Read Buka Helaga (Hiri Motu) 1993 APOKALUPO 17 Bible Online

APOKALUPO 17 - Buka Helaga (Hiri Motu) 1993 bible

APOKALUPO 17

¹Unai disi 7 idia bubua aneruna ta be lau dekenai ia mai, ia gwau, “Oi mai, ariara hahine badana do idia panisia dalana oi dekenai do lau hedinaraia. Ia be unai hanua badana, sinavai momo edia badinai idia haginia hanuana.

²Tanobada ena king ese ia danu matabodaga karadia idia karaia. Bona tanobada noho taudia ese iena matabodaga uaina idia inua, vadaeni idia kekero.”

³Unai neganai Lauma Helaga ese lau ia abia, bona unai aneru ese taunimanima noho lasi tano dekenai lau ia abia lao. Unuseni hahine ta, dagedage gauna kakakakana ta ena latanai ia helai, be lau itaia. Unai dagedage gauna ena kwarana be 7, bona iena doana be 10. Ia latanai be Dirava hadikaia ladana momo herea idia torea.

⁴Unai hahine ena dabua kala be kakakaka, bona ma sisina kakakaka. Iena herahera gaudia be golo, davana bada nadidia, bona davana bada kavabukavabu. Iena imana dekenai golo kapusi ia dogoatao. Kapusi be iena matabodaga gau dika rohorohodia bona gau mirodia dekenai ia honu.

⁵Hahine ena baguna dekenai be ladana ta ia torea. Inai ladana ena anina be hunia gauna: “Babulonia badana, ariara hahine ibounai bona tanobada ena kara mirodia ibounai edia sinana.”

⁶Bona lau itaia, unai hahine be ia kekero vadaeni. Momokani, ia ese Dirava ena taudia edia rarana, bona Iesu idia badinaia dainai idia alaia mase taudia edia rarana ia inua dainai, unai hahine ia kekero. Lau itaia neganai lau hoa dikadika.

⁷Aneru ese lau ia nanadaia, ia gwau, “Badina dahaka oi hoa noho? Inai hahine ena sivarai, hunia gauna, bona ia latanai hahine ia helai dagedage gauna, mai ena kwarana 7 bona doana 10, inai sivarai oi dekenai do lau hamaoroa.

⁸Inai dagedage gauna oi itaia, be gunaguna ia noho, to harihari ia noho lasi. To nega daudau lasi, ia be guri dobu masemase gabuna dekena amo do ia daekau, vadaeni mase hanaihanai gabuna dekenai do ia lao. Tanobada dekenai noho taunimanima, idia momo be Dirava ese edia ladana mauri buka lalonai ia torea lasi, tanobada ia karaia neganai ia mai bona hari. Inai bamona taudia ese unai dagedage gauna do idia itaia, bona do idia hoa bada. Badina be inai: Guna be ia noho, hari be ia mauri noho lasi, to gabeai ma do ia hedinarai mai.

⁹“Aonega tauna be inai gauna ena anina do ia diba: Inai kwara 7 be ororo 7, hahine be idia latanai ia helai.

¹⁰Bona unai kwara 7 danu be king 7. Idia 5 be idia moru vadaeni. Idia ta be harihari king dagi ia dogoatao noho. To ta be king dagi ia do abia lasi. Do ia hedinarai neganai, do ia king nega sisina sibona.

¹¹Bona inai dagedage gauna, guna be ia noho, to hari be ia noho lasi, ia be king namba 8. To ia be idia edia orea tauna ta, bona ia be mase hanaihanai gabuna dekenai do ia lao.

¹²“Iena doana 10, oi itaia gaudia, be king 10, to edia basileia idia do abia lasi. Idia ese unai dagedage gauna danu king siahuna do idia abia, hora tamona sibona.

¹³Inai king 10 ibounai edia lalona be tamona, vadaeni edia siahu bona dagi be unai dagedage gauna dekenai do idia henia.

¹⁴Idia ese Mamoe ena Natuna do idia tuari henia, to Mamoe ena Natuna be do ia kwalimu. Badina be inai: Ia be lohia ibounai edia Lohia, bona king ibounai edia King. Iena kwalimu, be Mamoe ena Natuna idia badinaia taudia, bona ia idia abidadama henia taudia ese danu do idia abia nega tamona, idia be ia ese ia abia hidi vadaeni taudia.”

¹⁵Bona aneru ese lau ia hamaoroa, ia gwau, “Oi itaia ranu momo gabudia, hahine be idia dekenai ia helai gabudia. Idia be tano idauidau taudia, bese idauidau taudia, kopina idauidau taudia, bona gado idauidau taudia.

¹⁶Bona dagedage gauna mai ena doana 10, oi itaia vadaeni gaudia, ese ariara hahine do idia badu henia. Do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua.

¹⁷Oibe, Dirava ese iena palani be unai king 10 edia lalona dekenai do ia atoa. Vadaeni mai edia laloa tamona idia ese edia dagi siahuna be dagedage gauna dekenai do idia henia. Unai bamona do idia karaia, ela bona Dirava ese iena hereva ibounai do ia hamomokania vadaeni.

¹⁸“Bona hari oi itaia hahine be unai hanua badana, tanobada ena king ibounai ia ese ia biagua hanuana.”