Read Buka Helaga (Hiri Motu) 1993 APOKALUPO 11 Bible Online

APOKALUPO 11 - Buka Helaga (Hiri Motu) 1993 bible

APOKALUPO 11

¹Vadaeni itotohi ta, iena toana be hahetoho auna, lau dekenai idia henia, idia gwau, “Oi lao, Dirava ena dubu helaga bona pata helagana edia bada do oi hahetoho karaia. Bona dubu helaga lalonai idia tomadiho noho taudia do oi duahia.

²Dubu helaga ena ariara, murimuri magu ese ia hagegea gauna, be do oi hahetoho karaia lasi. Badina unai gabu be Dirava diba lasi taudia edia. Idia ese hanua helagana dekenai do idia mai, edia aena dekena amo do idia moia, hua 42 lalonai.

³Lau ese egu uitnesi taudia rua dekenai siahu do lau henia. Vadaeni idia ese puse dabua do idia karaia, bona dina 1260 lalonai Dirava ena peroveta hereva do idia gwauraia hedinarai.”

⁴Inai uitnesi taudia rua be olive audia rua bona lamepa rua, tanobada ena Lohiabada ena vairanai idia gini noho.

⁵Tau ta bema ia ura unai uitnesi ruaosi do ia hadikaia neganai, idia ese edia uduna dekena amo lahi do idia negea, unai tau do idia araia ore. Vadaeni, bema tau ta ese unai uitnesi taudia ia alaia toho neganai, ia be do ia mase momokani.

⁶Unai uitnesi ruaosi be mai edia siahu guba do idia koua, vadaeni edia haroro dinadia lalonai medu do ia diho lasi. Idia be mai siahu danu tanobada ena ranu be rara dekenai do idia halaoa. Mai edia siahu danu, hisihisi idauidau dekena amo tanobada taudia do idia hisihisi henia. Inai bamona idia karaia diba nega momo, edia ura hegeregerena.

⁷Edia peroveta hereva gwauraia hedinarai gaukara ia ore neganai, unai dagedage gauna dikana, be guri dobu masemase dekena amo do ia daekau mai. Vadaeni ia ese idia ruaosi do ia tuari henia. Unai dagedage gauna be do ia kwalimu, ia ese unai uitnesi taudia ruaosi do ia aladia mase.

⁸Vadaeni ruaosi edia tauanidia be hanua badana ena ariara dekenai do idia hekure noho. Unai gabu be edia Lohia idia hasatauroa gabuna. Unai hanua badana ena ladana, parabole dekenai, be Sodoma, o Aigupito.

⁹Vadaeni dina toi mai dina kahana lalonai, taunimanima idauidau momo, bese idauidau, gado idauidau, kopina idauidau taudia ese unai uitnesi ruaosi edia tauanina do idia itaia noho. Bona unai taunimanima ese haida edia dala do idia koua, vadaeni ruaosi edia tauanina idia guria diba lasi.

¹⁰Bona tanobada taudia be idia ruaosi edia mase dainai do idia moale bada. Edia turana ta ta dekenai harihari gaudia do idia henia, edia moale hedinaraia ena toana. Badina korikori be unai peroveta taudia ruaosi ese tanobada taudia idia hisihisi henia bada herea dainai.

¹¹To dina toi mai dina kahana ta ia ore, Dirava ese mauri ena laga idia ruaosi dekenai ia siaia lao, idia lalonai inai laga ia vareai. Vadaeni ruaosi idia toreisi, idia gini. Unai kara idia itaia taudia idia gari bada herea.

¹²Unai neganai unai peroveta taudia ruaosi ese gado ta guba dekena amo idia kamonai, ia hereva badabada, idia ia boiboi henia. Ia gwau, “Umui daekau mai iniseni.” Vadaeni idia ruaosi ori ta lalonai guba dekenai idia daekau. Idia badu henidia taudia ese ruaosi idia itaia, idia daekau lao noho.

¹³Vadaeni, unai nega korikori, nega tamona, tano mareremarere badana ta ia vara. Unai hanua kahana 10 dekena amo, kahana ta ia hadikaia ore. Bona tano mareremarere dainai, taunimanima 7000 idia mase momokani. Taunimanima oredia, idia mauri noho taudia ese idia gari dikadika, bona guba ena Dirava ena siahu idia hanamoa bada.

¹⁴Dika iharuana be ia ore vadaeni. Ihatoina be kahirakahira do ia mai.

¹⁵Aneru namba 7 ese iena kibi ia hiriria. Vadaeni gado badadia guba dekenai idia hereva, idia gwau, “Tanobada biagua siahuna be iseda Lohiabada bona iena Keriso idia abia vadaeni. Bona Lohiabada ese tanobada do ia biagua momokani, ela bona hanaihanai.”

¹⁶Vadaeni badana taudia 24, Dirava ena vairanai edia helai gabudia dekenai idia helai taudia, ese idia tui diho, Dirava idia tomadiho henia, idia gwau,

¹⁷“Lohiabada e, Siahu Ibounai Diravana, harihari oi noho, gunaguna oi noho. Ai ese oi ai tanikiu henia. Oi ese oiemu siahu bada oi gaukaralaia vadaeni, bona oiemu Basileia oi biagua hamatamaia vadaeni.

¹⁸Dirava diba lasi taudia idia badu dikadika, badina be oiemu badu ena nega ia ginidae vadaeni. Mase taudia edia kota henia nega danu ia ginidae vadaeni. Oiemu hesiai taudia, peroveta taudia, be harihari edia davana namona do oi henia. Oi dekenai idia gari henia taudia ibounai, badadia bona maragidia, edia davana namona do oi henia ena nega danu, be ia ginidae vadaeni. Harihari be tanobada idia hadikaia vadaeni taudia do oi alaia ore.”

¹⁹Vadaeni Dirava ena dubu helaga guba dekenai be ia kehoa, bona Dirava ena Taravatu Maua be dubu helaga lalonai ia hedinarai. Unai neganai kevaru, bona guba ena boiboi, bona tano mareremarere badana, bona medu, aisi nadi bamona, idia vara.