Read Buka Helaga (Hiri Motu) 1993 1 SAMUELA 2 Bible Online

1 SAMUELA 2 - Buka Helaga (Hiri Motu) 1993 bible

1 SAMUELA 2

¹Unai neganai Hana be inai bamona ia guriguri: “Lohiabada ese lauegu kudouna ia hamoalea, lauegu goada ia bada, Lohiabada dainai. Lau dekenai idia dagedage taudia lau kirikirilaia. Lohiabada ese lau ia hamauria dainai lau moale.

²“Tau ta ia helaga lasi Lohiabada hegeregerena, Dirava ta be lasi, ia sibona. Naria Tauna ta be lasi, aiemai Dirava hegeregerena.

³“Hekokoroku hereva do umui gwauraia lou lasi, hekokoroku hereva oiemu uduna ese do ia gwauraia lasi. Badina be Lohiabada be aonega Diravana, ia ese kara ibounai edia namo o dika ia diba.

⁴“Goada taudia edia peva Lohiabada ese ia hamakohia noho, to manoka taudia be Lohiabada ese ia hagoadaia noho.

⁵Guna mai edia aniani momo boga kunu taudia, be hari aniani davana gaukara idia karaia noho, to hitolo taudia be Lohiabada ese ia durua, idia hitolo lou lasi. Natuna ia havaraia diba lasi hahine, ese natuna 7 ia havaraia, to natuna momo hahine, be iena natuna ibounai idia boio.

⁶“Lohiabada ese ia alaia, bona ia hamauria. Ia ese taunimanima momo, be mase taudia edia gabu dekenai ia siaia diho, bona ia ese idia ia hatorea isi, idia mauri lou.

⁷Lohiabada ese taunimanima haida dekenai ogogami ia henia, to haida dekenai moni bona kohu momo ia henia. Ia ese haida ia hamaragia, to haida ia habadaia.

⁸Lohiabada ese ogogami taudia, be kahu dekena amo ia abidia isi, bona gau lasi taudia, be edia lalohisihisi dekena amo ia hanamodia lou, lohia taudia edia turana taudia ia halaodia, bona mai edia mataurai bada gabudia ia henidia. “Badina be tanobada ena badina nadidia be Lohiabada ena, bona unai badina nadi edia latanai, ia ese tanobada ia haginia vadaeni.

⁹Lohiabada ese iena taudia edia mauri ia naria noho, to kara dika taudia, be dibura dekenai do ia negedia. “Badina be tau ta ese sibona ena goada, dekena amo ia kwalimu diba lasi.

¹⁰Lohiabada dekenai idia dagedage taudia ese, dika do idia davaria. Lohiabada ese guba dekena amo do ia hadikadia. Lohiabada ese tanobada ibounai do ia kota henia. Ia ese iena king dekenai siahu do ia henia, bona ia abia hidi king tauna dekenai, kwalimu do ia henia.”

¹¹Unai neganai Elikana be Rama dekenai ia giroa lou. To iena mero Samuela ese Lohiabada ena hesiai gaukara ia karaia, hahelagaia tauna Eli ena vairana dekenai.

¹²Eli ena natuna taudia be lebulebu taudia, bona idia ese Lohiabada idia matauraia lasi.

¹³Edia kara taunimanima dekenai be inai bamona: Tau ta ena boubou gauna ia mailaia neganai, hahelagaia tauna ena hesiai tauna be ia mai, vamu do ia nadua ore lasi neganai, foka be iena imana dekenai ia abia.

¹⁴Vadaeni foka be uro lalonai ia kodoa vareai, bona foka ese ia abia isi gaudia ibounai be hahelagaia tauna ena. Israela taudia ibounai Silo Dubu dekenai idia lao neganai be unai bamona kara idia davaria.

¹⁵Ma inai danu: Digara do idia gabua ore lasi neganai, hahelagaia tauna ena hesiai tauna be ia mai, boubou gauna ia mailaia tauna dekenai ia hereva, ia gwau, “Vamu ma haida hahelagaia tauna dekenai do oi henia, do ia gabua, badina be oi nadua gauna be oi dekena amo do ia abia lasi, kasiri gauna sibona ia ura.”

¹⁶Bona unai tau bema ia gwau, “Mani emu kara, boubou ena taravatu be digara do ia gabua ore guna, vadaeni oiemu ura hegeregerena do oi abia,” vadaeni hesiai tauna do ia haere, ia gwau, “Lasi, harihari lau dekenai oi henia, bema lasi, lau ese dagedage dala dekenai do lau abia momokani.”

¹⁷Inai kara dika, Eli ena natuna taudia ese idia karaia, be Lohiabada ena vairana dekenai ia dika herea, badina be idia ese Lohiabada ena boubou gaudia idia matauraia lasi.

¹⁸Mero Samuela ese Lohiabada ena hesiai gaukara ia karaia. Iena dabua helagana be namo hereana.

¹⁹Lagani ta ta ibounai, iena sinana ese dabua maragina matamatana ta ia turia, ia abia lao, mero dekenai ia henia. Unai bamona ia karaia, iena adavana danu, lagani ta ta ena boubou henia totona idia lao neganai.

