Read Buka Helaga (Hiri Motu) 1993 APOKALUPO 10 Bible Online

APOKALUPO 10 - Buka Helaga (Hiri Motu) 1993 bible

APOKALUPO 10

¹Vadaeni aneru goadana ma ta lau itaia, guba dekena amo ia diho. Ori ta ese ia kumia, dabua bamona, bona kevau ese iena kwarana ia hagegea. Iena vairana be dina bamona, bona iena aena edia toana be du, lahi ese idia ia araia noho, mai hururuhururu bada danu.

²Aneru ena imana dekenai be buka maragina ta ia noho, ia kehoa noho. Vadaeni aneru ese iena aena idibana be davara dekenai ia atoa, bona iena aena laurina be tanobada dekenai ia atoa.

³Ia boiboi bada herea, iena gadona be laiona edia boiboi bamona. Ia boiboi murinai, guba ena boiboi ibounai 7, mai regena bada be aneru dekenai idia haere henia.

⁴Inai guba boiboi idia hereva neganai, lau ese edia hereva lau torea gwauraia. To gado ta guba dekena amo lau kamonai, ia gwau, “Inai guba boiboi ena hereva do oi torea lasi. Do oi hunia noho.”

⁵Vadaeni davara bona tanobada dekenai ia gini aneruna ese iena imana idibana ia duduia guba dekenai.

⁶Ia ese ia mauri noho hanaihanai Diravana ena ladana dekenai gwauhamata metauna ia gwauraia. Inai Dirava ese guba bona iena lalonai gaudia ibounai, bona tanobada bona iena lalonai gaudia ibounai, bona davara bona iena lalonai gaudia ibounai ia karaia. Aneru ia gwau, “Nega ena dokona be ia kahirakahira momokani. Dirava ese ma nega sisina do ia naria lasi.

⁷Aneru namba 7 ese iena kibi do ia hiriria gwauraia neganai, Dirava ese iena palani, hunia gauna, do ia karaia haorea. Dirava ese inai palani ena anina, be guna iena hesiai taudia peroveta taudia dekenai ia hamaoroa.”

⁸Vadaeni unai gado, guna guba dekena amo lau kamonai gauna, ese lau dekenai ia hereva henia lou, ia gwau, “Oi lao, davara bona tanobada dekenai ia gini aneru ena imana dekenai ia noho buka maragina, kehoa gauna, do oi abia.”

⁹Unai aneru dekenai lau lao, lau gwau, “Buka maragina lau dekenai oi henia.” Vadaeni ia gwau, “Oi abia, oi ania ore, oiemu bogana dekenai iena mamina do ia dika, to oiemu uduna dekenai iena mamina be do ia namo, hani bamona.”

¹⁰Vadaeni buka maragina aneru ena imana dekena amo lau abia, lau ania ore. Lauegu uduna dekenai ia be namo, hani bamona, to lau ania ore murinai, egu bogana ena mamina lau abia be ia dika.

¹¹Vadaeni ia ese lau ia hamaoroa, ia gwau, “Taunimanima idauidau, bese idauidau, gado idauidau bona king idauidau danu, inai taudia ibounai dekenai do idia vara gaudia do oi gwauraia hedinarai lou.”