Read Buka Helaga (Hiri Motu) 1993 APOKALUPO 9 Bible Online

APOKALUPO 9 - Buka Helaga (Hiri Motu) 1993 bible

APOKALUPO 9

¹Aneru namba 5 ese iena kibi ia hiriria. Vadaeni hisiu ta lau itaia, guba dekena amo ia moru diho tanobada dekenai. Inai hisiu dekenai ki idia henia. Ki be dobu masemase gurina kehoa gauna.

²Hisiu ese dobu masemase gurina ia kehoa. Vadaeni kwalahu be guri dekena amo ia daekau, amu badana ena kwalahu bamona. Inai guri dekena amo ia daekau kwalahuna ese dina bona guba padana idia koua, vadaeni idia dibura.

³Vadaeni kwalahu dekena amo kwadi idia diho mai tanobada dekenai. Bona idia ese tanobada doadoa edia siahu hegeregerena idia abia.

⁴Oda hereva inai bamona idia abia, “Umui ese rei do umui hadikaia lasi, tano dekenai idia tubu avadia bona au danu do umui hadikaia lasi. To umui ese Dirava ena maka edia baguna dekenai idia abia lasi taudia sibona do umui hadikaia.

⁵Umui ese inai taudia do umui hisihisi henia ia lao bona hua 5, to umui ese idia do umui alaia lasi.” Vadaeni inai kwadi ese taunimanima idia hisihisi henia dikadika. Unai hisihisi be tanobada doadoa edia koria hisihisi bamona.

⁶Unai hua 5 lalonai, taunimanima ese mase do idia tahua, to do idia davaria lasi. Idia be mase do idia ura dikadika, to mase ese idia dekena amo do ia heau siri bamona.

⁷Inai kwadi edia toana be tuari hosi bamona. Edia kwarana latanai be golo kwara gaudia bamona. Edia vairana be taunimanima edia vairana bamona.

⁸Edia huina be hahine edia huina bamona. Edia isena be laiona edia isena bamona.

⁹Edia kemena dekenai be palaka gaudia, auri bamona, idia noho. Edia hanina edia regena be kariota edia regena bamona, hosi momo ese idia veria gaudia, tuari dekenai idia heau vareai neganai.

¹⁰Edia iuna be doadoa edia iuna bamona, mai ena koria gauna, doadoa bamona. Edia siahu, taunimanima do idia hisihisi henia hua 5, be edia iuna dekenai ia noho.

¹¹Idia be mai edia king. Ia be guri dobu masemase ena aneru. Iena ladana Heberu gado dekenai be Abadoni, to Helene gado dekenai iena ladana be Apoliona, ena anina be “Hadikaia Tauna.”

¹²Dika ta ia ore vadaeni. Rua be idia do noho.

¹³Aneru namba 6 ese iena kibi ia hiriria. Vadaeni gado ta lau kamonai, golo pata helagana ena kona 4 dekena amo. Inai pata helagana be Dirava ena vairanai ia noho.

¹⁴Unai gado ese aneru namba 6 ia hamaoroa, ia gwau, “Aneru 4, Euperate Sinavai badana ena isena dekenai idia guia noho, be do oi ruhaia.”

¹⁵Vadaeni unai aneru 4 be ia ese ia ruhaia. Unai aneru 4 be idia abia hegaegae, unai hora, unai dina, unai hua, unai lagani, gaukara ta do idia karaia totona. Edia gaukara be inai: Tanobada ena taunimanima orea toi dekena amo orea ta be do idia alaia mase.

¹⁶Idia edia tuari taudia, hosi dekenai idia guia taudia, be ibounai 200 milioni. Edia momo be gado ta ese lau ia hamaoroa.

¹⁷Vadaeni, egu mata hanai lalonai unai hosi, mai edia guia taudia lau itaia. Unai taudia ese kemena auri edia kemena dekenai idia atoa. Unai auri edia kala be kakakaka, lahi bamona, bona bulu bona labora, salipa nadi bamona. Hosi edia kwarana be laiona edia kwarana bamona, bona edia uduna dekena amo, lahi bona kwalahu bona salipa idia negea murimuri kahana dekenai.

¹⁸Inai dika badadia toi dainai, tanobada taudia ibounai kahana toi dekena amo, kahana ta idia mase. Inai lahi bona kwalahu, bona salipa, unai hosi ese edia uduna dekena amo idia negea gaudia, ese unai taudia idia alaia mase.

¹⁹Hosi edia siahu be edia uduna bona edia iuna dekenai. Edia iuna be gaigai bamona, mai edia kwarana, bona unai kwarana dekena amo taunimanima idia hisihisi henia.

²⁰Tanobada taudia oredia, inai hisihisi ese ia hamasea lasi taudia, be edia lalona idia giroa lasi, bona edia imana idia karaia gaudia dekena amo idia raka siri lasi. Idia ese lauma dikadia tomadiho henia karana idia rakatania lasi. Golo bona siliva bona kapa bona nadi bona au dekena amo idia karaia kaivakuku tomadiho henia kara idia hadokoa lasi. Inai kaivakuku gaudia ese gau idia itaia diba lasi, idia kamonai diba lasi, bona idia be raka diba lasi gaudia.

²¹Oibe, unai dika taudia ese edia ala-ala, bona edia babalau, bona edia heudahanai, bona edia henaoa karadia danu dekena amo edia lalona idia giroa lasi.