai ia hekure, madi iena imana ia atoa, be iduara dogoatao totona, to ia hegeregere lasi.

²⁸Levi tauna ia hamaoroa, ia gwau, “Oi toreisi, ita lao.” To hahine be ia haere lasi. Tau ese iena hahine ena tauanina ia abia isi, doniki ena doruna dekenai ia atoa, bona iena ruma dekenai ia abia lao.

²⁹Iena ruma lalonai ia raka vareai, vadaeni kaia ia abia, iena hahine ena tauanina ia abia, ia utua parara, kahana 12. Vadaeni inai kahana 12 be Israela tanona ibounai dekenai ia siaia, iduhu 12 ta ta dekenai.

³⁰Vadaeni idia itaia taudia ibounai idia gwau, “Unai bamona kara be nega ta ia vara lasi, bona nega ta ia hedinaraia lasi, Israela taudia be Aigupito dekena amo idia raka siri dinana ia mai bona hari dina. Umui be dahaka umui laloa? Ita be dahaka do ita karaia?”