Read Buka Helaga (Hiri Motu) 1993 APOKALUPO 22 Bible Online

APOKALUPO 22 - Buka Helaga (Hiri Motu) 1993 bible

APOKALUPO 22

¹Aneru ese mauri ranuna ena sinavai lau dekenai ia hedinaraia. Ia be galasi bamona ia diaridiari, bona iena ranu be Dirava bona Mamoe ena Natuna edia helai gabuna badana dekena amo ia heau lao.

²Inai sinavai be hanua ena ariara badana ena huanai ia heau lao. Sinavai ena kahana kahana be mauri audia idia gini. Inai mauri auna ese lagani ta lalonai huahua ia atoa nega 12, hua ta ta ibounai lalonai huahua ia atoa. Inai au ena rauna ese bese idauidau idia hanamoa noho.

³Unai hanua ena lalonai, Dirava ese ia gwauraia dika vadaeni gauna ta be do ia noho diba lasi. Dirava bona Mamoe ena Natuna edia helai gabuna badana be unai hanua lalonai do ia noho. Bona Dirava ena hesiai taudia ese ia do idia tomadiho henia.

⁴Idia ese Dirava ena vairana do idia itaia, bona iena ladana be edia baguna dekenai ia ese do ia torea.

⁵Unai hanua dekenai be hanuaboi lasi, bona unuseni idia noho taudia ese lamepa o dina ena diari do idia ura lasi. Badina be Lohiabada Dirava ese idia dekenai diari do ia henia. Bona idia ese king hegeregerena do idia lohia noho, ela bona hanaihanai.

⁶Aneru ese lau ia hamaoroa, ia gwau, “Inai hereva be maoromaoro bona momokani, bona inai hereva do oi abidadama henia diba. Lohiabada Dirava ese iena Lauma Helaga iena peroveta taudia dekenai ia henia noho. Ia ese iena aneru ia siaia vadaeni, kahirakahira do idia vara gaudia, iena hesiai taudia dekenai do ia hadibaia totona.”

⁷Iesu ia hereva, ia gwau, “Kamonai! Lau be do lau mai haraga! Inai buka ena peroveta herevadia idia kamonai henia taudia be do idia moale!”

⁸Lau Ioane ese inai hereva ibounai lau kamonai, bona inai kara ibounai lau itaia. Bona unai gaudia lau itaia bona kamonai haorea neganai, lau dekenai unai gaudia ia hedinaraia aneruna ena aena badinai lau tui diho, do lau tomadiho henia totona.

⁹To lau dekenai ia hereva, ia gwau, “Unai bamona do oi karaia lasi. Lau be hesiai tauna, oi bamona, bona lau be oiemu varavara peroveta taudia edia gaukara hebou tauna danu. Bona lau be, inai buka ena hereva idia kamonai henia taudia ibounai edia gaukara hebou tauna danu. Dirava sibona do oi tomadiho henia.”

¹⁰Ma lau ia hamaoroa, ia gwau, “Inai buka ena peroveta hereva do oi hunia lasi, badina be Dirava ese inai kara do ia karaia ena nega be kahirakahira.

¹¹Vadaeni kara dika tauna, be kara dika do ia karaia noho. Lebulebu tauna, be lebulebu do ia karaia noho. Kara maoromaoro tauna, be kara maoromaoro do ia karaia noho. Bona helaga tauna, be helaga kara do ia karaia noho.”

¹²Iesu ia hereva, ia gwau, “Kamonai! Lau be karaharaga umui dekenai do lau mai! Taunimanima edia gaukara davana be lauegu imana dekenai idia noho. Taunimanima ibounai edia kara hegeregerena edia davana do lau henia.

¹³Lau be Alepa bona Omega, ginigunana bona gini gabena, matamana bona dokona.”

¹⁴Edia dabua idia huria taudia be idia moale. Badina be inai: Idia be mai edia maoro, mauri auna ena huahua do idia ania. Bona mai edia maoro danu, hanua ena iduara do idia raka vareai.

¹⁵To murimuri dekenai be kara bodaga taudia, bona dika bada idia karaia taudia, meamea taudia, matabodaga taudia, ala-ala taudia, kaivakuku idia tomadiho henia taudia, bona koikoi idia ura henia bona badinaia taudia idia noho.

¹⁶“Lau Iesu ese egu aneru umui dekenai lau siaia, inai hereva be ekalesia oreadia dekenai do ia gwauraia totona. Lau be Davida ena natuna ta, Davida ena bese tauna. Lau be unai hisiu bada, daba rere neganai ia diaridiari gauna.”

¹⁷Lauma Helaga bona Headava Matamata Hahine idia gwau, “Oi mai.” Bona inai hereva idia kamonai taudia danu, namona be idia gwau, “Oi mai.” Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.

¹⁸Lau Ioane, ese inai buka ena peroveta hereva idia kamonai noho taudia lau sisiba henia inai: Tau ta ese bema inai hereva edia latanai hereva haida ma do ia atoa kau neganai, Dirava ese inai buka lalonai idia torea hisihisi, be unai tau ena latanai do ia atoa kau.

¹⁹Bona bema tau ta ese hereva ta inai peroveta bukana dekena amo do ia kokia, Dirava ese unai tau ena davana namona do ia kokia. Oibe, ia ese mauri auna ena aniani do ia ania diba lasi. Bona ia be Hanua Helagana do ia vareai diba lasi. Inai davana namodia ruaosi be inai buka ese ia herevalaia vadaeni.

²⁰Inai hereva ibounai ia gwauraia hedinarai Tauna ia gwau, “Oibe, momokani, lau be kahirakahira do lau mai.” Amen. Lohiabada Iesu e, oi mai.

²¹Lohiabada Iesu ena hariharibada umui ibounai dekenai do ia noho. Amen.