Read Buka Helaga (Hiri Motu) 1993 RUTA 3 Bible Online

RUTA 3 - Buka Helaga (Hiri Motu) 1993 bible

RUTA 3

¹Gabeai Naomi ese Ruta dekenai ia hereva, ia gwau, “Lauegu ravana e, lau ura tau ta do lau davaria, do oi adavaia, bona iena ruma dekenai do oi noho namonamo.

²Iseda varavara tauna Boasi, iena hesiai hahine danu oi gaukara noho tauna, be hari hanuaboi iena bali kopina kokia gaukara do ia karaia, bali kwadia gabunai.

³Unai dainai, do oi digu, oiemu kopina dekenai bonana namo muramurana oi atoa, oiemu dabua namona do oi karaia, bona unai bali kwadia gabuna dekenai do oi lao. To Boasi dekenai do oi hedinarai lasi ela bona do ia aniani bona inuinu vadaeni.

⁴Vadaeni do ia hekure neganai, iena hekure gabuna do oi itaia, gabeai do oi raka vareai, iena bilankesi iena aena dekena amo oi kokia, do oi hekure diho. Ia ese oi do ia hamaoroa, dahaka do oi karaia.”

⁵Ruta ia gwau, “Oiemu hereva hegeregerena do lau karaia.”

⁶Vadaeni bali kwadia gabuna dekenai ia lao, bona Naomi ena hereva hegeregerena ia karaia.

⁷Boasi be ia aniani bona ia inuinu vadaeni, bona mai moale danu ia hekure diho, bali idia haboua kahana dekenai. Vadaeni Ruta be mai regerege lasi ia lao, bilankesi be Boasi ena aena dekena amo ia abia isi, ia hekure diho.

⁸Hanuaboi momokani neganai Boasi ia noga, ia hoa, ia helai, hahine ia itaia, iena aena badinai ia hekure.

⁹Ia gwau, “Oi be daika?” Ruta ia haere, ia gwau, “Lau be oiemu hesiai hahine, Ruta. Oi be Elimeleka ena varavara tauna korikori. Unai dainai lau oi naria bona durua be namo.”

¹⁰Boasi ia gwau, “Lauegu natuna e, Lohiabada ese oi do ia hanamoa, inai hari oi karaia karana ena namo ese, oiemu kara namona oiemu ravana dekenai ia hereaia. Badina be uhau taudia momo idia noho, ogogami taudia, bona mai edia kohu taudia. To idia ta oi tahua lasi, ta oi sihari henia gwauraia lasi.

¹¹Unai dainai, lauegu natuna e, oi gari lasi, oiemu noinoi hegeregerena oi dekenai do lau henia, badina be lauegu hanua taudia ibounai idia diba oi be hahine namona.

¹²Momokani, lau be oiemu adavana, ia mase tauna ena varavara, bona oi do lau naria be lauegu gaukara. To tau ta ia noho, ia danu be oiemu varavara, bona ia ese lau ia hereaia inai naria gaukara totona.

¹³Hari hanuaboi iniseni oi noho. Dabai, bema unai tau ia ura oi do ia adavaia, namo. To bema lasi, lau ese oi do lau adavaia. Inai be lau gwauhamata, bona Lohiabada ia diba lau be lau hereva momokani. Hari oi hekure diho ela bona daba.”

¹⁴Unai dainai, Ruta be iena badinai ia hekure ela bona daba. Boasi ese ia dekenai ia hamaoroa, ia gwau, “Namo lasi taunimanima idia diba oi mai vadaeni lau dekenai.” Unai dainai Ruta be daba maragi neganai ia toreisi, taunimanima idia itaia diba lasi neganai.

¹⁵Boasi danu ia gwau, “Oiemu dabua badana oi mailaia, bona oi kehoa.” Ruta ese iena dabua ia kehoa, vadaeni Boasi ese bali 20 kilogaram ia udaia, ia henia. Vadaeni Ruta ese ia abia lao, bona ia be hanua dekenai ia giroa lou.

¹⁶Ruta be iena ravana dekenai ia ginidae neganai, Naomi ese ia nanadaia, ia gwau, “Lauegu natuna e, oi dekenai dahaka ia vara?” Ruta ese Boasi ena kara ibounai ena sivarai ia gwauraia.

¹⁷Ma ia gwau, “Boasi ese bali haida lau dekenai ia henia, ia gwau, ‘Lau ura lasi imana kavakava oiemu ravana dekenai do oi giroa lou.’ ”

¹⁸Vadaeni Naomi ia hereva, ia gwau, “Lauegu natuna e, do oi naria ela bona Boasi ena hereva oi kamonai. Ia be hari dina do ia laga-ani lasi, ela bona gau ibounai do ia hamaoromaoroa.”