²⁰Unai neganai Eli ese Elikana bona iena adavana ia hanamoa, ia gwau, “Lohiabada ese natuna ma haida inai hahine dekena amo oi dekenai do ia henia, inai mero Samuela, Lohiabada dekenai umui henia ena davana.” Vadaeni idia be ruma dekenai idia giroa lou.

²¹Lohiabada ese Hana ia hanamoa momokani. Ia rogorogo lou, natuna haida ma ia abia, memero toi, bona kekeni rua. Ma Samuela be Lohiabada ena vairana dekenai ia tubu namonamo.

²²Eli be buruka herea vadaeni. Ia ese iena natuna tatau edia kara dika ibounai Israela taudia dekenai idia hadikaia karadia ena sivarai ia kamonai. Ia kamonai danu idia ese Palai Dubu ena iduara dekenai idia gaukara hahine idia sihari henidia noho.

²³Vadaeni Eli ese iena natuna ia gwau henidia, ia gwau, “Badina dahaka inai bamona umui karaia noho? Emui kara sivaraina taunimanima ibounai idia herevalaia, be lau kamonai.

²⁴Inai kara do umui hadokoa! Lohiabada ena orea taudia idia herevalaia gaudia be dika momokani!

²⁵Bema tau ta ese tau ta dekenai do ia kara dika neganai, Dirava ese do ia kota henia. To bema tau ta ese Lohiabada dekenai ia kara dika neganai, daika ese unai tau ia hamauria diba?” To idia ese edia tamana idia kamonai henia lasi, badina be Lohiabada ia ura do ia aladia mase.

²⁶Samuela ia tubu namonamo, bona ia bada lao noho dinadia lalonai, Lohiabada bona taunimanima ese Samuela idia ura henia.

²⁷Unai neganai Dirava ena hesiai tauna ta be Eli dekenai ia lao, ia hereva henia, ia gwau, “Lohiabada be inai bamona ia hereva, ia gwau: ‘Oiemu sene tauna Arona mai ena famili be Aigupito ena king dekenai hesiai mai guia danu idia karaia neganai, lau ese Arona dekenai lau hedinarai.

²⁸Lau ese ia lau abia hidi, Israela iduhu ibounai edia huanai dekena amo, bona lauegu hahelagaia tauna lau halaoa. Ia, bona iena bese taudia ese lauegu boubou patana dekenai boubou idia karaia, muramura mai bonana namo idia gabua, bona dabua helagana egu vairana dekenai idia karaia. Lauegu lahi boubou gaudia ibounai Israela taudia ese lau dekenai idia henia vamudia, be Arona ena iduhu taudia danu lau haria.

²⁹Dahaka dainai lauegu boubou gaudia, bona harihari gaudia, lauegu bese taudia dekena amo lau abia noho gaudia dekenai oi mataganigani henia, bona haida oi abia kava? Bona Eli e, badina dahaka oi ese oiemu natuna oi matauraia bada, to lau oi matauraia maragi? Dahaka dainai Israela taudia idia mailaia bouboudia be umui ese kahana namodia umui abia, emui bogana umui hakunua?’

³⁰“Unai dainai Lohiabada, Israela ena Dirava be inai bamona ia hereva, ia gwau, ‘Guna lau gwauhamata, lau gwau, oiemu famili taudia bona emui sene ena iduhu taudia be egu vairanai hahelagaia gaukara do idia karaia hanaihanai.’ To harihari lau gwau, unai gwauhamata lau koua vadaeni. Badina be lau dekenai idia matauraia taudia be do lau matauraidia, to lau dekenai idia matauraia lasi taudia be do lau negea momokani.

³¹Oi kamonai: Dina do ia ginidae, lau ese oiemu goada do lau haorea, bona oiemu tamana ena bese taudia ibounai do lau alaia mase. Vadaeni oiemu bese ena tatau ibounai be buruka dekenai idia mauri noho diba lasi.

³²Vadaeni oiemu ogogami lalonai, Israela taudia edia mauri namona do oi itaia, bona do oi mama henidia. To oiemu bese taudia ta ese buruka dekenai do ia mauri noho diba lasi.

³³To oiemu bese ena tau tamona do lau alaia lasi, ia ese lauegu boubou helaga gaukara do ia karaia. To ia be iena matana do ia kepulu, bona iena lalona do ia hisihisi. Bona oiemu bese orena be taunimanima ese do idia aladia mase.

³⁴“Lauegu hereva be momokani, ena momokani do oi itaia toana be inai: Oiemu natuna ruaosi, Hopini bona Pineha, be dina tamona dekenai do idia mase.

³⁵Vadaeni lau ese hahelagaia tauna namona ta do lau abia hidi. Ia ese lauegu ura bona lauegu laloa gauna ibounai do ia karaia. Lau ese iena bese do lau haginia, bona ia dekenai natuna momo do lau henia, idia ese lau abia hidi king ena vairanai hesiai gaukara do idia karaia ela bona hanaihanai.

³⁶Oiemu bese taudia, idia mase lasi taudia, be noinoi taudia do lau halaoa. Aniani o moni abia totona idia ese unai hahelagaia tauna dekenai do idia lao, do idia noinoi, do idia gwau, ‘Mani emu kara boubou helaga gaukara ai dekenai do oi henia, aniani sisina do ai ania totona.’ ”