Read Buka Helaga (Hiri Motu) 1993 APOKALUPO 21 Bible Online

APOKALUPO 21 - Buka Helaga (Hiri Motu) 1993 bible

APOKALUPO 21

¹Vadaeni guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. Davara danu be ia ore vadaeni.

²Bona Hanua Helagana, Ierusalema matamatana lau itaia, guba dekena amo ia diho mai noho, Dirava dekena amo. Inai Hanua Helagana be headava matamata kekeni bamona, ia herahera namo herea, dabua namona ia karaia, iena adavana totona ia hegaegae vadaeni.

³Gado ta lau kamonai, helai gabuna badana dekena amo ia mai, ia hereva badabada, ia gwau, “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao.

⁴Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”

⁵Vadaeni helai gabuna badana latanai ia helai Diravana ia hereva, ia gwau, “Harihari be gau ibounai lau karaia matamata inai.” Ma lau dekenai ia hereva, ia gwau, “Harihari inai hereva do oi torea, badina ia be maoromaoro bona momokani vadaeni, bona inai hereva do umui abidadama henia diba.”

⁶Ma ia gwau, “Ia ore vadaeni! Lau be Matamana bona Dokona, lau be gau ibounai edia badina, bona egu gaukara ibounai be do lau karaia haorea. Bema tau ta ia ranu mase, lau be ranu do lau henia, davana lasi. Inai ranu be lohilohi gabuna dekena amo ia daekau noho mauri ranuna.

⁷Kwalimu tauna ena kwalimu ahuna be inai: Lau be iena Dirava do lau lao, bona ia be lauegu natuna.

⁸To lau badinaia totona idia gari taudia, abidadama lasi taudia, kara bodaga taudia, taunimanima idia alaia taudia, lebulebu taudia, meamea taudia, kaivakuku dekenai idia tomadiho henia taudia, bona koikoi taudia ibounai, idia ibounai edia davana be dika. Idia be unai gohu, lahi bona salipa idia araia noho gabuna lalonai do idia lao. Inai be mase iharuana.”

⁹Unai neganai aneru ta lau dekenai ia mai. Ia be unai aneru 7 oreana, edia aneru ta. Idia ese guna hisihisi idia havaraia disi idia dogoatao. Ia ese lau ia hamaoroa, ia gwau, “Oi mai, headava matamata hahinena, Mamoe ena Natuna ena adavana oi dekenai do lau hedinaraia.”

¹⁰Vadaeni Lauma Helaga ese lau ia abia, bona aneru ese lau ia abia lao ororo badana ta ena atai dekenai. Ia ese Ierusalema Hanua Helagana lau dekenai ia hedinaraia, guba dekena amo ia diho mai noho, Dirava dekena amo.

¹¹Dirava ena hairaina ese unai hanua ia hadiaria, bona davana bada nadi bamona ia hururuhururu. Iena toana be iasipa nadina bamona, bona galasi bamona ia diaridiari.

¹²Hanua be mai ena magu. Inai magu be bada bona iena ataiai be lata. Magu ena iduara ibounai be 12, bona aneru 12 be unai iduara badinai idia gini. Iduara edia latanai be Israela ena iduhu 12 edia ladana idia torea.

¹³Magu ena iduara be inai bamona: Dina ia daekau kahanai iduara be toi, mirigini kahanai iduara be toi, diho kahanai iduara be toi, bona dina ia diho kahanai iduara danu be toi.

¹⁴Bona magu ena badina nadidia be 12, bona idia latanai be Mamoe ena Natuna ena aposetolo taudia 12 edia ladana idia torea.

¹⁵Lau dekenai ia hereva henia aneruna ena imana dekenai be hahetoho auna ta, golo dekena amo ia karaia gauna. Ia dekena amo aneru ese hanua, bona iduara, bona magu edia bada ia hahetoho karaia.

¹⁶Hanua ena kahana 4 edia bada be hegeregere. Iena lababa bona ena lata be hegeregere. Aneru ese iena hahetoho auna dekena amo hanua ena bada ia hahetoho karaia. Iena lata be 2400 kilomita, iena lababa be 2400 kilomita, bona iena ataiai ena lata danu be 2400 kilomita.

¹⁷Magu danu ena bada ia hahetoho karaia, bona iena ataiai ena lata be 60 mita. Aneru ese taunimanima edia hahetoho dalana ia gaukaralaia.

¹⁸Hanua ena magu be iasipa nadina dekena amo idia karaia, bona hanua be golo goeva momokani dekena amo idia haginia, to ia diaridiari, galasi bamona.

¹⁹Hanua ena magu ena badina nadidia ibounai be davana bada nadidia idauidau dekena amo idia heraheralaia. Davana bada nadi ginigunana be iasipa, iharuana be sapairo, ihatoina be kalakedo, namba 4 be samaragi,

²⁰namba 5 be sadonu, namba 6 be sadio, namba 7 be krusolito, namba 8 be berulo, namba 9 be topasio, namba 10 be krusoparaso, namba 11 be huakinto, namba 12 be ametuso.[1]

²¹Iduara 12 be kavabukavabu 12. Iduara ta ta be kavabukavabu tamona dekena amo idia karaia. Hanua ena ariara ibounai be golo goeva momokani, to ia be galasi bamona ia diaridiari.

²²Hanua lalonai dubu helaga ta lau itaia lasi. Badina be Lohiabada, Siahu Ibounai Diravana, bona Mamoe ena Natuna, be unai hanua ena dubu helaga.

²³Dina bona hua edia diari danu unai hanua dekenai be lasi. Badina be Dirava ena hairaina ese unai hanua ia hadiaria noho. Bona Mamoe ena Natuna be unai hanua ena lamepa.

²⁴Tanobada ena bese idauidau ese unai hanua ena diari lalonai do idia raka. Bona tanobada ena king ese edia kohu ia dekenai do idia mailaia vareai.

²⁵Dina lalonai unai hanua ena iduara be do idia koua lasi. Oibe, iduara be nega ta do idia koua lasi, badina hanuaboi be lasi unuseni.

²⁶Tanobada ena bese idauidau ese unai hanua dekenai edia hairai gaudia bona edia kohu do idia abia mai vareai.

²⁷To dika gauna ta be unai hanua dekenai do ia vareai diba lasi. Lebulebu idia karaia taudia, o koikoi taudia be do idia vareai lasi. Lasi momokani. Mamoe ena Natuna ena mauri bukana lalonai edia ladana idia torea taudia sibona be unai hanua dekenai do idia vareai.